ATMల నుంచి డ‌బ్బులే కాదు.. ఇక‌పై డెబిట్, క్రెడిట్ కార్డులు తీసుకోవ‌చ్చు. ఎలాగంటే.?

ATM New Facility: ఇప్పటివరకు ఏటీఎమ్‌ అంటే నగదు తీసుకునే యంత్రంగానే మనకు తెలుసు. కానీ త్వరలో ATMల రూపం పూర్తిగా మారే అవకాశం ఉంది. ఇకపై ATM నుంచి డబ్బులు తీసుకోవడంతో పాటు.. కొత్త డెబిట్, క్రెడిట్ కార్డులను కూడా వెంటనే పొందే సదుపాయం అందుబాటులోకి రానుంది.

ATM నుంచే RuPay కార్డు

కొత్త విధానంలో ATM మిషన్ నుంచే వ్యక్తిగతంగా తయారు చేసిన RuPay డెబిట్, క్రెడిట్ కార్డులతో పాటు NCMC కార్డులను పొందే అవకాశం ఉంటుంది. ఇందుకోసం ఓపెన్ సోర్స్ ఆండ్రాయిడ్ ఆధారిత ATM సొల్యూషన్‌ను ఉపయోగిస్తున్నారు. సాధారణంగా కొత్త అకౌంట్‌ తెరిచిన తర్వాత లేదా కొత్త కార్డు కోసం దరఖాస్తు చేసిన తర్వాత కార్డు చేతికి రావడానికి కొంత సమయం పడుతుంది.

కానీ ఈ విధానం అందుబాటులోకి వస్తే అవసరమైన ప్రక్రియ పూర్తయిన వెంటనే ATM నుంచే కార్డును పొందవచ్చు. ATM నుంచి తీసుకున్న కార్డును యాక్టివేట్ చేసుకుని బ్యాంకింగ్ సేవలను త్వరగా ఉపయోగించుకునే అవకాశం ఉంటుంది. కార్డు జారీ ప్రక్రియ వేగవంతం కావడంతో డెబిట్, క్రెడిట్ కార్డు వినియోగం కూడా మరింత పెరిగే అవకాశం ఉంది.

నగదు మాత్రమే కాదు.. మరిన్ని బ్యాంకింగ్ సేవలు

కొత్త తరం ATMలు కేవలం నగదు తీసుకోవడానికి మాత్రమే పరిమితం కాకుండా మరిన్ని బ్యాంకింగ్ సేవలను అందించేలా రూపొందిస్తున్నారు. కార్డు నుంచి నగదు తీసుకోవడంతో పాటు UPI ద్వారా కార్డు లేకుండానే ATM నుంచి డబ్బులు తీసుకునే సదుపాయం ఇప్పటికే అందుబాటులో ఉన్న విషయం తెలిసిందే. ఇప్పుడు దీనికి కొత్త సేవలు కూడా జోడించే ప్రయత్నం జరుగుతోంది.

కొత్త ATMల ద్వారా చెక్కులు జమ చేయడం, కొత్త బ్యాంక్ ఖాతా తెరవడం, రుణం కోసం దరఖాస్తు చేయడం వంటి సేవలను కూడా అందించేలా సాంకేతికతను అభివృద్ధి చేస్తున్నారు. దీంతో పూర్తిస్థాయి బ్యాంక్ బ్రాంచ్ ఏర్పాటు చేయడం కష్టంగా ఉన్న ప్రాంతాల్లో కూడా ఇలాంటి యంత్రాలను ఏర్పాటు చేయవచ్చు. ముఖ్యంగా విమానాశ్రయాలు, ట్రాన్సిట్ హబ్‌లు, కాలేజీ క్యాంపస్‌లు, కార్పొరేట్ పార్కులు వంటి ప్రాంతాల్లో వీటిని డిజిటల్ బ్యాంకింగ్ యూనిట్లుగా (DBUs) ఉపయోగించే అవకాశం ఉంది.

SBI సహా 9 బ్యాంకులు పరీక్షిస్తున్న కొత్త టెక్నాలజీ

ఈ కొత్త ATM విధానం ప్రస్తుతం పరీక్షల దశలో ఉంది. నేషనల్ పేమెంట్స్ కార్పొరేషన్ ఆఫ్ ఇండియా (NPCI), ATM తయారీ సంస్థలతో కలిసి 9 బ్యాంకులు ఈ సాంకేతిక విధానాన్ని పరిశీలిస్తున్నాయి. ఈ జాబితాలో స్టేట్ బ్యాంక్ ఆఫ్ ఇండియా (SBI), బ్యాంక్ ఆఫ్ బరోడా, పంజాబ్ నేషనల్ బ్యాంక్, యూనియన్ బ్యాంక్ ఆఫ్ ఇండియా, బ్యాంక్ ఆఫ్ ఇండియా, సెంట్రల్ బ్యాంక్ ఆఫ్ ఇండియా, UCO బ్యాంక్, స్లైస్ స్మాల్ ఫైనాన్స్ బ్యాంక్, ఎయిర్‌టెల్ పేమెంట్స్ బ్యాంక్ ఉన్నాయి.

ప్రభుత్వ రంగ బ్యాంకులతో పాటు పేమెంట్స్‌పై ఎక్కువగా దృష్టి పెట్టే సంస్థలు కూడా ఈ ప్రయోగంలో భాగం కావడం గమనార్హం. వివిధ రకాల బ్యాంకుల వద్ద ఈ విధానం ఎలా పనిచేస్తుంది? వినియోగదారులకు ఎంత సులభంగా సేవలు అందించవచ్చు? వంటి అంశాలను ప్రస్తుతం పరిశీలిస్తున్నారు.

కార్డు కోసం రోజుల తరబడి ఎదురుచూసే రోజులకు చెక్

ఈ విధానం పెద్ద స్థాయిలో అమల్లోకి వస్తే బ్యాంకు ఖాతాదారులకు గణనీయమైన ప్రయోజనం కలగవచ్చు. కొత్త ఖాతా తెరిచిన తర్వాత లేదా కార్డు కోసం దరఖాస్తు చేసిన తర్వాత కార్డు చేతికి వచ్చే వరకు ఉండే సమయం తగ్గుతుంది. బ్యాంక్ బ్రాంచ్‌లపై కూడా కొంత పని భారం తగ్గే అవకాశం ఉంటుంది.

అంతేకాదు.. బ్యాంకింగ్ సేవలు తక్కువగా ఉన్న గ్రామీణ, మారుమూల ప్రాంతాల్లో ఇలాంటి డిజిటల్ బ్యాంకింగ్ కేంద్రాలను ఏర్పాటు చేస్తే ప్రజలకు బ్యాంకింగ్ సేవలు మరింత సులభంగా అందుబాటులోకి రావచ్చు. భవిష్యత్తులో ATM అంటే కేవలం డబ్బులు ఇచ్చే యంత్రం కాకుండా.. కార్డు జారీ, నగదు ఉపసంహరణ, UPI సేవలు, ఖాతా ప్రారంభం, రుణ దరఖాస్తు వంటి అనేక సేవలు అందించే చిన్న డిజిటల్ బ్యాంకింగ్ కేంద్రంగా మారే అవకాశం ఉంది.