EPF: EPF అకౌంట్‌లో పుట్టిన తేదీ తప్పుగా ఉందా? ఇంట్లో ఉండే మార్చుకోవ‌చ్చు

EPF Account Update: మీ పీఎఫ్ ఖాతాలో పుట్టిన తేదీ తప్పుగా నమోదైందా? పేరు లేదా ఇతర వ్యక్తిగత వివరాల్లో ఏమైనా పొరపాట్లు ఉన్నాయా?

Mokshith
Published on: 16 Nov 2026 4:17 PM IST
EPF
X

EPF: EPF అకౌంట్‌లో పుట్టిన తేదీ తప్పుగా ఉందా? ఇంట్లో ఉండే మార్చుకోవ‌చ్చు

EPF Account Update: మీ పీఎఫ్ ఖాతాలో పుట్టిన తేదీ తప్పుగా నమోదైందా? పేరు లేదా ఇతర వ్యక్తిగత వివరాల్లో ఏమైనా పొరపాట్లు ఉన్నాయా? అయితే వాటిని సరిచేసుకోవడానికి ఇకపై EPFO కార్యాలయాల చుట్టూ తిరగాల్సిన అవసరం లేకుండా ఇంట్లో ఉండే స‌రిచేసుకోవ‌చ్చు.

EPF వివరాలను ఆన్‌లైన్‌లో సరిచేసుకునే అవకాశం

చాలామంది ఉద్యోగుల పీఎఫ్ ఖాతాల్లో పేరు, పుట్టిన తేదీ వంటి వివరాలు తప్పుగా నమోదవుతుంటాయి. ఇలాంటి చిన్న పొరపాట్ల వల్ల భవిష్యత్తులో పీఎఫ్ డబ్బుల విత్‌డ్రా, ఖాతా బదిలీ, ఇతర సేవలు పొందే సమయంలో ఇబ్బందులు ఎదురయ్యే అవకాశం ఉంది. ఈ సమస్యలను దృష్టిలో పెట్టుకుని EPFO ఆన్‌లైన్‌లో వివరాల సవరణకు అవకాశం కల్పించింది. జాయింట్ డిక్లరేషన్ ఫీచర్ ద్వారా ఉద్యోగులు తమ వ్యక్తిగత వివరాలతో పాటు ఉద్యోగానికి సంబంధించిన కొన్ని సమాచారంలోనూ మార్పుల కోసం దరఖాస్తు చేసుకోవచ్చు. ఇందుకోసం EPFO అధికారిక మెంబర్ పోర్టల్‌ను సందర్శిస్తే సరిపోతుంది. ఈ సదుపాయంతో కార్యాలయాలకు వెళ్లే అవసరం తగ్గడంతో పాటు సమయం కూడా ఆదా అవుతుంది.

EPF ఖాతాలో పుట్టిన తేదీని ఎలా మార్చుకోవాలి?

మీ పీఎఫ్ ఖాతాలో పుట్టిన తేదీ తప్పుగా ఉంటే ఆన్‌లైన్‌లో ఈ విధంగా సవరణ కోసం దరఖాస్తు చేసుకోవచ్చు.

స్టెప్ 1: ముందుగా EPFO అధికారిక మెంబర్ పోర్టల్‌ను ఓపెన్ చేయాలి. మీ UAN (Universal Account Number), పాస్‌వర్డ్ ఉపయోగించి ఖాతాలోకి లాగిన్ అవ్వాలి.

స్టెప్ 2: లాగిన్ అయిన తర్వాత జాయింట్ డిక్లరేషన్ (Joint Declaration) ఆప్షన్‌ను ఎంచుకోవాలి.

స్టెప్ 3: అక్కడ కనిపించే వివరాల్లో మీరు మార్చాలనుకుంటున్న అంశాన్ని ఎంచుకోవాలి. పుట్టిన తేదీ తప్పుగా ఉంటే Date of Birth ఆప్షన్‌పై క్లిక్ చేయాలి. పేరు లేదా ఇతర వివరాల్లో పొరపాటు ఉంటే సంబంధిత ఆప్షన్‌ను ఎంచుకోవాలి.

సరైన వివరాలు నమోదు చేసి డాక్యుమెంట్లు అప్‌లోడ్ చేయాలి

సవరణ కోసం సంబంధిత ఆప్షన్‌ను ఎంచుకున్న తర్వాత మీ అసలు వివరాలను నమోదు చేయాలి. ఉదాహరణకు పుట్టిన తేదీ మార్చాలనుకుంటే సరైన తేదీని ఎంటర్ చేయాలి. అనంతరం పుట్టిన తేదీకి ఆధారంగా అవసరమైన పత్రాలను అప్‌లోడ్ చేయాలి. మీరు నమోదు చేసిన వివరాలు, అప్‌లోడ్ చేసిన డాక్యుమెంట్లలోని సమాచారం ఒకేలా ఉండాలి. ఏదైనా తేడా ఉంటే దరఖాస్తు పరిశీలనలో సమస్యలు ఎదురయ్యే అవకాశం ఉంది. కాబట్టి వివరాలను జాగ్రత్తగా నమోదు చేయాలి. అవసరమైన పత్రాలు స్పష్టంగా కనిపించేలా అప్‌లోడ్ చేయడం మంచిది.

దరఖాస్తును సబ్మిట్ చేస్తే సరిపోతుంది

అన్ని వివరాలు నమోదు చేసిన తర్వాత మరోసారి వాటిని పరిశీలించాలి. ఎలాంటి తప్పులు లేకపోతే దరఖాస్తును సబ్మిట్ చేయాలి. అనంతరం మీ అభ్యర్థన సంబంధిత అధికారుల పరిశీలనకు వెళ్తుంది. వారు వివరాలు, సమర్పించిన ఆధారాలను తనిఖీ చేసిన తర్వాత తదుపరి చర్యలు తీసుకుంటారు. ఈ విధంగా EPFO మెంబర్ పోర్టల్‌లోని జాయింట్ డిక్లరేషన్ సదుపాయాన్ని ఉపయోగించి పుట్టిన తేదీ, పేరు సహా అనుమతించిన ఇతర వివరాల్లో మార్పుల కోసం ఇంటి నుంచే దరఖాస్తు చేసుకోవచ్చు. అయితే దరఖాస్తు సమర్పించినంత మాత్రాన వివరాలు వెంటనే మారవు. EPFO పరిశీలన, ఆమోదం తర్వాతే ఖాతాలో మార్పులు అమలవుతాయి.

Mokshith

Mokshith

2015లో జ‌ర్న‌లిజం స్కూల్ ద్వారా నా కెరీర్‌ను ప్రారంభించాను. అనంత‌రం 2016 నుంచి ప‌లు మీడియా సంస్థ‌ల్లో ప‌నిచేశాను. మొద‌ట ప్రింట్ ఆ త‌ర్వాత డిజిట‌ల్‌లో క‌లిపి మొత్తం 10 ఏళ్ల అనుభ‌వం ఉంది. నేను ఎక్కువ‌గా లైఫ్‌స్టైల్‌, అంత‌ర్జాతీయం, టెక్నాల‌జీ, బిజినెస్‌, ఆస్ట్రాల‌జీకి సంబంధించి వార్త‌లు రాస్తుంటాను.