H1B Visa: అమెరికాలో ఉంటున్న ఇండియ‌న్ ఐటీ ఉద్యోగుల‌కు పండ‌గే.. ట్రంప్ ఆట‌లు సాగేలా లేవుగా

H1B Visa: అమెరికాలో ఉద్యోగాలు చేస్తున్న భారతీయ ఐటీ ఉద్యోగులకు ఊరటనిచ్చే పరిణామం చోటుచేసుకుంది. హెచ్-1బీ వీసాలపై అమెరికా అధ్యక్షుడు డొనాల్డ్ ట్రంప్ ప్రభుత్వం ప్రతిపాదించిన లక్ష డాలర్ల భారీ ఫీజు అమలుకు అమెరికా ఫెడరల్ అప్పీల్స్ కోర్టు అడ్డుకట్ట వేసింది. ఇప్పటికే ఈ రుసుమును చట్టవిరుద్ధమని పేర్కొన్న దిగువ కోర్టు తీర్పును నిలిపివేయాలన్న ప్రభుత్వ అభ్యర్థనను కోర్టు తిరస్కరించింది.

కాంగ్రెస్ అనుమతి లేకుండా నిర్ణయం తీసుకోలేరన్న కోర్టు

హెచ్-1బీ వీసాపై భారీ రుసుము విధించేందుకు అధ్యక్షుడికి స్వతంత్రంగా అధికారం లేదని అప్పీల్స్ కోర్టు స్పష్టం చేసింది. కొత్త పన్ను లేదా రుసుము విధించాలంటే అమెరికా కాంగ్రెస్ ఆమోదం తప్పనిసరిగా ఉండాలని పేర్కొంది. కాంగ్రెస్ అనుమతి లేకుండా ప్రభుత్వం ఈ నిర్ణయం తీసుకోవడం చట్టపరంగా సరైంది కాదని న్యాయస్థానం అభిప్రాయపడింది. అదేవిధంగా, దిగువ కోర్టు తీర్పును తాత్కాలికంగా నిలిపివేయకపోతే దేశ ప్రయోజనాలకు ఎలాంటి నష్టం జరుగుతుందో ప్రభుత్వం సరైన ఆధారాలతో వివరించలేకపోయిందని కూడా కోర్టు వ్యాఖ్యానించింది.

లక్ష డాలర్ల ఫీజు ప్రతిపాదన ఎలా వచ్చింది?

గత ఏడాది సెప్టెంబర్‌లో ట్రంప్ ప్రభుత్వం హెచ్-1బీ వీసాలపై భారీ మార్పులను ప్రకటించింది. కొత్తగా హెచ్-1బీ వీసా పొందే విదేశీ ఉద్యోగుల కోసం కంపెనీలు చెల్లించే ఫీజును 2,000–5,000 డాలర్ల స్థాయి నుంచి నేరుగా 1 లక్ష డాలర్లకు పెంచాలని నిర్ణయించింది. ఈ నిర్ణయం వెనుక ప్రధాన ఉద్దేశం విదేశీ ఉద్యోగులపై ఆధారపడే కంపెనీలను నిరుత్సాహపరచడం, స్థానిక అమెరికన్లకు ఎక్కువ ఉద్యోగ అవకాశాలు కల్పించడం. ముఖ్యంగా ఐటీ, టెక్నాలజీ రంగాల్లో విదేశీ నిపుణుల నియామకాలను తగ్గించాలనే లక్ష్యంతో ఈ ప్రతిపాదన తీసుకొచ్చింది. అయితే ఈ భారీ రుసుము కారణంగా అనేక సంస్థలు కొత్త హెచ్-1బీ నియామకాలపై పునరాలోచనలో ప‌డ్డాయి.

కోర్టును ఆశ్రయించిన 20 రాష్ట్రాలు

ట్రంప్ ప్రభుత్వ నిర్ణయాన్ని వ్యతిరేకిస్తూ అమెరికాలోని 20 రాష్ట్రాల అటార్నీ జనరల్స్ బోస్టన్ ఫెడరల్ కోర్టును ఆశ్రయించారు. ఈ పిటిషన్లపై విచారణ జరిపిన యూఎస్ డిస్ట్రిక్ట్ జడ్జి లియో సోరోకిన్ కీలక తీర్పు ఇచ్చారు.

కాంగ్రెస్ అనుమతి లేకుండా ఇంత భారీ రుసుము విధించడం చట్టవిరుద్ధమైన పన్నుతో సమానమని ఆయన పేర్కొన్నారు. ప్రభుత్వం దీనిని "ఫీజు"గా పేర్కొన్నప్పటికీ, వాస్తవానికి ఇది కొత్త పన్ను స్వరూపమేనని, అలాంటి నిర్ణయం తీసుకునే అధికారం కాంగ్రెస్‌కే ఉంటుందని స్పష్టం చేశారు. ఈ తీర్పును సవాలు చేస్తూ ట్రంప్ ప్రభుత్వం ఫెడరల్ అప్పీల్స్ కోర్టును ఆశ్రయించినప్పటికీ, ముగ్గురు న్యాయమూర్తులతో కూడిన బెంచ్ ప్రభుత్వ అభ్యర్థనను తిరస్కరించింది. దీంతో దిగువ కోర్టు ఇచ్చిన ఉత్తర్వులు యథాతథంగా కొనసాగుతున్నాయి.

భారతీయ ఐటీ ఉద్యోగులపై ప్రభావం ఏంటి?

ప్రతి ఏడాది అమెరికా సాధారణంగా 65 వేల హెచ్-1బీ వీసాలను మంజూరు చేస్తుంది. అదనంగా అమెరికాలో మాస్టర్స్ పూర్తి చేసిన విదేశీ విద్యార్థులకు మరో 20 వేల వీసాలు ప్రత్యేక కోటా కింద ఇస్తుంది. ఈ వీసాల్లో అత్యధిక లబ్ధిదారులు భారతీయ ఐటీ నిపుణులే. ప్రతిపాదించిన లక్ష డాలర్ల ఫీజు అమలైతే, హెచ్-1బీ ఉద్యోగులను నియమించుకునే సంస్థలపై భారీ ఆర్థిక భారం పడేది. ఫలితంగా విదేశీ ఉద్యోగుల నియామకాలు తగ్గిపోయే అవకాశం ఉండేది. ప్రస్తుతం అప్పీల్స్ కోర్టు తీర్పుతో ఆ భారీ ఫీజు అమలుకు తాత్కాలికంగా బ్రేక్ పడింది.

అయితే ఈ వ్యవహారం ఇంకా పూర్తిగా ముగియలేదు. అమెరికా ప్రభుత్వం తదుపరి న్యాయపరమైన చర్యలు తీసుకునే అవకాశం ఉన్నప్పటికీ, ప్రస్తుతం మాత్రం హెచ్-1బీ వీసాపై లక్ష డాలర్ల రుసుము అమలులోకి రాలేదు. దీంతో అమెరికాలో ఉద్యోగ అవకాశాల కోసం ఎదురుచూస్తున్న వేలాది భారతీయ ఐటీ నిపుణులు, విద్యార్థులకు ఈ తీర్పు ఊరటనిచ్చే పరిణామంగా భావిస్తున్నారు.