Gold Price Today : పరుగులు పెడుతున్న పసిడికి బ్రేక్.. మార్కెట్లో ఒక్కసారిగా దిగివచ్చిన బంగారం, వెండి

Gold Price Today : ఇటీవలి కాలంలో ఆకాశమే హద్దుగా పరుగులు పెట్టిన బంగారం, వెండి ధరలు ప్రస్తుతానికి కాస్త శాంతించాయి. దేశీయంగా ఈ రెండు విలువైన లోహాల ధరలు క్రమంగా దిగివస్తున్నాయి. తాజాగా జూన్ 4వ తేదీన దేశంలోని ప్రధాన నగరాల్లో బంగారం, వెండి ధరలు అతి స్వల్పంగా తగ్గుముఖం పట్టాయి. అయితే ఈ ధరలు కేవలం ఉదయం 6 గంటలకు నమోదైన మార్కెట్ రేట్లు మాత్రమేనని, అంతర్జాతీయ పరిణామాలు, రూపాయి విలువ ఆధారంగా రోజులో ఈ ధరలు పెరగవచ్చు, తగ్గవచ్చు లేదా స్థిరంగా కొనసాగవచ్చని మార్కెట్ నిపుణులు చెబుతున్నారు.

తెలుగు రాష్ట్రాల్లో బంగారం ధరల వివరాలు

రెండు తెలుగు రాష్ట్రాల్లోని ప్రధాన నగరాలైన హైదరాబాద్, విజయవాడలలో పసిడి ధరలు ఒకే రకంగా కొనసాగుతున్నాయి. ఈ నగరాల్లో అత్యంత స్వచ్ఛమైన 24 క్యారెట్ల 10 గ్రాముల (తులం) బంగారం ధర రూ.1,56,210లుగా నమోదైంది. అదే సమయంలో ఆభరణాల తయారీకి ఉపయోగించే 22 క్యారెట్ల 10 గ్రాముల బంగారం ధర రూ.1,43,190ల వద్ద ట్రేడవుతోంది. పెళ్లిళ్ల సీజన్ నడుస్తున్న తరుణంలో ఈ స్వల్ప తగ్గింపు కొనుగోలుదారులకు కొంత ఊరటనిచ్చే అంశం.

మెట్రో నగరాల్లో పసిడి రేట్లు ఎలా ఉన్నాయంటే?

ఢిల్లీలో 24 క్యారెట్ల తులం బంగారం ధర రూ.1,56,360లుగా ఉండగా, 22 క్యారెట్ల ధర రూ.1,43,340ల వద్ద కొనసాగుతోంది. దేశ ఆర్థిక రాజధాని ముంబైతో పాటు ఐటీ హబ్ బెంగళూరు నగరాల్లో హైదరాబాద్ తరహాలోనే ధరలు ఉన్నాయి. అక్కడ 24 క్యారెట్ల ధర రూ.1,56,210లు, 22 క్యారెట్ల ధర రూ.1,43,190ల వద్ద ట్రేడవుతోంది. అయితే తమిళనాడు రాజధాని చెన్నైలో మాత్రం పసిడి ధరలు భగ్గుమంటున్నాయి. చెన్నైలో 24 క్యారెట్ల తులం బంగారం ఏకంగా రూ.1,58,170 పలుకుతుండగా, 22 క్యారెట్ల ధర రూ.1,44,990ల వద్ద విక్రయించబడుతోంది.

నగరాల వారీగా వెండి ధరల హెచ్చుతగ్గులు

బంగారంతో పాటు వెండి ధర కూడా స్వల్పంగా తగ్గింది. అయితే దేశవ్యాప్తంగా వెండి ధరల్లో ప్రాంతాల వారీగా తేడాలు కనిపిస్తున్నాయి. హైదరాబాద్, విజయవాడ, చెన్నై నగరాల్లో కిలో వెండి ధర రికార్డు స్థాయిలో రూ.2,89,900ల వద్ద కొనసాగుతోంది. అదే సమయంలో ఢిల్లీ, ముంబై, బెంగళూరు నగరాల్లో కిలో వెండి ధర కాస్త తక్కువగా, అంటే రూ.2,79,900ల వద్ద ట్రేడవుతోంది. దక్షిణాది నగరాల్లో వెండికి ఉన్న విపరీతమైన డిమాండ్ వల్లే ఇక్కడ ధరలు రూ.పది వేల వరకు ఎక్కువగా ఉన్నట్లు తెలుస్తోంది.

వెండి దిగుమతులపై కేంద్రం కఠిన నిర్ణయం

ఇదిలా ఉంటే, కేంద్ర ప్రభుత్వం వెండి దిగుమతుల విషయంలో సంచలన నిర్ణయం తీసుకుంది. దేశంలో వెండికి రోజురోజుకూ డిమాండ్ పెరిగిపోతుండటం, దానికి తగ్గట్లుగా దిగుమతులు భారీగా ఎక్కువవడంతో ప్రభుత్వం నిబంధనలను కఠినతరం చేసింది. కొత్త నిబంధనల ప్రకారం.. వెండి రేణువులు, పొడి, ఇతర రూపాలు, 99.9 శాతం స్వచ్ఛత కలిగిన అన్ని రకాల వెండి ఉత్పత్తులను రెస్ట్రిక్టెడ్ కేటగిరీలోకి చేర్చారు. ఇకపై వ్యాపారులు లేదా దిగుమతిదారులు వెండిని విదేశాల నుంచి తీసుకురావాలంటే డైరెక్టర్ జనరల్ ఆఫ్ ఫారిన్ ట్రేడ్ (DGFT) నుంచి ముందస్తు అనుమతి తప్పనిసరిగా పొందాల్సి ఉంటుంది.