నెలకు రూ.1 లక్ష జీతం ఉంటే.. 10 ఏళ్ల తర్వాత ఎంత గ్రాట్యుటీ వస్తుందో తెలుసా?

Gratuity Calculator: ఉద్యోగులకు జీతంతో పాటు లభించే ముఖ్యమైన ప్రయోజనాల్లో గ్రాట్యుటీ కూడా ఒకటి. ఒకే సంస్థలో కొన్నేళ్లపాటు పనిచేసిన ఉద్యోగులకు కంపెనీ ఈ మొత్తాన్ని చెల్లిస్తుంది.

Mokshith
Published on: 16 Nov 2026 1:53 PM IST
Gratuity Calculator
X

 నెలకు రూ.1 లక్ష జీతం ఉంటే.. 10 ఏళ్ల తర్వాత ఎంత గ్రాట్యుటీ వస్తుందో తెలుసా?

Gratuity Calculator: ఉద్యోగులకు జీతంతో పాటు లభించే ముఖ్యమైన ప్రయోజనాల్లో గ్రాట్యుటీ కూడా ఒకటి. ఒకే సంస్థలో కొన్నేళ్లపాటు పనిచేసిన ఉద్యోగులకు కంపెనీ ఈ మొత్తాన్ని చెల్లిస్తుంది. ఉద్యోగం మానేసినప్పుడు, పదవీ విరమణ చేసినప్పుడు ఈ డబ్బు ఉపయోగపడుతుంది. అయితే ఎంత గ్రాట్యుటీ వస్తుందనేది ఎలా లెక్కిస్తారో ఇప్పుడు తెలుసుకుందాం.

గ్రాట్యుటీ ఎవరికి వస్తుంది? అర్హత నిబంధనలు ఇవే

సాధారణంగా ఒకే సంస్థలో కనీసం ఐదేళ్లపాటు నిరంతరంగా పనిచేసిన ఉద్యోగులు గ్రాట్యుటీ పొందేందుకు అర్హులు. ఉద్యోగానికి రాజీనామా చేసినప్పుడు, పదవీ విరమణ చేసినప్పుడు లేదా కొన్ని అసాధ‌ర‌ణ సమయాల్లో కంపెనీ ఈ మొత్తాన్ని చెల్లించాలి. ఉద్యోగి సంస్థలో అందించిన సేవలకు గుర్తింపుగా ఈ ప్రయోజనం అందుతుంది.

అయితే కొన్ని ప్రత్యేక సందర్భాల్లో ఐదేళ్ల సేవ నిబంధన వర్తించదు. ఉద్యోగంలో ఉండగానే ఒక వ్యక్తి మరణించినా, శాశ్వత వైకల్యానికి గురైనా ఐదేళ్లు పూర్తిచేయాల్సిన అవసరం లేదు. అలాంటి సందర్భాల్లో నిబంధనల ప్రకారం ఉద్యోగికి లేదా అతని కుటుంబ సభ్యులకు గ్రాట్యుటీ చెల్లిస్తారు.

కాంట్రాక్ట్ ఉద్యోగులకూ గ్రాట్యుటీ ప్రయోజనం

గతంలో గ్రాట్యుటీ అంటే కేవలం పర్మినెంట్ ఉద్యోగులకే లభిస్తుందనే అభిప్రాయం ఉండేది. అయితే కొత్త కార్మిక చట్టాల్లో ఫిక్స్‌డ్ టర్మ్ ఉద్యోగులకు కూడా ఈ ప్రయోజనం కల్పించే నిబంధనలు ఉన్నాయి. 2025 నవంబర్ 21 నుంచి అమల్లోకి వచ్చిన సోషల్ సెక్యూరిటీ కోడ్, 2020 ప్రకారం నిర్ణీత కాలానికి కాంట్రాక్ట్‌పై పనిచేసే ఫిక్స్‌డ్ టర్మ్ ఉద్యోగులకు ఐదేళ్ల సర్వీస్ నిబంధన లేకుండానే గ్రాట్యుటీ పొందే అవకాశం ఉంది.

వారు పనిచేసిన కాలానికి అనుగుణంగా నిష్పత్తి ప్రకారం ఈ మొత్తం లెక్కిస్తారు. అంటే కాంట్రాక్ట్ గడువు ముగిసినప్పుడు కూడా అర్హత ఉన్న ఉద్యోగులకు గ్రాట్యుటీ ప్రయోజనం లభిస్తుంది. ఈ విధానం ద్వారా తాత్కాలిక ఒప్పందాలపై పనిచేసే ఉద్యోగులకూ ఆర్థిక ప్రయోజనం చేకూరుతుంది.

గ్రాట్యుటీ లెక్కించే ఫార్ములా ఇదే

ఉద్యోగికి ఎంత గ్రాట్యుటీ వస్తుందో తెలుసుకోవడానికి ఒక నిర్దిష్ట ఫార్ములా ఉంది. ఇందులో ప్రధానంగా రెండు అంశాలను పరిగణనలోకి తీసుకుంటారు. అవి ఉద్యోగి చివరి జీతం, ఆ సంస్థలో పనిచేసిన మొత్తం సంవత్సరాలు.

ఇక్కడ చివరి జీతం అంటే బేసిక్ శాలరీతో పాటు డియర్‌నెస్ అలవెన్స్ (DA) కలిపిన మొత్తం. గ్రాట్యుటీ లెక్కించే ఫార్ములా ఇదే.

గ్రాట్యుటీ = చివరి జీతం × 15 × ఉద్యోగ సంవత్సరాలు/26

ఈ ఫార్ములాలో 15 అంటే ప్రతి ఏడాది ఉద్యోగి అందించిన సేవలకు 15 రోజుల జీతాన్ని లెక్కించడం. ఇక 26 అంటే నెలకు 26 పని దినాలను ప్రామాణికంగా తీసుకోవడం. మిగిలిన నాలుగు ఆదివారాలను ఇందులో పరిగణనలోకి తీసుకోరు.

రూ.1 లక్ష జీతం ఉంటే 10 ఏళ్లకు ఎంత వస్తుంది?

ఈ లెక్కను రెండు ఉదాహరణలతో సులభంగా అర్థం చేసుకోవచ్చు. ఒక ఉద్యోగి చివరి బేసిక్ శాలరీ, డీఏ కలిపి నెలకు రూ.1 లక్ష ఉందని అనుకుందాం. అతను ఒకే సంస్థలో 10 ఏళ్లపాటు పనిచేశాడు. అప్పుడు ఫార్ములా ప్రకారం గ్రాట్యుటీ ఇలా లెక్కిస్తారు.

రూ.1,00,000 × 15 × 10 ÷ 26 = రూ.5,76,923

అంటే సుమారు రూ.5.77 లక్షల గ్రాట్యుటీ లభిస్తుంది.

అదే చివరి జీతం రూ.50,000 ఉంటే, 10 ఏళ్ల సర్వీస్‌కు లెక్క ఇలా ఉంటుంది.

రూ.50,000 × 15 × 10 ÷ 26 = రూ.2,88,461.54

అంటే సుమారు రూ.2.88 లక్షలు గ్రాట్యుటీగా అందుతాయి.

ఈ లెక్కలు అర్హత కలిగిన ఉద్యోగులకు వర్తించే సాధారణ ఫార్ములా ఆధారంగా ఇచ్చిన అంచనాలు. వాస్తవంగా గ్రాట్యుటీ మొత్తం ఉద్యోగి అర్హత, వర్తించే చట్ట నిబంధనలు, చివరి జీతంపై ఆధారపడి ఉంటుంది.

Mokshith

Mokshith

2015లో జ‌ర్న‌లిజం స్కూల్ ద్వారా నా కెరీర్‌ను ప్రారంభించాను. అనంత‌రం 2016 నుంచి ప‌లు మీడియా సంస్థ‌ల్లో ప‌నిచేశాను. మొద‌ట ప్రింట్ ఆ త‌ర్వాత డిజిట‌ల్‌లో క‌లిపి మొత్తం 10 ఏళ్ల అనుభ‌వం ఉంది. నేను ఎక్కువ‌గా లైఫ్‌స్టైల్‌, అంత‌ర్జాతీయం, టెక్నాల‌జీ, బిజినెస్‌, ఆస్ట్రాల‌జీకి సంబంధించి వార్త‌లు రాస్తుంటాను.