ప్రభుత్వ ఉద్యోగి మరణిస్తే.. కుటుంబంలో ఎవరికి పెన్షన్ వస్తుంది? పూర్తి వివరాలు తెలుసుకోండి
Family Pension Rules: ప్రభుత్వ ఉద్యోగి లేదా పెన్షనర్ మరణిస్తే కుటుంబ పెన్షన్ ఎవరికి అందుతుందనే విషయంలో చాలామందికి సందేహాలు ఉంటాయి.
ప్రభుత్వ ఉద్యోగి మరణిస్తే.. కుటుంబంలో ఎవరికి పెన్షన్ వస్తుంది? పూర్తి వివరాలు తెలుసుకోండి
Family Pension Rules: ప్రభుత్వ ఉద్యోగి లేదా పెన్షనర్ మరణిస్తే కుటుంబ పెన్షన్ ఎవరికి అందుతుందనే విషయంలో చాలామందికి సందేహాలు ఉంటాయి. అయితే ప్రభుత్వం నిర్దేశించిన అర్హతలు, నిబంధనల ప్రకారమే పెన్షన్ చెల్లిస్తారు. ఈ నేపథ్యంలో కేంద్ర ప్రభుత్వం జారీ చేసిన కీలక మార్గదర్శకాలు తెలుసుకుందాం.
భార్య లేదా భర్తకు ఆదాయ పరిమితి వర్తించదు
కేంద్ర ప్రభుత్వ ఉద్యోగి మరణించిన తర్వాత ఆయన చట్టబద్ధమైన భార్య లేదా భర్తకు ఫ్యామిలీ పెన్షన్ పొందే హక్కు ఉంటుంది. వీరికి ఎలాంటి ఆదాయ పరిమితి ఉండదని పెన్షన్ విభాగం స్పష్టం చేసింది. అంటే భార్య లేదా భర్తకు సొంతంగా ఉద్యోగం ఉన్నా, వ్యాపారం చేస్తున్నా లేదా ఇతర మార్గాల్లో ఆదాయం వస్తున్నా ఫ్యామిలీ పెన్షన్ పొందవచ్చు. వారి ఆదాయం ఎంత ఉందనే కారణంతో పెన్షన్ను నిలిపివేయడానికి వీలుండదు. అయితే, పిల్లలు లేని వితంతువు మళ్లీ వివాహం చేసుకుంటే ఈ మినహాయింపు వర్తించదు. అలాంటి సందర్భంలో ఆమెకు కూడా ఇతర అర్హులైన కుటుంబ సభ్యులకు వర్తించే ఆదాయ పరిమితి నిబంధనలే వర్తిస్తాయి.
ఇతర కుటుంబ సభ్యులకు నెలవారీ ఆదాయ పరిమితి ఎంత?
భార్య లేదా భర్త మినహా కుటుంబంలోని ఇతర అర్హులైన సభ్యులకు ఫ్యామిలీ పెన్షన్ పొందాలంటే ఆదాయ పరిమితిని పాటించాలి. సెంట్రల్ సివిల్ సర్వీసెస్ (పెన్షన్) రూల్స్, 2021లోని రూల్ 50(11) ప్రకారం ఈ పరిమితిని నిర్ణయించారు. దీని ప్రకారం అర్హులైన కుటుంబ సభ్యులకు ఫ్యామిలీ పెన్షన్ కాకుండా ఇతర మార్గాల ద్వారా వచ్చే నెలవారీ ఆదాయం రూ.9,000తో పాటు వర్తించే డియర్నెస్ రిలీఫ్ (DR) కంటే తక్కువగా ఉండాలి. ఇక్కడ ఫ్యామిలీ పెన్షన్ ద్వారా వచ్చే మొత్తాన్ని ఇతర ఆదాయంగా పరిగణించరు. అంటే ఉద్యోగం, వ్యాపారం, అద్దె లేదా ఇతర ఆదాయ మార్గాల ద్వారా వచ్చే మొత్తం ఈ పరిమితికి లోబడి ఉండాలి. ఈ నిబంధనలు అర్హులైన అవివాహిత, వితంతువు, విడాకులు తీసుకున్న కుమార్తెలు, ఆధారపడిన తల్లిదండ్రులు తదితరులకు వర్తిస్తాయి.
అయితే మానసిక లేదా శారీరక వైకల్యం ఉన్న పిల్లలు, సోదరులు, సోదరీమణులకు ప్రత్యేక ఆదాయ పరిమితి ఉంటుంది. వీరికి ఫ్యామిలీ పెన్షన్ కాకుండా ఇతర మార్గాల ద్వారా వచ్చే ఆదాయం, వారికి రావాల్సిన ఫ్యామిలీ పెన్షన్ మొత్తం కంటే తక్కువగా ఉండాలి. సాధారణంగా ఈ పెన్షన్ ఉద్యోగి చివరిగా తీసుకున్న వేతనంలో 30 శాతంతో పాటు వర్తించే డియర్నెస్ రిలీఫ్ ఆధారంగా లెక్కిస్తారు.
కుమార్తెలు, తల్లిదండ్రులు ఆర్థికంగా ఆధారపడినట్లు నిరూపించాలి
కుటుంబ సభ్యులకు ఆదాయం తక్కువగా ఉన్నంత మాత్రాన ఫ్యామిలీ పెన్షన్ మంజూరు చేయరు. కొన్ని కేటగిరీలకు చెందినవారు మరణించిన ప్రభుత్వ ఉద్యోగి లేదా పెన్షనర్పై ఆర్థికంగా ఆధారపడి ఉన్నారని కూడా నిరూపించాల్సి ఉంటుంది.
అవివాహిత కుమార్తెలు: తల్లిదండ్రులు జీవించి ఉన్న సమయంలో వారిపై ఆర్థికంగా ఆధారపడి ఉన్నట్లు నిరూపించాలి.
వితంతువు లేదా విడాకులు తీసుకున్న కుమార్తెలు: తల్లిదండ్రుల జీవనకాలంలో వారిపై ఆధారపడి ఉన్నట్లు ఆధారాలు చూపించాలి.
తల్లిదండ్రులు: ఉద్యోగి లేదా పెన్షనర్ మరణించడానికి ముందు పూర్తిగా ఆయనపై ఆధారపడి ఉన్నట్లు నిరూపించాలి.
వైకల్యం ఉన్న సోదరులు, సోదరీమణులు: ఉద్యోగి మరణానికి ముందు ఆయన ఆర్థిక సహాయంతో జీవించినట్లు ఆధారాలు సమర్పించాలి. ఈ నిబంధనల ద్వారా నిజంగా ఆర్థిక ఇబ్బందుల్లో ఉన్న కుటుంబ సభ్యులకు మాత్రమే ఫ్యామిలీ పెన్షన్ అందేలా ప్రభుత్వం మార్గదర్శకాలు రూపొందించింది.
ఆర్థిక ఆధారపడటాన్ని ఎలా నిర్ణయిస్తారు?
కుటుంబ సభ్యులు మరణించిన ఉద్యోగిపై ఆధారపడి ఉన్నారా లేదా అనే విషయాన్ని నిర్ణయించడానికి వారి ఇతర ఆదాయ వనరులను పరిశీలిస్తారు. ఇందుకోసం ప్రభుత్వం నిర్దేశించిన ఆదాయ పరిమితులనే ప్రామాణికంగా తీసుకుంటుంది. సాధారణ కుటుంబ సభ్యుల విషయంలో ఇతర మార్గాల ద్వారా వచ్చే నెలవారీ ఆదాయం రూ.9,000తో పాటు వర్తించే డియర్నెస్ రిలీఫ్ కంటే తక్కువగా ఉండాలి. వైకల్యం ఉన్న పిల్లలు, సోదరులు, సోదరీమణుల విషయంలో మాత్రం వారికి రావాల్సిన ఫ్యామిలీ పెన్షన్ మొత్తాన్ని ఆదాయ పరిమితిగా పరిగణిస్తారు.




