Gold Rate Today : పసిడి ప్రియులకు షాక్.. మళ్ళీ భగ్గుమంటున్న బంగారం ధరలు..ఇప్పుడు కొనకపోతే బాదుడే

Gold Rate Today : బంగారం కొనాలనుకునే వారికి ఇది ఒక రకమైన హెచ్చరిక లాంటి వార్తే. పసిడి ధరలు తగ్గుతున్నాయన్న ప్రచారంలో నిజం లేదని, గత నెల రోజులుగా రేట్లు నిలకడగా పెరుగుతూనే ఉన్నాయని మార్కెట్ విశ్లేషణలు చెబుతున్నాయి. ప్రస్తుతం అంతర్జాతీయంగా మారుతున్న రాజకీయ సమీకరణలు, ముఖ్యంగా అమెరికా-ఇరాన్ మధ్య యుద్ధ ఉద్రిక్తతలు సద్దుమణుగుతుండటం బంగారం ధరలు మళ్ళీ ఆకాశాన్ని తాకేలా చేస్తున్నాయి. మీరు గనుక త్వరలో నగలు చేయించుకోవాలని ప్లాన్ చేస్తుంటే, ఈ మారుతున్న ట్రెండ్‌ను గమనించడం చాలా ముఖ్యం.

బంగారం ధరలు తగ్గుతున్నాయని చాలా మంది అనుకుంటున్నారు కానీ, అసలు వాస్తవం వేరేలా ఉంది. మార్చి 23వ తేదీ నుంచి పసిడి ధరల్లో వరుసగా పెరుగుదల కనిపిస్తోంది. సరిగ్గా నెల రోజుల క్రితం, అంటే మార్చి 22న 24 క్యారెట్ల బంగారం ధర రూ.1,45,970 ఉండగా, ఇప్పుడు అది రూ.1,55,290 కి చేరింది. అంటే కేవలం నెల రోజుల్లోనే రూ. 9,320 పెరిగింది. అలాగే 22 క్యారెట్ల నగల బంగారం కూడా దాదాపు రూ. 8,550 పెరగడం గమనార్హం. అంటే నెల క్రితం కొన్న వారితో పోలిస్తే, ఇప్పుడు కొనేవారు భారీగా అదనపు భారాన్ని మోయాల్సి వస్తోంది.

బంగారం ధరలు పెరగడానికి ప్రధాన కారణం అమెరికా అధ్యక్షుడు డొనాల్డ్ ట్రంప్ తీసుకున్న నిర్ణయమే. ఇరాన్‌తో దాడులను నిరవధికంగా పొడిగిస్తూ ట్రంప్ కాల్పుల విరమణ ప్రకటించారు. దీనివల్ల యుద్ధ భయాలు తగ్గాయి. గత 53 రోజులుగా సాగుతున్న యుద్ధం వల్ల అమెరికా బడ్జెట్‌పై తీవ్ర భారం పడింది, పైగా సొంత దేశంలోనూ ట్రంప్ వ్యతిరేకతను ఎదుర్కొంటున్నారు. దీంతో ఆయన యుద్ధం కంటే శాంతికే మొగ్గు చూపుతున్నారు. యుద్ధ ఉద్రిక్తతలు తగ్గితే ఇన్వెస్టర్లు సురక్షిత పెట్టుబడిగా భావించే బంగారం వైపు మళ్ళీ మళ్లుతారు. దీనివల్ల డిమాండ్ పెరిగి ధరలు భగ్గుమంటున్నాయి.

యుద్ధం మొదలైనప్పుడు చమురు కొరత ఏర్పడి డాలర్ విలువ పెరిగింది. అప్పుడు ఇన్వెస్టర్లు బంగారం నుంచి పెట్టుబడులను వెనక్కి తీసుకుని డాలర్లు, బాండ్ల వైపు వెళ్లారు. కానీ మార్చి 23 నుంచి పరిస్థితులు మారాయి. చమురు ధరలు తగ్గడం, డాలర్ విలువ క్షీణించడం మొదలవడంతో.. పెట్టుబడిదారులు మళ్ళీ స్టాక్ మార్కెట్లు, బంగారంపై పెట్టుబడులను పెంచుతున్నారు. దీనివల్ల బంగారం ధర మళ్ళీ తన పాత రికార్డులను తిరగరాసేలా కనిపిస్తోంది. మార్చి 1న ఉన్న ఆల్ టైమ్ హై రేటు (రూ.1,73,090)కి చేరుకోవడానికి ఇంకా రూ.17,800 మాత్రమే దూరంలో ఉంది.

ప్రస్తుతం ఉన్న పరిస్థితులను బట్టి చూస్తే, రాబోయే రెండు నెలల్లో బంగారం ధర మళ్ళీ ఆల్ టైమ్ హైకి చేరే అవకాశం ఉందని మార్కెట్ నిపుణులు అంచనా వేస్తున్నారు. యుద్ధం పూర్తిగా ఆగిపోయి, ట్రంప్ సంచలన నిర్ణయాలు తీసుకోకపోతే పసిడి పరుగు ఆగదు. కాబట్టి ఆల్ టైమ్ హై కంటే ఇంకా రూ.17 వేలు తక్కువగానే లభిస్తున్నందున, ఇప్పుడే కొనుగోలు చేయడం మేలని కొందరు భావిస్తున్నారు. ఏదేమైనా అంతర్జాతీయ మార్కెట్ పరిస్థితులపై అవగాహన పెంచుకుని, సొంతంగా ఆలోచించి నిర్ణయం తీసుకోవడం ఉత్తమం.