SIP: మీకు 50 ఏళ్లు వ‌చ్చే నాటికి రూ. కోటి ఫండ్ కావాలా.? ఏ వయసులో ఎంత SIP చేయాలంటే

SIP: 30 ఏళ్ల వయసులో ప్రారంభిస్తే.. నెలకు ఎంత SIP చేయాలి?

మీ వయసు 30 సంవత్సరాలు అనుకుందాం. 50 ఏళ్ల వయసుకు రూ.1 కోటి ఫండ్ కావాలంటే మీకు ఏకంగా 20 సంవత్సరాల సమయం ఉంటుంది. ఎక్కువ కాలం పెట్టుబడి కొనసాగించడం వల్ల కంపౌండింగ్ ప్రయోజనం ఎక్కువగా లభిస్తుంది. ఇక్క‌డ మీ లక్ష్యం కోటి రూపాయ‌లు అని అనుకుంటే పెట్టుబడి కాలం 20 సంవత్సరాలు అవుతుంది. వార్షిక రాబ‌డి 12 శాతంగా లెక్క‌పెట్టుకుంటే నెల‌వారీ మీరు చెల్లించాల్సిన ఎస్ఐపీ సుమారు రూ. 10,875 అవుతుంది. అంటే 30 ఏళ్ల వయసులోనే SIP ప్రారంభిస్తే నెలకు సుమారు రూ.10,875 పెట్టుబడి పెట్టడం ద్వారా 50 ఏళ్ల నాటికి రూ.1 కోటి లక్ష్యాన్ని చేరుకునే అవకాశం ఉంటుంది. ముందుగా ప్రారంభించడం వల్ల తక్కువ మొత్తంతోనే పెద్ద లక్ష్యాన్ని చేరుకోవచ్చు.

35 ఏళ్ల వయసులో ప్రారంభిస్తే SIP ఎంత పెరుగుతుంది?

పెట్టుబడి ప్రారంభించడంలో ఐదేళ్లు ఆలస్యం చేస్తే పరిస్థితి మారిపోతుంది. 35 ఏళ్ల వయసులో ప్రారంభిస్తే 50 ఏళ్లకు చేరుకోవడానికి కేవలం 15 సంవత్సరాల సమయం మాత్రమే ఉంటుంది. అప్పుడు మీరు నెల‌కు సుమారు రూ.21,020 ఎస్ఐపీ చెల్లించాల్సి ఉంటుంది.

40 ఏళ్ల వయసులో రూ.1 కోటి చేరుకోవ‌చ్చా.?

40 ఏళ్ల వయసులో SIP ప్రారంభిస్తే 50 ఏళ్లకు రూ.1 కోటి ఫండ్ సమకూర్చుకోవడానికి కేవలం 10 సంవత్సరాల సమయం మాత్రమే ఉంటుంది. దీంతో ప్రతి నెలా పెట్టాల్సిన మొత్తం భారీగా పెరుగుతుంది. ఈ లెక్క‌న చూస్తే మీరు నెల‌కు రూ. రూ.46,640 ఎస్ఐపీ చేయాల్సి ఉంటుంది. అంటే 10 సంవత్సరాల్లో రూ.1 కోటి ఫండ్ లక్ష్యాన్ని చేరుకోవాలంటే నెలకు దాదాపు రూ.46 వేలకుపైగా పెట్టుబడి పెట్టాల్సి ఉంటుంది. అందుకే పెట్టుబడుల్లో ఆలస్యం చేయకుండా వీలైనంత త్వరగా ప్రారంభించడం ఆర్థికంగా ప్రయోజనకరం.

స్టెప్-అప్ SIPతో తక్కువ మొత్తంతో ప్రారంభించే అవకాశం

ప్రారంభంలోనే పెద్ద మొత్తంలో SIP చేయడం అందరికీ సాధ్యం కాకపోవచ్చు. అలాంటి వారికి స్టెప్-అప్ SIP మంచి ప్రత్యామ్నాయంగా ఉంటుంది. ఇందులో మొదట తక్కువ మొత్తంతో పెట్టుబడి ప్రారంభించి, ప్రతి సంవత్సరం ఆదాయం పెరిగే కొద్దీ SIP మొత్తాన్ని కూడా కొంత శాతం పెంచుకోవచ్చు.

ఉదాహరణకు ప్రతి సంవత్సరం SIPను 5 శాతం పెంచుతూ వెళ్తే ప్రారంభంలో పెట్టాల్సిన మొత్తం తగ్గుతుంది. 30 ఏళ్ల వయసులో సాధారణ SIP రూ.10,875కు బదులు సుమారు రూ.7,850తో ప్రారంభించవచ్చు. 35 ఏళ్ల వయసులో: రూ.21,020కు బదులు సుమారు రూ.16,160తో ప్రారంభించవచ్చు. 40 ఏళ్ల వయసులో రూ.46,640కు బదులు సుమారు రూ.37,130తో ప్రారంభించవచ్చు. అయితే స్టెప్-అప్ SIPలో ప్రతి సంవత్సరం పెట్టుబడి మొత్తాన్ని క్రమం తప్పకుండా పెంచడం చాలా ముఖ్యం.

మొత్తానికి.. రూ.1 కోటి ఫండ్ నిర్మించడం అసాధ్యమైన లక్ష్యం కాదు. సరైన వయసులో పెట్టుబడి ప్రారంభించడం, దీర్ఘకాలం కొనసాగించడం, ఆదాయం పెరిగే కొద్దీ SIPను పెంచడం ద్వారా ఈ లక్ష్యాన్ని చేరుకునే అవకాశం ఉంటుంది. ఎంత త్వరగా ప్రారంభిస్తే అంత తక్కువ నెలవారీ పెట్టుబడితో పెద్ద ఫండ్‌ను నిర్మించుకోవచ్చు.

గమనిక: మ్యూచువల్ ఫండ్ పెట్టుబడులు మార్కెట్ రిస్క్‌కు లోబడి ఉంటాయి. 12% రాబడి అనేది కేవలం అంచనా మాత్రమే. పెట్టుబడి నిర్ణయం తీసుకునే ముందు మీ ఆర్థిక లక్ష్యాలు, రిస్క్ సామర్థ్యాన్ని పరిశీలించడం మంచిది.