GST Rules: వ్యాపారులకు భారీ ఊరట.. జీఎస్టీ నిబంధనలలో కీలక మార్పులు చేయనున్న కేంద్రం

GST Rules: వ్యాపార వర్గాలకు ఎంతో కీలకమైన జీఎస్టీ కౌన్సిల్ సమావేశం త్వరలో జరగనుంది. ఈ భేటీలో వ్యాపారులు, పన్ను చెల్లింపుదారులకు ఊరటనిచ్చేలా పలు కీలక నిబంధనలలో మార్పులు చేసే అవకాశం కనిపిస్తోంది. ముఖ్యంగా జీఎస్టీ అధికారుల వద్ద ఉన్న అరెస్ట్ అధికారాలను వెనక్కి తీసుకోవడంపై ప్రధానంగా చర్చ జరగనుంది. ఏదైనా వ్యాపార సంస్థపై చర్యలు తీసుకోవడానికి లేదా ఎవరైనా వ్యక్తిని అరెస్టు చేయడానికి కోర్టు అనుమతిని తప్పనిసరి చేయాలనే ప్రతిపాదన పరిశీలనలో ఉంది.

జైలు శిక్షల తగ్గింపు

ప్రస్తుత నిబంధనల ప్రకారం జీఎస్టీకి సంబంధించిన కొన్ని తీవ్రమైన కేసులలో కోటి రూపాయల కంటే ఎక్కువ మొత్తం ఉంటే క్రిమినల్ చర్యలు తీసుకునే అవకాశం ఉంది. అయితే ఈ పరిమితిని రూ.5 కోట్లకు పెంచాలని తాజా ప్రతిపాదనలో పేర్కొన్నారు. దీనివల్ల తక్కువ మొత్తంలో ఉన్న వివాదాలలో నేరుగా క్రిమినల్ కేసులు నమోదు కావు. అలాగే జీఎస్టీ చట్టంలో శిక్షార్హమైన నేరాలలో కూడా మార్పులు చేసి కొన్నింటికి కనీస జైలు శిక్షను తొలగించాలని యోచిస్తున్నారు. కొన్ని మధ్యస్థ స్థాయి నేరాలలో గరిష్ట జైలు శిక్షను మూడు సంవత్సరాల నుంచి రెండు సంవత్సరాలకు తగ్గించే అవకాశం ఉంది.

అరెస్ట్ నుంచి మినహాయింపు

వ్యాపారులు అలాగే పన్ను అధికారుల మధ్య వస్తువుల ధరలు, సేవల కేటగిరీలు లేదా ఇన్పుట్ టాక్స్ క్రెడిట్ విషయంలో భిన్నాభిప్రాయాలు ఉండటం సాధారణం. ఇలాంటి సాధారణ పన్ను వివాదాలను నేరంగా పరిగణించి అరెస్టులు చేయకూడదని కొత్త నిబంధనలు చెబుతున్నాయి. ఒకవేళ ఎవరైనా తక్కువ పన్ను చెల్లించినా లేదా తప్పుడు పద్ధతిలో క్రెడిట్ పొందినా ప్రభుత్వం వారి నుంచి పన్నుతో పాటు వడ్డీ, తగిన జరిమానా మాత్రమే వసూలు చేస్తుంది. డిజిటల్ సిస్టమ్ ద్వారా ట్యాక్స్ చోరీలను సులభంగా గుర్తిస్తున్నందున ప్రతి చిన్న విషయానికి అరెస్టులు చేసే పద్ధతికి స్వస్తి పలకాలని ప్రభుత్వం భావిస్తోంది.

చిన్న వ్యాపారులకు ఉపశమనం

పెద్ద వ్యాపారులతో పాటు చిన్న పన్ను చెల్లింపుదారులకు కూడా ఈ సమావేశంలో భారీ ఊరట లభించే అవకాశం ఉంది. ఆలస్య రుసుములను తగ్గించడం లేదా మాఫీ చేయడం, జరిమానాలను మరింత సరళీకరించడం వంటి అంశాలపై జీఎస్టీ కౌన్సిల్ కసరత్తు చేస్తోంది. దీనివల్ల చిన్న స్థాయి వ్యాపారాలపై పరిపాలనా భారం గణనీయంగా తగ్గుతుంది.

డిజిటలైజేషన్‌తో పారదర్శకత పెంపు

రెండు వేల పదిహేనేళ్లలో జీఎస్టీని ప్రవేశపెట్టినప్పుడు నకిలీ బిల్లులను అరికట్టడానికి అధికారులకు కఠినమైన అరెస్ట్ అధికారాలు కల్పించారు. కానీ ఇప్పుడు సిస్టమ్ పూర్తిగా డిజిటల్ రూపంలోకి మారడంతో కొనుగోళ్లు, అమ్మకాల మధ్య వ్యత్యాసాన్ని క్షణాల్లో గుర్తించడం సాధ్యమవుతోంది. అందువల్ల అనవసరమైన భయాలను తొలగించి కేవలం ఉద్దేశపూర్వక భారీ మోసాలకు మాత్రమే కఠిన చర్యలు ఉండేలా చట్టాలను మారుస్తున్నారు.