Bank Account: మీకు ఒక‌టి కంటే ఎక్కువ బ్యాంక్ అకౌంట్లు ఉన్నాయా.? ఈ విష‌యాలు క‌చ్చితంగా తెలుసుకోవాల్సిందే!

Bank Account: ప్రస్తుతం చాలామంది అవసరాన్ని బట్టి రెండు లేదా అంతకంటే ఎక్కువ బ్యాంక్ ఖాతాలను తీసుకుంటున్నారు. ఉద్యోగులకు శాలరీ అకౌంట్‌తో పాటు వ్యక్తిగత సేవింగ్స్ అకౌంట్ ఉండటం సాధారణమే. కొందరు పెట్టుబడులు, వ్యాపార లావాదేవీలు, కుటుంబ అవసరాల కోసం వేర్వేరు ఖాతాలను ఉపయోగిస్తుంటారు. అయితే ఖాతాల సంఖ్య పెరిగే కొద్దీ వాటిని సక్రమంగా నిర్వహించడం కూడా అంతే ముఖ్యం.

ఎక్కువ అకౌంట్లు ఉంటే సమస్య ఏంటి?

ఒకటి కంటే ఎక్కువ బ్యాంక్ ఖాతాలు ఉండటం తప్పు కాదు. వేర్వేరు అవసరాలకు ప్రత్యేక ఖాతాలను నిర్వహించడం వల్ల కొన్నిసార్లు ఆర్థిక నిర్వహణ సులభంగా ఉంటుంది. అయితే ప్రతి ఖాతాపై ఉండే నిబంధనలు, ఛార్జీలు, అవసరమైన బ్యాలెన్స్‌ను తెలుసుకోకుండా ఖాతాలను కొనసాగిస్తే ఇబ్బందులు ఎదురుకావచ్చు. ముఖ్యంగా చాలాకాలంగా ఉపయోగించని ఖాతాలను క్లోజ్ చేయ‌డం వల్ల అనవసరమైన సేవా రుసుములు పడే అవకాశం ఉంటుంది. అందుకే తమకు నిజంగా అవసరమైన అకౌంట్‌లు ఎన్ని ఉన్నాయో ఎప్పటికప్పుడు పరిశీలించుకోవడం మంచిది.

మినిమం బ్యాలెన్స్‌పై ప్రత్యేకంగా దృష్టి పెట్టాలి

కొన్ని సేవింగ్స్ ఖాతాలకు బ్యాంకు నిర్దేశించిన కనీస సగటు బ్యాలెన్స్‌ను నిర్వహించాల్సి ఉంటుంది. అకౌంట్ టైప్‌, బ్యాంకు నిబంధనల ఆధారంగా ఈ మొత్తం మారవచ్చు. నిర్దేశిత బ్యాలెన్స్‌ కంటే తక్కువగా ఉంటే సంబంధిత నిబంధనల ప్రకారం ఛార్జీలు విధించే అవకాశం ఉంటుంది. ఒకటి రెండు ఖాతాలుంటే వీటిని పర్యవేక్షించడం సులభమే. కానీ అనేక ఖాతాలు నిర్వహిస్తున్నప్పుడు ఏ ఖాతాలో ఎంత మొత్తం ఉంచాలో మర్చిపోయే అవకాశం ఉంటుంది. దీంతో అవసరం లేకుండానే అదనపు రుసుములు చెల్లించాల్సి రావచ్చు.

డెబిట్ కార్డు, SMS వంటి ఛార్జీలు కూడా ఉంటాయి

బ్యాంక్ ఖాతాతో పాటు అందించే సేవలకు కొన్ని సందర్భాల్లో ప్రత్యేక రుసుములు ఉండొచ్చు. డెబిట్ కార్డు వార్షిక ఛార్జీలు, SMS అలర్ట్ ఛార్జీలు, ఇతర సేవలకు సంబంధించిన ఫీజులు బ్యాంకును బట్టి వర్తించవచ్చు. ఖాతాను పెద్దగా ఉపయోగించకపోయినా కొన్ని సేవలకు సంబంధించిన ఛార్జీలు కొనసాగవచ్చు. అందువల్ల ప్రతి అకౌంట్‌కు వర్తించే ఫీజుల వివరాలను బ్యాంకు అధికారిక నిబంధనల్లో పరిశీలించడం అవసరం. ముఖ్యంగా ఉపయోగంలో లేని ఖాతాల విషయంలో ఈ అంశాన్ని నిర్లక్ష్యం చేయకూడదు.

ఎక్కువకాలం వాడకపోతే ఖాతా స్థితి మారొచ్చు

బ్యాంక్ ఖాతాలో చాలాకాలం పాటు కస్టమర్ నిర్వహించే లావాదేవీలు లేకపోతే అది ఇనాక్టివ్ లేదా డార్మెంట్ కేటగిరీలోకి వెళ్లే పరిస్థితులు ఉండొచ్చు. ఇలాంటి ఖాతాలను తిరిగి యాక్టివ్ చేయడానికి బ్యాంకు నిర్దేశించిన ప్రక్రియను పూర్తి చేయాల్సి రావచ్చు. అందుకే ఉపయోగించని అకౌంట్లను అలాగే వదిలేయడం కంటే వాటి స్టేట‌స్‌ను ఎప్పటికప్పుడు చెక్ చేసుకోవడం మంచిది. ఇక భవిష్యత్తులో అవసరం లేని ఖాతాలు ఉంటే సంబంధిత బ్యాంకు విధానాలను తెలుసుకుని వాటిని మూసివేయడం ద్వారా నిర్వహణ భారం తగ్గించుకోవచ్చు.

అకౌంట్ల సంఖ్య కంటే నిర్వహణే ముఖ్యం

ఎన్ని బ్యాంక్ ఖాతాలు ఉండాలనే విషయంలో అందరికీ ఒకే సంఖ్య వర్తించదు. వ్యక్తిగత అవసరాలు, ఆదాయ వనరులు, పెట్టుబడులు, వ్యాపార లావాదేవీలు వంటి అంశాల ఆధారంగా నిర్ణయం తీసుకోవాలి. అవసరానికి మించి ఖాతాలు తెరిచి వాటిని పట్టించుకోకపోవడం మాత్రం మంచిది కాదు. అనేక అకౌంట్లు ఉంటే ప్రతి ఖాతా బ్యాలెన్స్, లావాదేవీలు, డెబిట్ కార్డులు, ఆటో డెబిట్లు, బ్యాంకు ఛార్జీలను విడిగా గమనించాల్సి ఉంటుంది. ఖాతాల వివరాలు ఎక్కువ కావడంతో ఆర్థిక నిర్వహణలో గందరగోళం కూడా ఏర్పడే అవకాశం ఉంది.

కాబట్టి ప్రస్తుతం ఉపయోగిస్తున్న అన్ని బ్యాంక్ ఖాతాలను ఒకసారి సమీక్షించుకుని.. అవసరం లేని ఖాతాలు ఏమైనా ఉన్నాయా, వాటికి ఏవైనా ఛార్జీలు వర్తిస్తున్నాయా, మినిమం బ్యాలెన్స్ నిబంధన ఏంటి అనే విషయాలను తెలుసుకోవాలి. ఖాతాల సంఖ్య ఎక్కువగా ఉండటం సమస్య కాదు.. వాటిని సక్రమంగా నిర్వహించకపోవడమే అసలు సమస్య.