Organic farming: తక్కువ పెట్టుబడి.. అదిరిపోయే లాభం.. రైతన్నల ఇంట సిరుల పంట!

Organic farming: సాధారణంగా వ్యవసాయం అంటే ఏళ్ల తరబడి నిరీక్షణ, వేలల్లో పెట్టుబడి అని చాలామంది భావిస్తారు. కానీ, కేవలం 30 రోజుల్లోనే పెట్టిన పెట్టుబడికి నాలుగింతల లాభాన్ని పొందే అద్భుత అవకాశం ఆకుకూరల సాగులో ఉందని నిపుణులు చెబుతున్నారు.

నేల తయారీ - విజయానికి తొలిమెట్టు

ఆకుకూరల సాగుకు తేలికపాటి నేలలు అత్యంత అనుకూలం. నేలలో సేంద్రియ పదార్థం సమృద్ధిగా ఉండి, నీరు నిల్వ ఉండకుండా పారుదల వ్యవస్థ బాగుంటే పంట ఏపుగా పెరుగుతుంది.పొలాన్ని బాగా దున్ని, ఎకరానికి 8 నుండి 10 టన్నుల కుళ్ళిన పశువుల ఎరువును వేయాలి. ఇది నేల సారాన్ని పెంచి మొక్కలకు పోషకాలను అందిస్తుంది. ఒక ఎకరానికి పాలకూర విత్తనాలు 8-10 కిలోలు, మెంతి విత్తనాలు 6-8 కిలోలు అవసరమవుతాయి.

అంకురోత్పత్తి పెరగాలంటే చిన్న చిట్కా

విత్తనాలను నేరుగా చల్లడం కంటే, విత్తడానికి ముందు కొన్ని గంటల పాటు తడి గుడ్డలో నానబెడితే మొలక శాతం పెరుగుతుంది. దీనివల్ల మొక్కలు ఏకరీతిగా, వేగంగా పెరుగుతాయి. విత్తిన వెంటనే తేలికపాటి నీటి తడి ఇవ్వడం మర్చిపోవద్దు.శీతాకాలంలో వాతావరణం చల్లగా ఉంటుంది కాబట్టి, ప్రతి 7 నుండి 10 రోజులకు ఒకసారి నీరు పెడితే సరిపోతుంది. అయితే, పొలంలో నీరు నిలిచిపోకుండా జాగ్రత్త పడాలి; లేదంటే వేర్లు కుళ్ళిపోయే ప్రమాదం ఉంది.

ఆకుకూరలకు పెద్దగా రోగాలు రావు. ఒకవేళ పేనుబంక లేదా ఆకుమచ్చ తెగులు కనిపిస్తే, రసాయనాల జోలికి వెళ్లకుండా వేప ద్రావణం వంటి బయోపెస్టిసైడ్లు వాడటం శ్రేయస్కరం. దీనివల్ల వినియోగదారులకు ఆరోగ్యకరమైన ఆహారం అందుతుంది, రైతుకు ఖర్చు తగ్గుతుంది. ఆకుకూరల గొప్పతనం ఏమిటంటే, ఇవి అతి తక్కువ సమయంలో కోతకు వస్తాయి.పాలకూర 25-30 రోజుల్లో, మెంతికూర 30-35 రోజుల్లో కోతకు సిద్ధమవుతాయి. ఒకే పంటను 3 నుండి 4 సార్లు కోయవచ్చు, తద్వారా నిరంతర ఆదాయం లభిస్తుంది.

ఒక ఎకరం సాగుకు విత్తనాలు, ఎరువులు, కూలీలు కలిపి గరిష్టంగా 8,000 నుండి 10,000 రూపాయలు మాత్రమే ఖర్చవుతుంది. మార్కెట్ ధరను బట్టి ఎకరానికి 40,000 నుండి 60,000 రూపాయల వరకు ఆదాయం వస్తుంది. అంటే, అన్ని ఖర్చులు పోను రైతు నికరంగా 40,000 నుండి 50,000 రూపాయలు లాభం పొందవచ్చు. నీటి లభ్యత ఉండి, కష్టపడే తత్వం ఉన్న రైతన్నలకు ఈ శీతాకాలంలో పాలకూర, మెంతికూర సాగు ఒక బంగారు అవకాశం. నిపుణుల సలహాలు పాటిస్తూ, శాస్త్రీయ పద్ధతిలో సాగు చేస్తే ఆకుకూరలు ఆకుపచ్చని నోట్ల వర్షం కురిపించడం ఖాయం.