iPhone: ఐఫోన్ లేదా మాక్‌బుక్ కొనుగోలు చేయలేకపోతున్నారా? 3 నెలలు అద్దెకు ఇలా ఈజీగా తీసుకోవచ్చు..

iPhone: ప్రపంచ ప్రఖ్యాత టెక్ దిగ్గజం యాపిల్ వినియోగదారుల కోసం ఒక సరికొత్త సేవను అందుబాటులోకి తీసుకురావడానికి సన్నాహాలు చేస్తోంది. మార్కెట్లో ఐఫోన్, ఐప్యాడ్ అలాగే మాక్‌బుక్ వంటి ప్రీమియం డివైజెస్‌ ధరలు విపరీతంగా పెరుగుతున్న తరుణంలో సామాన్య ప్రజలకు ఇవి మరింత చేరువయ్యేలా ఈ కొత్త కార్యక్రమం రూపకల్పన చేయబడింది. సరికొత్త 'యాపిల్ అప్‌గ్రేడ్' పేరుతో ప్రవేశపెడుతున్న ఈ విధానం కేవలం సాధారణ ఫైనాన్స్ ప్లాన్‌లా కాకుండా ఒక కారు లీజు ఒప్పందం మాదిరిగా పనిచేస్తుందని నిపుణులు వెల్లడిస్తున్నారు. దీని ద్వారా వినియోగదారులు పూర్తి మొత్తాన్ని చెల్లించి కొనుగోలు చేయకుండా, నెలవారీ అద్దె చెల్లించి తమకు నచ్చిన పరికరాలను వినియోగించుకోవచ్చు.

ఈ లీజింగ్ సబ్‌స్క్రిప్షన్ విధానంలో భాగంగా వివిధ డివైజెస్‌కు వేర్వేరు గడువు కాలాలను నిర్ణయించడం జరిగింది. ముఖ్యంగా ఐఫోన్‌లు అలాగే యాపిల్ వాచ్‌లను 24 నెలల వరకు లీజు ప్రాతిపదికన తీసుకోవడానికి అవకాశం కల్పిస్తున్నారు. అదేవిధంగా ఐప్యాడ్‌లు, మాక్ కంప్యూటర్లను సుదీర్ఘంగా 36 నెలల వరకు అంటే మూడేళ్ల కాలపరిమితితో అద్దెకు తీసుకునే సౌలభ్యాన్ని కల్పిస్తున్నారు. లీజు గడువు ముగిసిన తర్వాత వినియోగదారులు ఆ పరికరాన్ని కంపెనీకి తిరిగి వెనక్కి ఇవ్వవచ్చు. కొత్త మోడల్‌కు అప్‌గ్రేడ్ కావచ్చు లేదా అదనపు రుసుం చెల్లించి శాశ్వతంగా తమ వద్దే ఉంచుకోవచ్చనే మూడు ప్రత్యామ్నాయాలను అందించనున్నారు.

కాగా, ఈ సరికొత్త సేవను క్లార్నా అనే ప్రముఖ బై-నౌ-పే-లేటర్ సంస్థ ఆర్థిక భాగస్వామ్యంతో అమలు చేయనున్నట్లు సమాచారం. అమెరికా మార్కెట్లో తొలుత ప్రారంభం కానున్న ఈ విధానం ద్వారా వినియోగదారుల ఆర్థిక భారాన్ని గణనీయంగా తగ్గించవచ్చని భావిస్తున్నారు. అయితే ఇందులో కొన్ని ప్రాథమిక మోడల్స్, ఎంట్రీ-లెవెల్ డివైజెస్‌ను మినహాయించినట్లు తెలుస్తోంది. టెక్ ప్రపంచంలో సంచలనం సృష్టిస్తున్న ఈ అద్దె విధానం భవిష్యత్తులో మరింత విస్తరించే అవకాశం ఉందని మార్కెట్ విశ్లేషకులు అంచనా వేస్తున్నారు.