Copper: రాగి ఇక బంగారమేనా? భారత్‌లో పెరిగిన వినియోగం.. కారణాలివే!

Copper: భారత్‌లో రాగికి డిమాండ్‌ భారీగా పెరుగుతోంది. ఆటోమొబైల్‌, నిర్మాణం, మౌలిక సదుపాయాలు, విద్యుత్‌, పారిశ్రామిక రంగాల్లో కార్యకలాపాలు ఊపందుకోవడంతో రాగి వినియోగం గణనీయంగా పెరిగింది. రాగి ఇప్పుడు పారిశ్రామిక రంగానికి కీలకమైన లోహంగా మారుతోంది.

ఇంటర్నేషనల్‌ కాపర్‌ అసోసియేషన్‌ ఇండియా (ICA India) వెల్లడించిన గణాంకాల ప్రకారం.. 2025-26 ఆర్థిక సంవత్సరంలో దేశీయ రాగి వినియోగం 2,100 కిలోటన్నులకు (KT) చేరింది. 2024-25లో నమోదైన 1,878 కిలోటన్నులతో పోలిస్తే ఇది సుమారు 12 శాతం వృద్ధి.

వైర్లు, కేబుల్స్‌ నుంచి మోటర్ల వరకు

రాగి వినియోగం ప్రధానంగా వైర్లు, కేబుల్స్‌, ట్రాన్స్‌ఫార్మర్లు, మోటర్లు, విద్యుత్‌ పరికరాలు, వివిధ పారిశ్రామిక ఉత్పత్తుల తయారీలో జరుగుతుంది. విద్యుత్‌ మౌలిక సదుపాయాల విస్తరణతో పాటు పరిశ్రమలు, రవాణా రంగాల్లో పెరుగుతున్న పెట్టుబడులు రాగికి డిమాండ్‌ను మరింత పెంచుతున్నాయి.

దేశీయంగా రాగికి పెరుగుతున్న డిమాండ్‌ ఆర్థిక కార్యకలాపాలు వేగం పుంజుకుంటున్నాయనే సంకేతాన్ని ఇస్తోందని ICA India ఎండీ మయూర్‌ కర్మార్‌కర్‌ తెలిపారు. మౌలిక సదుపాయాల పెట్టుబడులకు అనుకూలమైన విధానాలు, వేగవంతమైన పారిశ్రామికీకరణ, స్వచ్ఛ ఇంధనాల వైపు ప్రపంచం మళ్లడం వంటి అంశాలు భవిష్యత్తులో రాగి వినియోగాన్ని మరింత పెంచే అవకాశం ఉందని పేర్కొన్నారు.

మౌలిక రంగమే ప్రధాన చోదక శక్తి

2025-26 ఆర్థిక సంవత్సరంలో రాగికి అదనంగా ఏర్పడిన డిమాండ్‌లో మౌలిక సదుపాయాల రంగం కీలక పాత్ర పోషించింది. దేశ మొత్తం రాగి వినియోగంలో ఈ రంగానికి సుమారు 22 శాతం వాటా ఉంది. గత ఆర్థిక సంవత్సరంతో పోలిస్తే మౌలిక రంగంలో రాగి వినియోగం ఏకంగా 29 శాతం పెరిగింది.

విద్యుత్‌ మౌలిక సదుపాయాలు, ట్రాన్స్‌ఫార్మర్లు, కేబుల్స్‌, గ్రిడ్‌ విస్తరణ వంటి కార్యకలాపాలు రాగి వినియోగానికి ప్రధాన కారణాలుగా నిలిచాయి.

ఆటో రంగంలోనూ పుంజుకున్న డిమాండ్‌

కొంతకాలం మందగించిన ఆటోమొబైల్‌ పరిశ్రమ కూడా గత ఆర్థిక సంవత్సరంలో పుంజుకోవడంతో రాగి వినియోగం పెరిగింది. ప్యాసింజర్‌ వాహనాలు, కమర్షియల్‌ వాహనాలు, ట్రాక్టర్ల అమ్మకాలు పెరగడం ఈ రంగానికి అనుకూలంగా మారింది.

దీంతో ఆటోమోటివ్‌ రంగంలో రాగి వినియోగం వార్షిక ప్రాతిపదికన 14 శాతం పెరిగింది. ఎలక్ట్రిక్‌ వాహనాల వినియోగం పెరుగుతున్న కొద్దీ భవిష్యత్తులో ఈ రంగంలో రాగికి డిమాండ్‌ మరింత పెరిగే అవకాశం ఉందని పరిశ్రమ వర్గాలు భావిస్తున్నాయి.

నిర్మాణ రంగంలో 9 శాతం వృద్ధి

దేశీయ రాగి డిమాండ్‌లో నిర్మాణ రంగం దాదాపు నాలుగో వంతు వాటాను కలిగి ఉంది. 2025-26లో ఈ రంగంలో రాగి వినియోగం 9 శాతం పెరిగింది.

ప్రీమియం హౌసింగ్‌ ప్రాజెక్టులు, కమర్షియల్‌ రియల్‌ ఎస్టేట్‌ కార్యకలాపాలు, వేగంగా జరుగుతున్న పట్టణీకరణ కారణంగా బిల్డింగ్‌ వైర్లు, పవర్‌ కేబుల్స్‌ తదితర ఉత్పత్తులకు డిమాండ్‌ పెరిగింది. నిర్మాణ రంగంలో కార్యకలాపాలు మరింత విస్తరిస్తే రాగి వినియోగం కూడా పెరిగే అవకాశం ఉంది.

డేటా సెంటర్ల నుంచి భవిష్యత్తులో మరింత డిమాండ్‌

భారత్‌లో డేటా సెంటర్ల రంగం వేగంగా అభివృద్ధి చెందుతున్నప్పటికీ ప్రస్తుతం దేశ మొత్తం రాగి డిమాండ్‌లో వాటి వాటా 1 శాతం కంటే తక్కువగా ఉంది. ఈ రంగం ఇంకా ప్రారంభ దశలోనే ఉందని ICA India తెలిపింది.

అయితే డిజిటలైజేషన్‌, క్లౌడ్‌ కంప్యూటింగ్‌, కృత్రిమ మేధ (AI) వినియోగం పెరుగుతున్న నేపథ్యంలో రానున్న సంవత్సరాల్లో డేటా సెంటర్ల విస్తరణ వేగం పెరిగే అవకాశం ఉంది. దీంతో విద్యుత్‌ కేబుల్స్‌, పవర్‌ సిస్టమ్స్‌, కూలింగ్‌ పరికరాల్లో రాగి వినియోగానికి కొత్త అవకాశాలు ఏర్పడనున్నాయి.

స్వచ్ఛ ఇంధనాల వైపు మార్పుతో మరింత ప్రాధాన్యం

సౌర, పవన విద్యుత్‌, ఎలక్ట్రిక్‌ వాహనాలు, విద్యుత్‌ గ్రిడ్‌ల విస్తరణ వంటి స్వచ్ఛ ఇంధన ఆధారిత కార్యకలాపాల్లో రాగి కీలక పాత్ర పోషిస్తుంది. అందుకే భారత్‌లో పునరుత్పాదక ఇంధన సామర్థ్యం పెరిగే కొద్దీ రాగికి డిమాండ్‌ కూడా మరింత పెరిగే అవకాశం ఉంది.

ప్రస్తుతం మౌలిక సదుపాయాలు, ఆటోమొబైల్‌, నిర్మాణ రంగాలు రాగి వినియోగానికి ప్రధాన ఆధారాలుగా ఉండగా.. భవిష్యత్తులో స్వచ్ఛ ఇంధనాలు, ఎలక్ట్రిక్‌ మొబిలిటీ, డేటా సెంటర్లు వంటి కొత్త రంగాలు డిమాండ్‌కు మరింత ఊతమివ్వనున్నాయి.