Bank Holidays: మే నెల‌లో భారీగా బ్యాంకుల సెల‌వులు.. ముందే ప్లాన్ చేసుకోండి

Bank Holidays: మే నెల మొదలవుతున్న నేపథ్యంలో బ్యాంక్ పనులు ఉన్నవారు ముందుగానే ప్లాన్ చేసుకోవడం మంచిది. రిజ‌ర్వ్ బ్యాంక్ ఆఫ్ ఇండియా విడుదల చేసిన క్యాలెండర్ ప్రకారం మే 2026లో మొత్తం 12 రోజులు బ్యాంకులు ప‌నిచేయ‌వు.

ఈ సెలవుల్లో ఆదివారాలు, రెండో, నాలుగో శనివారాలతో పాటు పలు పండుగలు కూడా ఉన్నాయి. మే 1న బుద్ధ పూర్ణిమ, మే డే సందర్భంగా కొన్ని రాష్ట్రాల్లో సెలవు ఉంటుంది. అలాగే మే 9, 23 తేదీల్లో రెండో, నాలుగో శనివారాలు, మిగతా ఆదివారాలు కూడా సెలవులుగా ఉంటాయి. ఇక మే 27న బక్రీద్ (ఈద్-ఉల్-జుహా) కారణంగా దేశంలోని చాలా రాష్ట్రాల్లో బ్యాంకులు పనిచేయవు. కొన్ని ప్రాంతాల్లో మే 28న కూడా అదనపు సెలవు ఉంటుంది.

లాంగ్ వీకెండ్స్‌తో జాగ్రత్త

మే నెల ప్రారంభంలోనే లాంగ్ వీకెండ్ అవకాశం ఉంది. మే 1 శుక్రవారం సెలవు కావడంతో, దాని తర్వాత శని, ఆదివారాలు కలిసి వరుసగా మూడు రోజులు బ్యాంకులు ప‌నిచేయ‌వు. ఈ స‌మ‌యంలో బ్యాంకు పనులు ఉన్నవారు ముందుగానే పూర్తి చేసుకోవడం మంచిది. ముఖ్యంగా డ్రాఫ్ట్‌లు, చెక్ డిపాజిట్‌లు, డాక్యుమెంట్ సమర్పణ వంటి పనులు ఆలస్యమవకుండా జాగ్రత్తపడాలి.

ఆన్‌లైన్ సేవలు యథాతథం

బ్యాంకులు మూసివేసిన రోజుల్లో కూడా కస్టమర్లకు పెద్దగా ఇబ్బంది ఉండదు. డిజిటల్ బ్యాంకింగ్ సేవలు యథావిధిగా కొనసాగుతాయి. UPI లావాదేవీలు, నెట్ బ్యాంకింగ్, మొబైల్ బ్యాంకింగ్ సేవలు ఎప్పటిలాగే పనిచేస్తాయి. అలాగే ATMల ద్వారా నగదు తీసుకునే సౌకర్యం కూడా ఉంటుంది. అయితే బ్రాంచ్‌కు వెళ్లి చేయాల్సిన పనులు, ఉదాహరణకు చెక్ క్లియరెన్స్, పాస్‌బుక్ అప్‌డేట్ వంటి సేవలు మాత్రం సెలవు రోజుల్లో జరగవు. అందుకే ముందుగానే ప్లాన్ చేసుకుంటే ఇబ్బందులు లేకుండా పనులు పూర్తి చేసుకోవచ్చు.