Gold Loan: తులం బంగారంపై ఎంత గోల్డ్ లోన్ వ‌స్తుందో తెలుసా.?

Gold Loan: ఇటీవలి కాలంలో గోల్డ్ లోన్లకు డిమాండ్ గణనీయంగా పెరిగింది. అయితే ఎంత బంగారంపై ఎంత రుణం వస్తుంది? ఏ సంస్థను ఎంచుకోవాలి? తిరిగి చెల్లింపు విధానం ఎలా ఉంటుంది? వంటి విషయాలు ముందుగానే తెలుసుకోవడం అవసరం.

10 గ్రాముల బంగారంపై ఎంత రుణం పొందవచ్చు?

బంగారు రుణం మొత్తం మీ ఆభరణం బరువు, స్వచ్ఛత, ప్రస్తుత మార్కెట్ ధరపై ఆధారపడి ఉంటుంది. సాధారణంగా బ్యాంకులు బంగారం విలువలో 75 శాతం వరకు మాత్రమే రుణం మంజూరు చేస్తాయి.

ఉదాహరణకు 10 గ్రాముల బంగారం మార్కెట్ విలువ రూ.1.5 లక్షగా ఉంటే, బ్యాంకుల ద్వారా సుమారు లక్ష వ‌ర‌కు వరకు రుణం పొందే అవకాశం ఉంటుంది. కొన్ని నాన్-బ్యాంకింగ్ ఫైనాన్స్ సంస్థలు (NBFCలు) అధిక లోన్-టు-వాల్యూ నిష్పత్తితో 80 నుంచి 85 శాతం వరకు కూడా రుణాలు అందిస్తుంటాయి. దీంతో రుణ మొత్తం పెరిగే అవకాశం ఉంటుంది.

బ్యాంకులు, ఫైనాన్స్ సంస్థల్లో తేడా ఏమిటి?

ప్రభుత్వ రంగ బ్యాంకులు సాధారణంగా తక్కువ వడ్డీ రేట్లతో గోల్డ్ లోన్లు అందిస్తాయి. అందువల్ల దీర్ఘకాలికంగా వడ్డీ భారం తగ్గుతుంది. ప్రైవేట్ బ్యాంకులు కొంత ఎక్కువ వడ్డీ వసూలు చేసినా, సేవలు వేగంగా అందిస్తాయి.

అదే సమయంలో ముత్తూట్, మనప్పురం వంటి NBFCలు తక్కువ సమయంలో రుణం మంజూరు చేస్తాయి. డాక్యుమెంటేషన్ కూడా చాలా సులభంగా ఉంటుంది. అయితే వీటి వడ్డీ రేట్లు బ్యాంకులతో పోలిస్తే ఎక్కువగా ఉండే అవకాశం ఉంది. కాబట్టి రుణం తీసుకునే ముందు వడ్డీ రేట్లు, ఛార్జీలను తప్పనిసరిగా పోల్చి చూడాలి.

గోల్డ్ లోన్ చెల్లించడానికి ఉన్న ఎంపికలు

గోల్డ్ లోన్ తీసుకున్న తర్వాత తిరిగి చెల్లించేందుకు వివిధ విధానాలు అందుబాటులో ఉంటాయి. నెలవారీ EMIల రూపంలో అసలు, వడ్డీ చెల్లించే పద్ధతి ఒకటి. మరికొందరు కేవలం వడ్డీని మాత్రమే చెల్లిస్తూ, గడువు పూర్తయ్యాక అసలు మొత్తాన్ని ఒకేసారి చెల్లించే విధానాన్ని ఎంచుకుంటారు. కొన్ని సంస్థలు బుల్లెట్ రీపేమెంట్ సదుపాయాన్ని కూడా కల్పిస్తాయి. ఇందులో రుణ కాలం ముగిసిన తర్వాత మొత్తం బకాయిని ఒకేసారి చెల్లించవచ్చు. అలాగే ఓవర్‌డ్రాఫ్ట్ సౌకర్యం ఉన్న పథకాలలో వినియోగించిన మొత్తంపై మాత్రమే వడ్డీ చెల్లించే అవకాశం ఉంటుంది.

గోల్డ్ లోన్ ప్రయోజనాలు, ఇబ్బందులు

గోల్డ్ లోన్ ప్రధాన ప్రయోజనం వేగవంతమైన రుణ మంజూరు. చాలా సందర్భాల్లో కొన్ని గంటల్లోనే రుణం ఆమోదం పొందుతుంది. క్రెడిట్ స్కోర్ తక్కువగా ఉన్నా కూడా రుణం పొందే అవకాశం ఉంటుంది. అయితే ప్రమాదాలు కూడా ఉన్నాయి. నిర్ణీత గడువులో రుణం చెల్లించకపోతే బ్యాంకు లేదా సంస్థ మీ బంగారాన్ని వేలం వేయవచ్చు. అలాగే ఎక్కువ కాలానికి రుణం కొనసాగిస్తే వడ్డీ భారం పెరుగుతుంది. కేవలం ఎక్కువ రుణం ఇస్తున్నారని అవసరానికి మించి అప్పు తీసుకోవడం కూడా ప్రమాదకరం.

గోల్డ్ లోన్ తీసుకునే ముందు గుర్తుంచుకోవాల్సిన అంశాలు

గోల్డ్ లోన్ ఎంపికలో కేవలం రుణ మొత్తం మాత్రమే కాకుండా వడ్డీ రేట్లు, ప్రాసెసింగ్ ఫీజులు, జరిమానా ఛార్జీలు, రీపేమెంట్ నిబంధనలను కూడా పరిశీలించాలి. తక్కువ వడ్డీ కోరుకునేవారు ప్రభుత్వ బ్యాంకులను, అత్యవసరంగా డబ్బు అవసరమైనవారు NBFCలను పరిశీలించవచ్చు. ముఖ్యంగా మీ నెలవారీ ఆదాయానికి అనుగుణంగా రుణాన్ని ఎంచుకోవాలి.

తిరిగి చెల్లించే సామర్థ్యాన్ని అంచనా వేసుకుని మాత్రమే రుణం తీసుకోవాలి. బంగారం విలువైన ఆస్తి కాబట్టి అత్యవసర అవసరాల కోసం మాత్రమే గోల్డ్ లోన్‌ను వినియోగించడం మంచిది. సరైన ప్రణాళికతో తీసుకుంటే గోల్డ్ లోన్ ఆర్థిక ఇబ్బందుల నుంచి బయటపడేందుకు మంచి మార్గంగా ఉపయోగపడుతుంది.