IPO: మరో 12 కంపెనీలు ఇష్యూకు రెడీ.. జియో ప్లాట్‌ఫామ్స్ సైతం!

IPO: దేశీయ ప్రైమరీ మార్కెట్‌లో ఐపీవోల (IPO) పండుగ వాతావరణం కొనసాగుతోంది. ఈ క్రమంలోనే ఈ నెలలో ఏకంగా 12 కంపెనీలు పబ్లిక్ ఇష్యూకి రానున్నాయి. రిలయన్స్ గ్రూప్‌కు చెందిన డిజిటల్, టెలికం సేవల దిగ్గజం జియో ప్లాట్‌ఫామ్స్ సహా జెట్‌వెర్క్ మ్యాన్యుఫాక్చరింగ్, అవాడా ఎలక్ట్రో, ఫ్యూజన్ సీఎక్స్, హెచ్‌డీ ఫైర్ ప్రొటెక్ట్ వంటి ప్రముఖ కంపెనీలు తమ ఐపీవోలను ఆవిష్కరించేందుకు సిద్ధమయ్యాయి. 2026 క్యాలెండర్ సంవత్సరంలో ఇప్పటికే 96 కంపెనీలు మార్కెట్లో లిస్ట్ కాగా, తాజా ఇష్యూలతో ఈ సంఖ్య మరింత పెరగనుంది. కాగా, గత సెప్టెంబర్ నెలలోనే ఏకంగా 35 కంపెనీలు లిస్టింగ్ ప్రక్రియను పూర్తి చేసుకోవడం గమనార్హం.

ఈసారి మార్కెట్ నుంచి నిధుల సమీకరణకు సిద్ధపడిన సంస్థల్లో టెక్నాలజీ, హెల్త్‌కేర్, పునరుత్పాదక ఇంధనం, డిఫెన్స్, ప్రెసిషన్ మ్యాన్యుఫాక్చరింగ్ వంటి రంగాలు ప్రముఖంగా ఉన్నాయి. తాజా ఈక్విటీ జారీతో పాటు ప్రస్తుత వాటాదారుల ఆఫర్ ఫర్ సేల్ (OFS) ద్వారా కంపెనీలు ఈ నిధులను సేకరిస్తున్నాయి. వ్యాపార విస్తరణ, రుణాల చెల్లింపులు, వర్కింగ్ క్యాపిటల్ మరియు పెట్టుబడి వ్యయాల కోసం వీటిని వెచ్చించనున్నాయి. కాగా, ఈ ఏడాది జనవరి నుంచి ఇప్పటివరకు 96 ఐపీవోల ద్వారా కంపెనీలు రూ. 1.1 లక్షల కోట్లకు పైగా సేకరించాయి.

ప్రధాన ఐపీవోల సమగ్ర వివరాలు & ప్రైస్ బ్యాండ్:

జియో ప్లాట్‌ఫామ్స్:

ఈ నెల 21న దేశీయ మార్కెట్లోనే అతిపెద్ద ఐపీవోల్లో ఒకటిగా భావిస్తున్న జియో ప్లాట్‌ఫామ్స్ పబ్లిక్ ఇష్యూ ప్రారంభం కానుంది. ఈ నెల 23తో ముగిసే ఈ ఇష్యూ ద్వారా కంపెనీ రూ. 35,000 కోట్లు సమీకరించాలని లక్ష్యంగా పెట్టుకుంది.

జెట్‌వెర్క్ మ్యాన్యుఫాక్చరింగ్:

టెక్ ఆధారిత మ్యాన్యుఫాక్చరింగ్ ప్లాట్‌ఫామ్ జెట్‌వెర్క్ ఐపీవో అక్టోబర్ 15న ప్రారంభమై 19న ముగియనుంది. ప్రైస్ బ్యాండ్ రూ. 143–151గా నిర్ణయించారు. దీని ద్వారా రూ. 5,012 కోట్లు సమీకరించనుండగా, అందులో రూ. 2,830 కోట్ల విలువైన కొత్త ఈక్విటీ షేర్లు రానున్నాయి.

ఫ్యూజన్ సీఎక్స్:

ఏఐ ఆధారిత సొల్యూషన్స్ ఇచ్చే ఫ్యూజన్ సీఎక్స్ ఐపీవో అక్టోబర్ 14న ప్రారంభమై 16న ముగియనుంది. ప్రైస్ బ్యాండ్ రూ. 275–289 కాగా, ఇష్యూ ద్వారా రూ. 702 కోట్లు సమీకరించనుంది.

హెచ్‌డీ ఫైర్ ప్రొటెక్ట్:

అగ్నిమాపక పరికరాల తయారీ సంస్థ హెచ్‌డీ ఫైర్ ప్రొటెక్ట్ ఐపీవో అక్టోబర్ 13న ప్రారంభమై 15 వరకు అందుబాటులో ఉంటుంది. ప్రైస్ బ్యాండ్ రూ. 258–271 కాగా, రూ. 712 కోట్లు సమీకరించాలని చూస్తోంది.

టాన్బో ఇమేజింగ్:

థర్మల్ ఇమేజింగ్, డిఫెన్స్ టెక్నాలజీ వ్యవస్థలు రూపొందించే ఈ కంపెనీ ఐపీవో అక్టోబర్ 15–19 మధ్య జరగనుంది. ప్రైస్ బ్యాండ్ రూ. 665–700 కాగా, 1.22 కోట్ల షేర్ల విక్రయం ద్వారా రూ. 852 కోట్లు సమీకరించనుంది.

బాన్‌ఫిగ్లియోలి ట్రాన్స్‌మిషన్స్:

ఇటాలియన్ గ్రూప్ అనుబంధ సంస్థ ఐపీవో అక్టోబర్ 15 నుంచి 19 వరకు జరగనుంది. ప్రైస్ బ్యాండ్ రూ. 558–586గా నిర్ణయించారు. ప్రమోటర్ సంస్థ 4.32 కోట్ల షేర్లను విక్రయించడం ద్వారా రూ. 2,534 కోట్లు సమీకరించనుంది.

సహజానంద్ మెడికల్ టెక్నాలజీస్:

ఈ నెల 15న ప్రారంభమయ్యే ఐపీవోకి ప్రైస్ బ్యాండ్ రూ. 327–344గా నిర్ణయించారు. ఈ నెల 19తో ముగిసే ఈ ఇష్యూ ద్వారా రూ. 475 కోట్లు సేకరణే ధ్యేయం.

రేసులో ఉన్న ఇతర కంపెనీలు:

అవాడా ఎలక్ట్రో రూ. 7,600 కోట్లు, పారస్ హెల్త్‌కేర్ రూ. 1,800 కోట్లు, ఎన్‌డీఆర్ ఇన్విట్ ట్రస్ట్ రూ. 750 కోట్లు సమీకరించే ప్రణాళికల్లో ఉన్నాయి. వీటితో పాటు గుజరాత్ విక్టరీ ఫోర్జింగ్స్, వేస్ట్‌వాటర్ ట్రీట్‌మెంట్ సేవల సంస్థ ఎస్‌ఎఫ్‌సీ ఎన్విరాన్‌మెంటల్ టెక్నాలజీస్ కూడా మార్కెట్లోకి అడుగుపెట్టేందుకు సిద్ధమయ్యాయి.