ఖరీదైన బంగారం.. తగ్గిన డిమాండ్, పెరిగిన వినియోగ విలువ

భారత్‌లో బంగారం డిమాండ్ ఏప్రిల్-జూన్ త్రైమాసికంలో తగ్గినప్పటికీ, బంగారు బార్లు, నాణేలు, గోల్డ్ ఈటీఎఫ్‌లలో పెట్టుబడులు మాత్రం బలంగా కొనసాగాయని వరల్డ్ గోల్డ్ కౌన్సిల్ (WGC) వెల్లడించింది.

WGC విడుదల చేసిన ‘Q2 2026 Gold Demand Trends’ నివేదిక ప్రకారం, 2026 ఏప్రిల్-జూన్ త్రైమాసికంలో దేశీయ బంగారం డిమాండ్ 6 శాతం తగ్గి 131.4 టన్నులకు చేరుకుంది. గత ఏడాది ఇదే కాలంలో బంగారం డిమాండ్ 139.7 టన్నులుగా నమోదైంది.

అయితే విలువ పరంగా చూస్తే ఇది రికార్డు స్థాయికి చేరుకుందని WGC తెలిపింది. 2026 రెండో త్రైమాసికంలో బంగారం వినియోగ విలువ రూ.1,98,100 కోట్లుగా నమోదైంది. 2025 ఇదే కాలంలో ఇది రూ.1,32,500 కోట్లుగా ఉండగా, ఈసారి 50 శాతం పెరుగుదల నమోదైంది.

అధిక ధరల మధ్య కూడా బంగారంపై ఆసక్తి

WGC ఇండియా రీజినల్ సీఈఓ సచిన్ జైన్ మాట్లాడుతూ.. బంగారం ధరలు అధిక స్థాయిలో ఉన్నప్పటికీ వినియోగదారులు ఇప్పటికీ బంగారానికి ప్రాధాన్యం ఇస్తున్నారని తెలిపారు.

ప్రస్తుత పరిస్థితుల్లో ఈ ఏడాది మొత్తం బంగారం డిమాండ్ 650 నుంచి 750 టన్నుల మధ్య ఉండొచ్చని WGC అంచనా వేసింది. భౌగోళిక ఉద్రిక్తతలు, వడ్డీ రేట్లు, ద్రవ్యోల్బణం వంటి అంశాల ప్రభావంతో డిమాండ్ ఈ పరిధిలో మధ్యస్థ స్థాయిలో ఉండే అవకాశం ఉందని పేర్కొన్నారు.

బంగారం ధరల్లో తగ్గుదల రావడం, కస్టమ్స్ సుంకాలు తగ్గడం జరిగితే డిమాండ్ గరిష్ట స్థాయికి చేరుకునే అవకాశం ఉందని సచిన్ జైన్ తెలిపారు.

ఆభరణాల కొనుగోళ్లలో తగ్గుదల

2026 రెండో త్రైమాసికంలో భారత్‌లో ఆభరణాల డిమాండ్ 15 శాతం తగ్గి 75.1 టన్నులకు చేరుకుంది. గత ఏడాది ఇదే సమయంలో ఇది 88.8 టన్నులుగా ఉంది.

కాలానుగుణంగా అమ్మకాలు తగ్గడం, ప్రధాని నరేంద్ర మోదీ బంగారం కొనుగోళ్లను తగ్గించాలని చేసిన విజ్ఞప్తి, కస్టమ్స్ సుంకాల పెంపు వంటి అంశాలు ఆభరణాల డిమాండ్‌పై ప్రభావం చూపాయని WGC తెలిపింది.

ఈ ఏడాది మేలో ప్రధాని మోదీ.. ముడి చమురు ధరల అస్థిరత కారణంగా పెరుగుతున్న దిగుమతి వ్యయాలను దృష్టిలో ఉంచుకుని, అవసరం లేని బంగారం కొనుగోళ్లను తగ్గించాలని ప్రజలను కోరారు.

బార్, కాయిన్ పెట్టుబడుల్లో వృద్ధి

ఆభరణాల డిమాండ్ తగ్గినప్పటికీ, పెట్టుబడి విభాగంలో బంగారానికి ఆదరణ కొనసాగింది. బంగారు బార్లు, నాణేల డిమాండ్ ఏడాది ప్రాతిపదికన 9 శాతం పెరిగి 50.3 టన్నులకు చేరుకుంది.

అలాగే భారత గోల్డ్ ఈటీఎఫ్‌లలో 4.2 టన్నుల నికర పెట్టుబడులు వచ్చాయి. అంతర్జాతీయంగా ఈటీఎఫ్‌ల నుంచి పెట్టుబడులు బయటకు వెళ్లినప్పటికీ భారత్‌లో గోల్డ్ ఈటీఎఫ్‌లపై ఆసక్తి కొనసాగింది.

అక్రమ బంగారం మార్కెట్‌పై ఆందోళన

కస్టమ్స్ సుంకాల పెంపు నేపథ్యంలో అక్రమ బంగారం రవాణా (స్మగ్లింగ్), గ్రే మార్కెట్ పెరుగుదలపై ఆందోళన ఉందని సచిన్ జైన్ తెలిపారు.

అక్రమంగా వచ్చిన బంగారం మార్కెట్లోకి ప్రవేశించడం పరిశ్రమకు అతిపెద్ద సవాలుగా మారే అవకాశం ఉందని, దీనిపై రాబోయే త్రైమాసికాల్లో పర్యవేక్షణ కొనసాగిస్తామని ఆయన పేర్కొన్నారు.

అనిశ్చిత ఆర్థిక పరిస్థితుల్లో బంగారం సంపదను కాపాడే సాధనంగానే కాకుండా, పెట్టుబడుల వైవిధ్యీకరణకు ఉపయోగపడే వ్యూహాత్మక ఆస్తిగా కూడా ప్రజల ఆదరణ పొందుతోందని WGC తెలిపింది.