EPFO: పీఎఫ్ డబ్బులు విత్‌డ్రా చేయడం ఇక మరింత సులభం.. 48 గంటల్లోనే అకౌంట్‌లోకి

EPFO: ఉద్యోగుల భవిష్య నిధి సంస్థ (EPFO) పీఎఫ్ ఖాతాదారులకు గుడ్ న్యూస్ చెప్పింది. ఇప్పటి వరకు పీఎఫ్ డబ్బులు తీసుకోవడానికి రోజులు, కొన్నిసార్లు వారాల పాటు వేచి చూడాల్సి వచ్చేది. కానీ ఇప్పుడు 48 గంటల్లోనే పీఎఫ్ మొత్తం నేరుగా బ్యాంక్ ఖాతాలో జమయ్యేలా కొత్త విధానాన్ని అమలు చేస్తోంది.

90 శాతం పీఎఫ్ క్లెయిమ్‌లు ఆటో సెటిల్‌మెంట్‌తోనే ఆమోదం

ఈపీఎఫ్‌వో సీనియర్ అధికారి రమేష్ కృష్ణమూర్తి తెలిపిన వివరాల ప్రకారం ప్రస్తుతం సంస్థలో పాత పెండింగ్ క్లెయిమ్‌లు దాదాపు లేవు. కొత్తగా తీసుకొచ్చిన ఆటో సెటిల్‌మెంట్ విధానం వల్ల సుమారు 90 శాతం పీఎఫ్ క్లెయిమ్‌లు ఎలాంటి మానవ జోక్యం లేకుండానే ఆటోమేటిక్‌గా ఆమోదం పొందుతున్నాయి. అనారోగ్యం, వివాహం, ఇంటి నిర్మాణం లేదా ఇతర అత్యవసర అవసరాల కోసం పీఎఫ్ డబ్బులు కావాలంటే ఆన్‌లైన్‌లో దరఖాస్తు చేసిన తర్వాత అదే రోజు లేదా గరిష్ఠంగా 48 గంటల్లో డబ్బులు ఖాతాలో జమయ్యే అవకాశం ఉందని అధికారులు చెబుతున్నారు.

త్వరలో BHIM యాప్ ద్వారా UPI ఖాతాలోనే పీఎఫ్ డబ్బులు

ఈపీఎఫ్‌వో తన సేవలను మరింత ఆధునికంగా మార్చేందుకు మరో కీలక నిర్ణయం తీసుకుంది. త్వరలో BHIM (భీమ్) యాప్ ద్వారా కూడా పీఎఫ్ క్లెయిమ్ మొత్తాన్ని నేరుగా బదిలీ చేసే సదుపాయం అందుబాటులోకి రానుంది.

దీంతో మీ UPIకి అనుసంధానమైన బ్యాంక్ ఖాతాలోనే పీఎఫ్ డబ్బులు నేరుగా జమ అవుతాయి. ఈ కొత్త విధానం వచ్చే నెలలో పూర్తిస్థాయిలో అమల్లోకి వచ్చే అవకాశముందని అధికారులు వెల్లడించారు. దీని వల్ల డబ్బుల బదిలీ మరింత వేగంగా, పారదర్శకంగా జరుగుతుంది.

డెలివరీ బాయ్స్‌, దినసరి కూలీలకు కూడా సామాజిక భద్రత

ఇప్పటి వరకు పీఎఫ్, సామాజిక భద్రతా పథకాలు ప్రధానంగా కంపెనీల్లో పనిచేసే ఉద్యోగులకే పరిమితమయ్యాయి. అయితే కేంద్ర ప్రభుత్వం ఇప్పుడు ఈ-కామర్స్ కంపెనీల్లో పనిచేసే డెలివరీ బాయ్స్‌, గిగ్ వర్కర్లు, అసంఘటిత రంగానికి చెందిన దినసరి కూలీలను కూడా ఈ భద్రతా వ్యవస్థలోకి తీసుకురావాలని ప్రణాళిక రూపొందిస్తోంది.

దీనికి సంబంధించిన కొత్త బిల్లులో ప్రత్యేక నిబంధనలు చేర్చే అవకాశం ఉంది. ప్రభుత్వం అధికారికంగా ప్రకటించిన తర్వాత లక్షలాది మంది గిగ్ వర్కర్లు, దినసరి కూలీలకు కూడా భవిష్యత్తులో సామాజిక భద్రత కల్పించే మార్గం సుగమం కానుంది.

పీఎఫ్ వడ్డీ రేటుపై తాజా సమాచారం

పీఎఫ్ వడ్డీ రేటును పెంచే అంశంపై ప్రస్తుతం ఎలాంటి నిర్ణయం తీసుకోలేదని ఈపీఎఫ్‌వో అధికారులు స్పష్టం చేశారు. ప్రస్తుతం ఉద్యోగుల పీఎఫ్ డిపాజిట్లపై 8.25 శాతం వార్షిక వడ్డీ కొనసాగుతోంది. ఇటీవల ఈపీఎఫ్‌వో దేశవ్యాప్తంగా 34 కోట్లకు పైగా ఖాతాల్లో సుమారు రూ.1.44 లక్షల కోట్ల వడ్డీని జమ చేసింది. క్లెయిమ్ ప్రక్రియను మరింత సులభతరం చేసి, ఉద్యోగులు, సంస్థల నమ్మకాన్ని మరింత పెంచడమే తమ లక్ష్యమని ఈపీఎఫ్‌వో తెలిపింది.

పీఎఫ్ ఖాతాదారులు గుర్తుంచుకోవాల్సిన విషయాలు

ఆన్‌లైన్ క్లెయిమ్ చేస్తే గరిష్ఠంగా 48 గంటల్లో డబ్బులు ఖాతాలో జమయ్యే అవకాశం ఉంది. సుమారు 90 శాతం క్లెయిమ్‌లు ఆటో సెటిల్‌మెంట్ ద్వారా ఆమోదం పొందుతున్నాయి. త్వరలో BHIM-UPI ద్వారా నేరుగా పీఎఫ్ డబ్బులు అందే సదుపాయం ప్రారంభం కానుంది. ప్రస్తుతం పీఎఫ్‌పై 8.25 శాతం వడ్డీ కొనసాగుతోంది. భవిష్యత్తులో గిగ్ వర్కర్లు, డెలివరీ సిబ్బందికి కూడా సామాజిక భద్రత కల్పించే దిశగా ప్రభుత్వం చర్యలు చేపడుతోంది.