Flipkart: స్విగ్గీ, జోమాటోలకు పోటీగా.. ఫ్లిప్‌కార్ట్‌లో త్వరలో ఫుడ్ డెలివరీ సర్వీసులు

Flipkart: భారతదేశంలో ఈ-కామర్స్ రంగాన్ని శాసిస్తున్న ప్రముఖ సంస్థ ఫ్లిప్‌కార్ట్ ఇప్పుడు మరో కొత్త రంగంలోకి ప్రవేశించేందుకు సన్నాహాలు చేస్తోంది. ఇప్పటికే వివిధ రకాల సేవలను అందిస్తూ దేశవ్యాప్తంగా కోట్లాది మంది వినియోగదారులను సంపాదించుకున్న ఈ సంస్థ, తాజాగా ఆన్‌లైన్ ఫుడ్ డెలివరీ మార్కెట్లోకి అడుగుపెట్టేందుకు వేగంగా ఏర్పాట్లు చేస్తోంది. ఈ విషయానికి సంబంధించి ఫ్లిప్‌కార్ట్ గ్రూప్ సీఈఓ కళ్యాణ్ కృష్ణమూర్తి అధికారికంగా కీలక ప్రకటన చేశారు. త్వరలోనే ఫుడ్ డెలివరీ రంగంలో పోటీని ఎదుర్కొనేందుకు తాము సిద్ధమవుతున్నామని ఆయన తెలిపారు.

వచ్చే 30 రోజుల్లోనే దీనికి సంబంధించిన పైలట్ ప్రాజెక్ట్ ప్రారంభం కానుందని ఫ్లిప్‌కార్ట్ గ్రూప్ సీఈఓ కళ్యాణ్ కృష్ణమూర్తి వెల్లడించారు. ప్రస్తుతం ఉన్న వ్యాపార వ్యూహాలపై ఆయన స్పందిస్తూ, సరైన విధానం, పకడ్బందీ అమలుతో ఏ సంస్థ అయినా మార్కెట్లో సులభంగా విజయం సాధిస్తుందని ఆయన పేర్కొన్నారు. దేశంలో ఫుడ్ డెలివరీ రంగం వేగంగా విస్తరిస్తోందని, ఈ నేపథ్యంలో వినియోగదారులకు మరింత మెరుగైన సేవలను అందించేందుకు ఈ నిర్ణయం తీసుకున్నట్లు ఆయన సంకేతాలు ఇచ్చారు.

కాగా, ఆర్థిక సంవత్సరం FY25లో 9 బిలియన్ డాలర్లుగా ఉన్న ఈ ఫుడ్ డెలివరీ రంగం, భవిష్యత్తులో అద్భుతమైన వృద్ధిని సాధించనుందని అంచనా వేశారు. రాబోయే కాలంలో ఈ మార్కెట్ మరింత పుంజుకుని FY30 నాటికి ఏకంగా 25 బిలియన్ డాలర్లకు చేరుకుంటుందని ఆయన అంచనా వేశారు. ఇప్పటికే ఈ రంగంలో కొన్ని దిగ్గజ కంపెనీలు ఆధిపత్యం చెలాయిస్తున్నప్పటికీ, ఫ్లిప్‌కార్ట్ ఎంట్రీతో పోటీ మరింత రసవత్తరంగా మారే అవకాశం ఉందని మార్కెట్ నిపుణులు భావిస్తున్నారు. త్వరలో ప్రారంభం కానున్న ఈ పైలట్ ప్రాజెక్ట్ ఎలాంటి ఫలితాలను ఇస్తుందో వేచి చూడాలి.