EPFO: ఇక‌పై నేరుగా బ్యాంక్ అకౌంట్‌లోకి పీఎఫ్ డ‌బ్బులు.. EPFO కీల‌క నిర్ణ‌యం

EPFO: దేశవ్యాప్తంగా కోట్లాది మంది ఉద్యోగులకు ఊరటనిచ్చే కీలక నిర్ణయాల దిశగా ఈపీఎఫ్ఓ ముందడుగు వేస్తోంది. ఉద్యోగులు తమ పీఎఫ్ డబ్బులను సులభంగా, వేగంగా పొందేందుకు కొత్త విధానాన్ని అమలు చేయడానికి సంస్థ సన్నాహాలు చేస్తోంది. ఈ మార్పులు అమల్లోకి వస్తే క్లెయిమ్ ప్రాసెస్ వేగవంతం కావడంతో పాటు ఉద్యోగుల ఇబ్బందులు కూడా గణనీయంగా తగ్గే అవకాశం ఉంది.

ఆటో సెటిల్‌మెంట్ సిస్టమ్‌తో వేగంగా PF చెల్లింపులు

ప్రస్తుతం పీఎఫ్ ఉపసంహరణ కోసం సభ్యులు అనేక ధృవీకరణ దశలు పూర్తి చేయాల్సి వస్తోంది. బ్యాంక్ ఖాతా ధృవీకరణ, KYC, ఉద్యోగ వివరాల పరిశీలన వంటి ప్రక్రియల వల్ల క్లెయిమ్‌ల పరిష్కారం ఆలస్యం అవుతోంది.

ఇప్పుడు ఈ సమస్యకు పరిష్కారంగా EPFO ఆటో సెటిల్‌మెంట్ విధానాన్ని విస్తరించేందుకు సిద్ధమవుతోంది. సభ్యుల వివరాలు ముందుగానే సరిగ్గా అప్‌డేట్ అయి ఉంటే, క్లెయిమ్ ఆటోమెటిక్‌గా ప్రాసెస్ అయ్యే విధంగా కొత్త వ్యవస్థ పనిచేయనుంది. దీంతో పీఎఫ్ మొత్తం నేరుగా సభ్యుల బ్యాంక్ ఖాతాల్లో త్వరగా జమయ్యే అవకాశం ఉంటుంది.

ఇప్పటికే అమల్లో ఉన్న ఫాస్ట్ క్లెయిమ్ విధానం

ఇప్పటికే కొన్ని పాక్షిక పీఎఫ్ ఉపసంహరణల కోసం ఆటోమేటెడ్ క్లెయిమ్ విధానాన్ని EPFO అమలు చేస్తోంది. ఈ విధానంలో కొన్ని క్లెయిమ్‌లు మూడు రోజుల్లోనే పరిష్కారమవుతున్నాయి. ఇప్పుడు అదే సిస్టమ్‌ను పూర్తి PF ఉపసంహరణలకు కూడా తీసుకురావాలని సంస్థ యోచిస్తోంది. ఈ నిర్ణయం అమల్లోకి వస్తే దేశవ్యాప్తంగా 7 కోట్లకు పైగా EPFO సభ్యులకు ప్రయోజనం కలగొచ్చని అంచనా వేస్తున్నారు. ఇది ఉద్యోగులకు సమయాన్ని ఆదా చేయడంతో పాటు, కార్యాలయాల చుట్టూ తిరిగే అవసరాన్ని కూడా తగ్గించనుంది.

PF ట్రాన్స్‌ఫర్ ప్రక్రియలో కూడా భారీ మార్పులు

ఉద్యోగం మారినప్పుడు ప్రస్తుతం PF ట్రాన్స్‌ఫర్ కోసం ప్రత్యేకంగా దరఖాస్తు చేయాల్సి వస్తోంది. చాలా మందికి ఈ ప్రక్రియ క్లిష్టంగా మారుతోంది. కొత్త విధానంలో అయితే UANకు అనుసంధానమైన కొత్త కంపెనీ ఖాతాకు PF మొత్తం ఆటోమేటిక్‌గా బదిలీ అయ్యే అవకాశం ఉంది. దీనివల్ల ఉద్యోగులు మాన్యువల్ ప్రాసెస్ చేయాల్సిన అవసరం తగ్గుతుంది. అంతేకాకుండా కొన్ని సందర్భాల్లో యాజమాన్య ఆమోదంపై ఆధారపడే పరిస్థితులు కూడా తగ్గవచ్చని సమాచారం.

సభ్యులు తప్పనిసరిగా చేయాల్సిన పనులు ఇవే

కొత్త సదుపాయాలను వేగంగా పొందాలంటే సభ్యులు తమ వివరాలను పూర్తిగా సరిచేసుకోవాలని EPFO సూచిస్తోంది. ముఖ్యంగా UAN యాక్టివ్‌గా ఉండాలి, ఆధార్‌, పాన్‌, బ్యాంక్ ఖాతా వివరాలు లింక్ అయి ఉండాలి. మొబైల్ నంబర్ ఆధార్‌తో లింక్ అవ్వాలి అలాగే.. KYC వివరాలు పూర్తి చేయాల్సి ఉంటుంది. ఈ వివరాలు సరిగా ఉంటే భవిష్యత్తులో PF క్లెయిమ్‌లు మరింత వేగంగా ప్రాసెస్ అయ్యే అవకాశం ఉంది. కొత్త వ్యవస్థ ద్వారా ఉద్యోగులపై డాక్యుమెంట్స్ భారం తగ్గడమే కాకుండా, పొరపాట్లతో పాటు క్లెయిమ్ రిజ‌క్ష‌న్స్‌ కూడా తగ్గుతాయని నిపుణులు భావిస్తున్నారు.