బ్యాంక్ FD లేదా పోస్టాఫీస్ స్కీమ్.. పెట్టుబ‌డికి ఈ రెండింటిలో ఏది బెస్ట్ ఆప్ష‌న్‌.?

Saving scheme: సురక్షిత పెట్టుబడి పెట్టాలనుకునే వారికి బ్యాంక్ ఫిక్స్‌డ్ డిపాజిట్ (FD), పోస్టాఫీస్ పొదుపు పథకాలు ఇప్పటికీ అత్యంత ప్రజాదరణ పొందిన ఎంపికలుగా ఉన్నాయి. అయితే ప్ర‌స్తుత ప‌రిస్థితుల్లో ఈ రెండింటిలో ఏది లాభ‌దాయక‌మో ఇప్పుడు తెలుసుకుందాం.

భద్రత పరంగా పోస్టాఫీస్‌కే పైచేయి

బ్యాంక్ FDలు, పోస్టాఫీస్ స్కీమ్స్ రెండూ సురక్షిత పెట్టుబడులే. అయితే పోస్టాఫీస్ పథకాలకు భారత ప్రభుత్వం నేరుగా హామీ ఇస్తుంది. అందువల్ల పెట్టుబడి చేసిన మొత్తం, దానిపై వచ్చే వడ్డీ రెండూ ప్రభుత్వ భరోసాతో ఉంటాయి. మరోవైపు బ్యాంక్ FDలపై ఒక్క డిపాజిటర్‌కు, ఒక్క బ్యాంక్‌లో గరిష్టంగా రూ.5 లక్షల వరకు మాత్రమే డిపాజిట్ ఇన్సూరెన్స్ అండ్ క్రెడిట్ గ్యారంటీ కార్పొరేషన్ (DICGC) బీమా రక్షణ ఉంటుంది. అందుకే భద్రత విషయంలో పోస్టాఫీస్ పథకాలు కొంత మెరుగ్గా భావిస్తారు.

2026లో ఎక్కడ ఎక్కువ వడ్డీ లభిస్తోంది?

ఏప్రిల్–జూన్ 2026 త్రైమాసికానికి పోస్టాఫీస్ పథకాలపై 6.9 శాతం నుంచి 8.2 శాతం వరకు వడ్డీ అందుతోంది.

పోస్టాఫీస్ వడ్డీ రేట్ల విష‌యానికొస్తే..

* 1 సంవత్సరం టైమ్ డిపాజిట్ – 6.9%

* 3 సంవత్సరాల టైమ్ డిపాజిట్ – 7.1%

* 5 సంవత్సరాల టైమ్ డిపాజిట్ – 7.5%

* నేషనల్ సేవింగ్స్ సర్టిఫికేట్ (NSC) – 7.7%

* సీనియర్ సిటిజన్ సేవింగ్స్ స్కీమ్ (SCSS) – 8.2%గా ఉంది.

ఇక బ్యాంక్ FDలలో వడ్డీ రేట్లు బ్యాంకును బట్టి, కాలవ్యవధిని బట్టి మారుతాయి. ప్రస్తుతం అనేక షెడ్యూల్డ్ బ్యాంకులు 2.5 శాతం నుంచి 8 శాతం వరకు వడ్డీ అందిస్తున్నాయి. కొన్ని స్మాల్ ఫైనాన్స్ బ్యాంకులు 8 శాతం కంటే ఎక్కువ వడ్డీ కూడా ఇస్తున్నాయి.

తక్కువ కాలం పెట్టుబడికి ఏది మంచిది?

ఒక సంవత్సరం లేదా అంతకంటే తక్కువ కాలం కోసం డబ్బు పెట్టుబడి పెట్టాలనుకుంటే బ్యాంక్ FDలు మంచి ఎంపికగా కనిపిస్తున్నాయి. ఎందుకంటే ఆన్‌లైన్‌లో సులభంగా ఓపెన్ చేసుకోవచ్చు, ముందుగానే డబ్బు తీసుకునే అవకాశం ఉంటుంది. FDపై రుణం పొందవచ్చు అలాగే కొన్ని బ్యాంకులు పోస్టాఫీస్ కంటే ఎక్కువ వడ్డీ కూడా ఇస్తున్నాయి. అందువల్ల స్వల్పకాలిక పెట్టుబడిదారులకు బ్యాంక్ FDలు మరింత సౌకర్యవంతంగా ఉంటాయి.

దీర్ఘకాలిక పెట్టుబడిలో పోస్టాఫీస్ లాభం

మూడు నుంచి ఐదు సంవత్సరాల పాటు పెట్టుబడి పెట్టాలనుకునే వారికి పోస్టాఫీస్ పథకాలు ఆకర్షణీయంగా కనిపిస్తున్నాయి. ముఖ్యంగా 3 సంవత్సరాల టైమ్ డిపాజిట్ – 7.1%, 5 సంవత్సరాల టైమ్ డిపాజిట్ – 7.5%, NSC – 7.7%, SCSS – 8.2% వ‌డ్డీ ల‌భిస్తోంది. ఇక అనేక ప్రభుత్వ రంగ బ్యాంకులు 5 సంవత్సరాల FDపై సుమారు 6% నుంచి 6.3% వరకు మాత్రమే వడ్డీ అందిస్తున్నాయి. పెద్ద ప్రైవేట్ బ్యాంకులు 6.25% నుంచి 6.5% వరకు వడ్డీ ఇస్తున్నాయి. దీంతో దీర్ఘకాలిక పెట్టుబడుల్లో పోస్టాఫీస్ పథకాల రాబడి బ్యాంక్ FDల కంటే మెరుగ్గా ఉండే అవకాశం ఉంది.

పన్ను ప్రయోజనాలు, గుర్తుంచుకోవాల్సిన అంశాలు

పోస్టాఫీస్ టైమ్ డిపాజిట్‌లో కనీసం రూ.1,000తో పెట్టుబడి ప్రారంభించవచ్చు. గరిష్ట పరిమితి లేదు. పాత పన్ను విధానం (Old Tax Regime) ఎంచుకున్న వారికి 5 సంవత్సరాల పోస్టాఫీస్ టైమ్ డిపాజిట్‌పై ఆదాయపు పన్ను చట్టంలోని సెక్షన్ 80C కింద పన్ను మినహాయింపు లభిస్తుంది. అయితే వడ్డీ ద్వారా వచ్చే ఆదాయంపై పెట్టుబడిదారుడి పన్ను శ్లాబ్‌కు అనుగుణంగా పన్ను చెల్లించాల్సి ఉంటుంది. మరో ముఖ్యమైన విషయం ఏమిటంటే పోస్టాఫీస్ టైమ్ డిపాజిట్‌లో వడ్డీని త్రైమాసిక ప్రాతిపదికన లెక్కిస్తారు. కానీ చెల్లింపు మాత్రం సంవత్సరానికి ఒకసారి మాత్రమే జరుగుతుంది. బ్యాంక్ FDల మాదిరిగా ప్రతి నెలా వడ్డీ పొందే సదుపాయం సాధారణంగా ఉండదు.