India Israel FTA: భారత్-ఇజ్రాయెల్ ఎఫ్‌టీఏ చర్చల్లో కీలక పురోగతి

భారత్-ఇజ్రాయెల్ మధ్య ప్రతిపాదిత స్వేచ్ఛా వాణిజ్య ఒప్పందం (ఎఫ్‌టీఏ)పై చర్చలు మరో అడుగు ముందుకు పడ్డాయి. నాలుగు రోజుల పాటు సాగిన రెండో విడత చర్చలు విజయవంతంగా ముగియగా, ప్రతిపాదిత ఒప్పందంలోని అన్ని కీలక అంశాలపై ఇరు దేశాల ప్రతినిధులు సమగ్రంగా చర్చించారు. సమతుల్యమైన, పరస్పర ప్రయోజనకరమైన ఎఫ్‌టీఏ దిశగా పురోగతి సాధించినట్లు కేంద్ర వాణిజ్య మంత్రిత్వ శాఖ వెల్లడించింది.

అన్ని కీలక అంశాలపై సాంకేతిక చర్చలు

రెండో విడత చర్చల్లో ఇరు దేశాల సాంకేతిక నిపుణులు వస్తువుల వాణిజ్యం, సేవల వాణిజ్యం, రూల్స్ ఆఫ్ ఒరిజిన్, శానిటరీ, ఫైటోశానిటరీ ప్రమాణాలు, వాణిజ్య సాంకేతిక అడ్డంకులు, మేధో సంపత్తి హక్కులు, కస్టమ్స్ విధానాలు, వాణిజ్య సౌలభ్యం, ఆర్థిక సహకారం తదితర అంశాలపై విస్తృతంగా చర్చలు జరిపారు.

గ్యాప్‌లను తగ్గించే దిశగా ముందడుగు

చర్చలు నిర్మాణాత్మకంగా, భవిష్యత్‌ను దృష్టిలో ఉంచుకుని సాగాయని వాణిజ్య శాఖ తెలిపింది. విభేదాలను తగ్గించి, ఉమ్మడి అంగీకారానికి వచ్చే అంశాలను గుర్తించే దిశగా సాంకేతిక స్థాయిలో చర్చలు జరిగినట్లు పేర్కొంది.

2025లో కుదిరిన ఒప్పందమే చర్చలకు ఆధారం

2025 నవంబర్‌లో కుదిరిన టర్మ్స్ ఆఫ్ రిఫరెన్స్ (ToR) ఆధారంగా ఈ చర్చలు కొనసాగుతున్నాయి. ద్వైపాక్షిక వాణిజ్యం, పెట్టుబడులు, ఆర్థిక సహకారాన్ని మరింత బలోపేతం చేయడమే ఈ ఒప్పందం ప్రధాన లక్ష్యంగా ఇరు దేశాలు పేర్కొన్నాయి.

ద్వైపాక్షిక వాణిజ్యం 3.93 బిలియన్ డాలర్లు

2025-26 ఆర్థిక సంవత్సరంలో భారత్-ఇజ్రాయెల్ మధ్య మొత్తం వస్తు వాణిజ్యం 3.93 బిలియన్ డాలర్లకు చేరుకుంది. పలు రంగాల్లో ఇరు దేశాలకు పరస్పర సహకార అవకాశాలు ఉండటంతో ప్రతిపాదిత ఎఫ్‌టీఏ వాణిజ్యం, పెట్టుబడులు, ఆర్థిక భాగస్వామ్యాన్ని మరింత విస్తరించే అవకాశముందని అధికారులు భావిస్తున్నారు.

త్వరగా ఎఫ్‌టీఏ పూర్తి చేయడంపై ఇరు దేశాల దృష్టి

భారత్ ప్రధాన చర్చల ప్రతినిధి, వాణిజ్య శాఖ అదనపు కార్యదర్శి అజయ్ భాడూ సమతుల్యమైన, సమగ్ర ఎఫ్‌టీఏ కుదుర్చుకునేందుకు భారత్ కట్టుబడి ఉందని తెలిపారు. ఇజ్రాయెల్ ప్రధాన చర్చల ప్రతినిధి యిఫాత్ అలోన్ పెరెల్ కూడా తొలి విడతతో పోలిస్తే మంచి పురోగతి సాధించామని, ఇదే వేగాన్ని కొనసాగిస్తూ త్వరగా ఒప్పందాన్ని పూర్తి చేయాలని ఆకాంక్షించారు.