E20 Petrol: E20 పెట్రోల్‌తో వెహికల్ ఇంజిన్‌కు ఎలాంటి ముప్పు లేదు..కేంద్ర ప్రభుత్వం స్పష్టీకరణ!

E20 (20% ఇథనాల్ మిశ్రమం) పెట్రోల్ వాడకం వల్ల వాహనాల ఇంజిన్లు త్వరగా పాడవుతాయన్న ఆందోళనలను కేంద్ర ప్రభుత్వం తోసిపుచ్చింది. అధిక ఇథనాల్ మిశ్రమాలతో నడుస్తున్న లక్షలాది పాత వాహనాల డేటాను మరియు వాస్తవ పరిస్థితులను పరిశీలించిన తర్వాత.. ఇంజిన్ తుప్పు పట్టడం, అసాధారణ అరుగుదల లేదా వాహన జీవితకాలం తగ్గడం లాంటి ముప్పు ఉన్నట్లు ఎలాంటి ఆధారాలు లభించలేదని సోమవారం స్పష్టం చేసింది.

రాజ్యసభలో సభ్యులు అడిగిన ఒక ప్రశ్నకు పెట్రోలియం, సహజ వాయువుల శాఖ సహాయ మంత్రి సురేష్ గోపి ఈ మేరకు లిఖితపూర్వక సమాధానం ఇచ్చారు. E10 ఇంధనంతో పోలిస్తే E20 పెట్రోల్ పర్యావరణానికి మరియు వాహన పనితీరుకు ఎంతో మేలు చేస్తుందని ఆయన సభకు వివరించారు.

E20 పెట్రోల్ వల్ల కలిగే ప్రధాన ప్రయోజనాలు:

మెరుగైన పనితీరు: E10తో పోలిస్తే E20 పెట్రోల్ వాహనాలకు మెరుగైన వేగాన్ని (Acceleration), సాఫీగా సాగే ప్రయాణ నాణ్యతను అందిస్తుంది.

తగ్గనున్న కాలుష్యం: దీని వినియోగం వల్ల కార్బన్ ఉద్గారాలు ఏకంగా 30 శాతం వరకు తగ్గుతాయి.

గాలి నాణ్యత: ఇథనాల్ మిశ్రమం వల్ల ఇంధనం సంపూర్ణంగా మరియు శుభ్రంగా మండుతుంది (Clean Combustion). దీనివల్ల కణ పదార్థ ఉద్గారాలు దాదాపు సున్నాకు పడిపోయి, పట్టణాల్లో గాలి నాణ్యత గణనీయంగా మెరుగుపడుతుంది.

విస్తృత అధ్యయనం తర్వాతే వినియోగంలోకి..

E20 ఇంధనాన్ని మార్కెట్లోకి విడుదల చేయడానికి ముందు కేంద్రం అన్ని రకాల భద్రతా చర్యలు తీసుకున్నట్లు వెల్లడించింది. దేశంలోని ప్రముఖ ఆటోమొబైల్ సంస్థలు, ARAI, SIAM, ఇండియన్ ఆయిల్ కార్పొరేషన్, మరియు IIP తదితర సంస్థలు దీనిపై విస్తృతమైన ప్రయోగశాల, క్షేత్రస్థాయి పరీక్షలు నిర్వహించాయి.

ఇంజిన్ మన్నిక, డ్రైవబిలిటీ, స్టార్టబిలిటీ, తుప్పు నిరోధకత, ఉద్గారాలు మరియు ఇంధన సామర్థ్యాన్ని పూర్తిగా మూల్యాంకనం చేసిన తర్వాతే నిర్దేశిత ప్రమాణాల ప్రకారం E20 వాడకానికి పూర్తిగా సురక్షితమని ధృవీకరించినట్లు కేంద్రం తన సమాధానంలో స్పష్టం చేసింది.