Gold Price Today : పసిడి ప్రేమికులకు పండగే.. భారీగా దిగివచ్చిన బంగారం, వెండి ధరలు

Gold Price Today : బంగారం, వెండి ఆభరణాలు కొనుగోలు చేయాలనుకునే వారికి, అలాగే పసిడిపై పెట్టుబడులు పెట్టాలని భావించే వారికి బులియన్ మార్కెట్ అద్భుతమైన శుభవార్త అందించింది. గత కొన్ని రోజులుగా అంతర్జాతీయ మార్కెట్లో చోటుచేసుకుంటున్న పరిణామాల కారణంగా దేశీయంగా బంగారం, వెండి ధరలు భారీగా పతనమవుతున్నాయి. గత నెల చివరి వారం నుంచి వరుసగా తగ్గుతూ వస్తున్న పసిడి ధరలు, క్రితం సెషన్‌లో ఒక్కరోజే రికార్డు స్థాయిలో కుప్పకూలాయి. దీంతో కస్టమర్లు ఆభరణాల షాపుల వైపు అడుగులు వేస్తున్నారు. గ్లోబల్ మార్కెట్ ప్రభావంతో భాగ్యనగరంలో పసిడి ధరలు ఒక్కసారిగా దిగివచ్చాయి. హైదరాబాద్ మార్కెట్లో క్రితం సెషన్‌లో 24 క్యారెట్ల స్వచ్ఛమైన బంగారం ధర 10 గ్రాములపై ఏకంగా రూ.3,000 మేర కుప్పకూలింది. ప్రస్తుతం ఈ భారీ పతనం తర్వాత హైదరాబాద్‌లో 24 క్యారెట్ల తులం బంగారం ధర రూ.1,52,720 వద్ద స్థిరంగా కొనసాగుతోంది. మార్కెట్ ఒడిదొడుకుల మధ్య ఈ రేటు కస్టమర్లకు పెద్ద ఊరటని ఇస్తోంది.

సాధారణంగా మహిళలు ఎక్కువగా కొనుగోలు చేసే 22 క్యారెట్ల ఆభరణాల బంగారం ధర కూడా భారీగానే తగ్గింది. హైదరాబాద్ బులియన్ మార్కెట్ తాజా అప్‌డేట్ ప్రకారం, ప్రస్తుతం 22 క్యారెట్ల తులం బంగారం ధర రూ.1,39,990 మార్క్ వద్ద ట్రేడవుతోంది. అంతర్జాతీయంగా స్పాట్ గోల్డ్ ధరలు అనూహ్యంగా పడిపోవడమే దేశీయంగా ఈ స్థాయి రేట్లు తగ్గడానికి ప్రధాన కారణమని మార్కెట్‌ విశ్లేషకులు అభిప్రాయపడుతున్నారు.

బంగారంతో పోటీ పడుతూ వెండి ధరలు కూడా భారీగా కిందకు దిగివచ్చాయి. హైదరాబాద్ మార్కెట్లో కిలో వెండి ధర కేవలం ఒక్కరోజులోనే ఏకంగా రూ.20,000 మేర క్షీణించి అందరినీ ఆశ్చర్యపరిచింది. అంతకుముందు రెండు రోజుల్లో కూడా రోజుకు రూ.5,000 చొప్పున ధరలు తగ్గుతూ వచ్చాయి. ఈ భారీ పతనం తర్వాత ప్రస్తుతం హైదరాబాద్‌లో కిలో వెండి ధర రూ.2,69,900 మార్క్ వద్ద స్థిరంగా కొనసాగుతోంది. అంతర్జాతీయంగా స్పాట్ సిల్వర్ రేట్లు పడిపోవడమే ఇందుకు కారణమైంది.

బులియన్ నిపుణుల విశ్లేషణ ప్రకారం... అంతర్జాతీయంగా చోటుచేసుకుంటున్న ఆర్థిక మార్పుల వల్ల రానున్న రోజుల్లో కూడా ధరల్లో మరికొంత మార్పు ఉండే అవకాశం ఉంది. అయితే, గత కొన్ని నెలలతో పోలిస్తే ప్రస్తుతం ధరలు భారీగా తగ్గినందున, పెళ్లిళ్ల సీజన్ కొరకు నగలు చేయించుకోవాలనుకునే వారికి, అలాగే లాంగ్ టర్మ్ ఇన్వెస్ట్‌మెంట్ ప్లాన్ చేసే వారికి ఇది అత్యంత అనుకూలమైన సమయమని మార్కెట్ వర్గాలు సూచిస్తున్నాయి.