FD Interest Rates: ఎఫ్డీ చేసే వారికి పండ‌గే.. నాలుగు బ్యాంకుల్లో ఫిక్స్‌డ్ డిపాజిట్ వడ్డీ రేట్ల పెంపు..

FD Interest Rates: తమ పొదుపు సొమ్మును సురక్షితంగా దాచుకోవడంతో పాటు స్థిరమైన ఆదాయం పొందాలనుకునే వారికి ఫిక్స్‌డ్ డిపాజిట్ (FD) మంచి పెట్టుబడి మార్గం. ఈ నేపథ్యంలో నాలుగు ప్రముఖ బ్యాంకులు తమ FD వడ్డీ రేట్లను సవరించాయి. ఏ బ్యాంకులో ఎంత వడ్డీ లభిస్తుందో తెలుసుకుందాం.

సూర్యోదయ్ స్మాల్ ఫైనాన్స్ బ్యాంక్

ఈ నాలుగు బ్యాంకుల్లో సూర్యోదయ్ స్మాల్ ఫైనాన్స్ బ్యాంక్ అత్యధిక వడ్డీని అందిస్తోంది. 2026 అక్టోబర్ 30 నుంచి కొత్త వడ్డీ రేట్లు అమల్లోకి వచ్చాయి. ఐదేళ్ల కాలపరిమితి కలిగిన FDలపై సాధారణ ఖాతాదారులకు ఏడాదికి 8.25 శాతం వడ్డీ లభిస్తుంది. అదే సీనియర్ సిటిజన్లకు 8.60 శాతం వడ్డీ అందిస్తోంది. ఈ నాలుగు బ్యాంకులతో పోలిస్తే ఇదే అత్యధిక వడ్డీ రేటు కావడం విశేషం.

ఉత్కర్ష్ స్మాల్ ఫైనాన్స్ బ్యాంక్

ఉత్కర్ష్ స్మాల్ ఫైనాన్స్ బ్యాంక్ 2026 నవంబర్ 1 నుంచి కొత్త FD వడ్డీ రేట్లను అమలు చేస్తోంది. ఈ బ్యాంకులో 666 రోజుల కాలపరిమితి కలిగిన ఫిక్స్‌డ్ డిపాజిట్లపై సాధారణ ఖాతాదారులకు 8.10 శాతం వడ్డీ లభిస్తుంది. సీనియర్ సిటిజన్లకు గతంలో 8.25 శాతంగా ఉన్న వడ్డీ రేటును 8.50 శాతానికి పెంచింది. దీంతో వృద్ధులకు ఈ బ్యాంకు FDలు ఆకర్షణీయమైన పెట్టుబడి అవకాశంగా మారాయి.

కోటక్ మహీంద్రా బ్యాంక్

ప్రైవేట్ రంగానికి చెందిన కోటక్ మహీంద్రా బ్యాంక్ 2026 నవంబర్ 4 నుంచి సవరించిన వడ్డీ రేట్లను అమల్లోకి తీసుకొచ్చింది. రెండేళ్ల నుంచి మూడేళ్లలోపు కాలపరిమితి కలిగిన FDలపై సాధారణ ఖాతాదారులకు గతంలో 6.75 శాతం వడ్డీ ఉండగా, ప్రస్తుతం 6.80 శాతానికి పెంచింది. ఇక సీనియర్ సిటిజన్లకు గతంలో 7.25 శాతంగా ఉన్న వడ్డీని 7.55 శాతానికి పెంచింది. ముఖ్యంగా వృద్ధులకు ఈ మార్పుతో అదనపు ప్రయోజనం కలగనుంది.

యాక్సిస్ బ్యాంక్

యాక్సిస్ బ్యాంక్ కూడా 2026 అక్టోబర్ 29 నుంచి కొత్త FD వడ్డీ రేట్లను అమలు చేస్తోంది. రెండేళ్ల నుంచి పదేళ్ల కాలపరిమితి కలిగిన FDలపై సాధారణ ఖాతాదారులకు గరిష్ఠ వడ్డీ రేటును 6.50 శాతం నుంచి 6.60 శాతానికి పెంచింది. ఐదేళ్ల నుంచి పదేళ్ల కాలపరిమితి కలిగిన FDలపై సీనియర్ సిటిజన్లకు గతంలో 7.25 శాతం వడ్డీ లభించేది. తాజాగా దీనిని 7.35 శాతానికి పెంచింది.

గ‌మ‌నిక‌: FDలో పెట్టుబడి పెట్టే ముందు బ్యాంకు అందించే వడ్డీ రేటుతో పాటు డిపాజిట్ కాలపరిమితి, ముందస్తు విత్‌డ్రా నిబంధనలు, పన్ను ప్రభావం వంటి అంశాలను పరిశీలించాలి. స్మాల్ ఫైనాన్స్ బ్యాంకులలో అధిక వడ్డీ లభిస్తున్నప్పటికీ, పెట్టుబడి భద్రతకు సంబంధించిన నిబంధనలను కూడా తెలుసుకోవడం మంచిది.