Investment: పెట్టుబడి పెట్టే ముందు ఈ తప్పులు చేస్తున్నారా? నిపుణులు చెబుతున్న ఆర్థిక చిట్కాలు ఇవే!

Investment: ఆర్థికంగా భద్రత సాధించడానికి చాలా మంది వివిధ రంగాల్లో పెట్టుబడులు పెడుతుంటారు. అయితే ఎంత అవగాహన ఉన్నప్పటికీ కొందరు పెద్దఎత్తున నష్టాలను చవిచూస్తుంటారు. సరైన వ్యూహం, పద్ధతి లేకపోవడం వల్లే ఈ నష్టాలు జరుగుతాయని సర్టిఫైడ్ ఫైనాన్షియల్ ప్లానర్ ఒకరు స్పష్టం చేస్తున్నారు. మనం రిస్క్‌ను పూర్తిగా నివారించలేకపోయినా, సరైన ప్రణాళికతో దానిని సమర్థవంతంగా నిర్వహించవచ్చని ఆయన సూచిస్తున్నారు. పెట్టుబడి ప్రయాణాన్ని ప్రారంభించే ముందు మనం ఏ లక్ష్యం కోసం ఇన్వెస్ట్ చేస్తున్నామనే స్పష్టత ఉండాలని ఆయన పేర్కొన్నారు.

మొదటగా మన రిస్క్ తీసుకునే సామర్థ్యాన్ని బట్టి అసెట్ అలకేషన్ చేసుకోవడం చాలా ముఖ్యం. అన్ని డబ్బులను ఒకేచోట లేదా కేవలం ఈక్విటీలో మాత్రమే పెట్టకూడదని, రిస్క్ ఉన్న పెట్టుబడులతో పాటు సురక్షితమైన డెట్ పెట్టుబడులను కూడా సమపాళ్లలో కేటాయించుకోవాలని తెలిపారు. అలాగే ఒకే బాస్కెట్‌లో అన్ని గుడ్లు పెట్టకూడదన్న సూత్రం ఆధారంగా విభిన్న మార్గాల్లో డైవర్సిఫికేషన్ చేసుకోవడం వల్ల నష్టాలను గణనీయంగా తగ్గించవచ్చు. దీనితో పాటు మార్కెట్ ఒడిదుడుకులకు తగినట్లుగా సంవత్సరానికి ఒకసారి పోర్ట్‌ఫోలియోను రీబాలెన్సింగ్ చేసుకోవడం అత్యంత కీలకమని ఆయన వివరించారు.

కాగా, చాలా మందికి పెట్టుబడి పెట్టడం తెలిసినప్పటికీ, సరైన సమయంలో ఎలా బయటపడాలో తెలియక ఇబ్బంది పడుతుంటారు. గోల్ రీచ్ కావడానికి కనీసం మూడు సంవత్సరాల ముందే రిస్కీ అసెట్స్ నుంచి సేఫ్ అసెట్స్‌కు నిధులను క్రమంగా మార్చుకోవాలని సూచించారు. అలాగే ఒకేసారి పెద్ద మొత్తంలో పెట్టకుండా ఎస్టీపీ విధానాన్ని పాటించడం ద్వారా మార్కెట్ పతన సమయంలోనూ ప్రయోజనం పొందవచ్చని తెలిపారు. ఇన్వెస్ట్‌మెంట్‌ను పెరుగు తోడేయడంతో పోల్చిన ఆయన, పదే పదే గెలుకుతూ ఉంటే ఫలితం రాదని, ప్రణాళిక ప్రకారం వదిలేస్తేనే మంచి లాభాలు వస్తాయని పేర్కొన్నారు. మన నియంత్రణలో లేని మార్కెట్ వార్తల గురించి ఆందోళన చెందకుండా, మన చేతిలో ఉన్న ప్రాసెస్, బిహేవియర్‌పై దృష్టి పెట్టాలని నిపుణులు సలహా ఇస్తున్నారు.