IT Jobs: భారత ఐటీ రంగంలో ఉద్యోగాల కోత.. ఏఐ దెబ్బకు దిగ్గజ కంపెనీలు సైతం విలవిల

IT Sector: భారత ఆర్థిక వ్యవస్థకు వెన్నెముకగా నిలిచే ఐటీ రంగం ప్రస్తుతం ఒక సంధి కాలంలో ఉంది. ఒకప్పుడు వేల సంఖ్యలో నియామకాలు చేపట్టి దేశవ్యాప్త యువతకు కలల గమ్యస్థానంగా నిలిచిన ఐటీ కంపెనీలు, నేడు అడుగులు ఆచి తూచి వేస్తున్నాయి. గత ఆర్థిక సంవత్సరంలో (2025-26) భారత టాప్-5 ఐటీ దిగ్గజాల్లో ఉద్యోగుల సంఖ్య ఏకంగా ఏడు వేల వరకు తగ్గడం ఇప్పుడు చర్చనీయాంశంగా మారింది. అసలు ఈ మార్పు ఎందుకు జరుగుతోంది? దీని వెనుక ఉన్న కారణాలేంటి?

ఏఐ దెబ్బ..

ప్రస్తుతం ప్రపంచవ్యాప్తంగా వినిపిస్తున్న ఏకైక పదం ఆర్టిఫిషియల్ ఇంటెలిజెన్స్. ఈ కృత్రిమ మేధ ఐటీ కంపెనీల పనితీరును సమూలంగా మార్చేస్తోంది. కంపెనీలు తమ కార్యకలాపాల్లో ఏఐని ఎక్కువగా ఉపయోగిస్తూ ఖర్చులను తగ్గించుకోవాలని చూస్తున్నాయి. ఫలితంగా, గతంలో మనుషులు చేసే పనులు ఇప్పుడు యంత్రాలు చేస్తున్నాయి. దీని ప్రభావం నియామకాలపై స్పష్టంగా కనిపిస్తోంది. కంపెనీలు ఇప్పుడు కేవలం సంఖ్య కోసం కాకుండా, అడ్వాన్స్‌డ్ స్కిల్స్ ఉన్న నిపుణుల కోసమే వెతుకుతున్నాయి. సాదాసీదా నైపుణ్యాలు ఉన్న వారి కంటే, అధునాతన సాంకేతికతపై పట్టు ఉన్నవారికే ఇప్పుడు రెడ్ కార్పెట్ స్వాగతం లభిస్తోంది.

దిగ్గజ సంస్థల పరిస్థితి ఏమిటి?

గతంలో ప్రతి ఏటా ఉద్యోగుల సంఖ్య పెరగడమే తప్ప తగ్గడం అనేది చాలా అరుదుగా జరిగేది. కానీ, 2025-26 ఆర్థిక సంవత్సరంలో పరిస్థితి తలకిందులైంది. భారత ఐటీ దిగ్గజం టాటా కన్సల్టెన్సీ సర్వీసెస్ లోనే అత్యధికంగా 23,460 మంది ఉద్యోగులు తగ్గడం ఆశ్చర్యపరిచే విషయం. 2021-22లో ఇదే టీసీఎస్ ఏకంగా లక్షకు పైగా నియామకాలు చేపట్టి రికార్డు సృష్టించింది. అయితే, కొన్ని కంపెనీలు కాస్త ఊరటనిచ్చాయి. ఇన్ఫోసిస్, విప్రో, హెచ్‌సీఎల్ టెక్ వంటి సంస్థలు స్వల్పంగా నియామకాలు చేపట్టాయి. ఇన్ఫోసిస్‌లో సుమారు ఐదు వేల మంది, విప్రోలో ఎనిమిది వేల మందికి పైగా కొత్త ఉద్యోగులు చేరారు. కానీ, ఓవరాల్‌గా చూస్తే టాప్-5 కంపెనీల్లో ఉద్యోగుల సంఖ్య నికరంగా 6,981 తగ్గింది. ఇది ఐటీ రంగంలోని అనిశ్చితికి అద్దం పడుతోంది.

భవిష్యత్తుపై ఆశలు

తాజాగా వెలువడిన నాలుగో త్రైమాసిక ఫలితాలు కాస్త మెరుగ్గానే ఉన్నా, స్టాక్ మార్కెట్‌లో ఐటీ షేర్ల ఒడిదుడుకులు తల్లిదండ్రులను, నిరుద్యోగులను ఆందోళనకు గురిచేస్తున్నాయి. అంతర్జాతీయ మార్కెట్లలో ఆర్థిక మందగమనం వల్ల ప్రాజెక్టులు తగ్గడం, కంపెనీలు తమ ఆదాయ వృద్ధి అంచనాలను తగ్గించుకోవడం ఇందుకు ప్రధాన కారణాలు. కానీ, ఐటీ రంగం ఎప్పుడూ ఒకేలా ఉండదు. ఇది నిరంతర పరిణామం చెందే రంగం. ఒకప్పుడు సాఫ్ట్‌వేర్ డెవలపర్ల అవసరం ఉన్న చోట, ఇప్పుడు ఏఐ ఆర్కిటెక్టుల అవసరం పెరిగింది. కంపెనీలు ఇప్పుడు సంఖ్య కంటే క్వాలిటీ వైపు మొగ్గు చూపుతున్నాయి.