Gold: గ్లోబల్ మార్కెట్ల మద్దతు.. 10 గ్రాముల బంగారం రూ. 1.46 లక్షలకు జంప్!

Gold Futures: విదేశీ మార్కెట్లలో వ్యక్తమవుతున్న భారీ ర్యాలీ, విలువైన లోహాలకు అంతర్జాతీయంగా పెరిగిన డిమాండ్ కారణంగా గోల్డ్ ఫ్యూచర్స్ ధరలు వరుసగా రెండో సెషన్‌లోనూ దూసుకెళ్లాయి. కామోడిటీ మార్కెట్‌లో బంగారం ధర రూ. 2,165 మేర పెరిగి, 10 గ్రాములకు రూ. 1.46 లక్షల మైలురాయిని దాటింది.

మల్టీ కమోడిటీ ఎక్స్ఛేంజ్ (MCX)లో అక్టోబర్ కాంట్రాక్ట్ బంగారం ధర 1.5 శాతం (రూ. 2,165) పెరుగుదలతో 10 గ్రాములకు రూ. 1,46,464 వద్ద ట్రేడ్ అయింది. "తాజాగా తలెత్తిన భౌగోళిక రాజకీయ అనిశ్చితులు మరియు బలహీనపడిన యూఎస్ డాలర్ కారణంగా పెట్టుబడిదారులు సురక్షితమైన పెట్టుబడిగా భావించే బంగారం వైపు మొగ్గు చూపుతున్నారు. ఫలితంగా బుధవారం కూడా బంగారం తమ లాభాల పరంపరను కొనసాగించింది" అని లెమన్ మార్కెట్స్ డెస్క్ రీసెర్చ్ హెడ్ గౌరవ్ గార్గ్ వివరించారు.

ఆర్‌బిఐ రెపో రేటు యథాతథం:

మరోవైపు, ఇంధన ధరల ద్రవ్యోల్బణ ప్రభావంపై స్పష్టత వచ్చే వరకు రిజర్వ్ బ్యాంక్ ఆఫ్ ఇండియా (RBI) తన బెంచ్‌మార్క్ రెపో రేటును వరుసగా నాలుగోసారి 5.25 శాతంగానే యథాతథంగా కొనసాగించాలని నిర్ణయించింది. ఆర్‌బిఐ తీసుకున్న ఈ నిర్ణయం ప్రస్తుత ఆర్థిక పరిస్థితులకు సమతుల్యంగా ఉందని క్యాపిటల్‌ఎక్స్‌బి సహ వ్యవస్థాపకుడు, ఎగ్జిక్యూటివ్ డైరెక్టర్ అజితాభ్ భారతి అభిప్రాయపడ్డారు.

అంతర్జాతీయంగా కొనసాగుతున్న అమెరికా-ఇరాన్ ఉద్రిక్తతలు ప్రపంచ ద్రవ్యోల్బణంపై ప్రభావం చూపుతున్నప్పటికీ, ఆర్‌బిఐ ఒకవైపు ద్రవ్యోల్బణాన్ని పర్యవేక్షిస్తూనే దేశీయ ఆర్థిక వృద్ధికి మద్దతు ఇచ్చేలా చర్యలు తీసుకుంటుందని విశ్లేషకులు భావిస్తున్నారు.