LIC పుట్టిన రోజు నేడు.. దేశంలోనే అతిపెద్ద బీమా సంస్థ గురించి ఆస‌క్తిక‌ర విష‌యాలు!

LIC: భారతదేశంలో జీవిత బీమా రంగం అంటే ముందుగా గుర్తుకు వచ్చే పేరు లైఫ్ ఇన్సూరెన్స్ కార్పొరేషన్ ఆఫ్ ఇండియా (LIC). కోట్లాది మంది భారతీయుల జీవితాలకు ఆర్థిక భద్రత కల్పిస్తూ దేశంలోనే అతిపెద్ద జీవిత బీమా సంస్థగా పేరుగాంచిన ఎల్ఐసీ ఏర్పాటై నేటితో 70 ఏళ్లు గ‌డుస్తోన్న నేప‌థ్యంలో ఎల్ఐసీకి సంబంధించిన ఆస‌క్తిక‌ర విష‌యాలు.

1956లో ప్రారంభమైన LIC.. ఎన్నో సంస్థల విలీనం

భారతదేశంలో జీవిత బీమా రంగానికి సుదీర్ఘ చరిత్ర ఉంది. దేశంలో జీవిత బీమా సేవలను అందించిన తొలి సంస్థల్లో ఓరియంటల్ లైఫ్ ఇన్సూరెన్స్ కంపెనీ ఒకటి. ఇది 1818లో కోల్‌కతాలో ప్రారంభమైంది. ఆ తర్వాత హిందూస్థాన్ ఇన్సూరెన్స్ సొసైటీ, బాంబే మ్యూచువల్ లైఫ్ అష్యూరెన్స్ సొసైటీతో పాటు అనేక బీమా సంస్థలు ఏర్పాటయ్యాయి.

స్వాతంత్రానికి ముందు భారతదేశంలో వందలాది చిన్న, పెద్ద బీమా కంపెనీలు పనిచేసేవి. అయితే ఆర్థిక, రాజకీయ పరిస్థితుల కారణంగా కొన్ని సంస్థలు మూతపడటం, ప్రజల్లో బీమా రంగంపై నమ్మకం తగ్గడం వంటి సమస్యలు ఎదురయ్యాయి.

ఈ పరిస్థితుల్లో జీవిత బీమా రంగాన్ని ఒకే వ్యవస్థ కిందకు తీసుకురావాలని కేంద్ర ప్రభుత్వం నిర్ణయించింది. 1956 జనవరిలో బీమా రంగాన్ని ప్రభుత్వ ఆధీనంలోకి తీసుకున్నారు. అనంతరం పార్లమెంట్‌లో లైఫ్ ఇన్సూరెన్స్ కార్పొరేషన్ ఆఫ్ ఇండియా చట్టం ఆమోదం పొందింది.

1956 సెప్టెంబర్ 1న అధికారికంగా LIC ఏర్పాటైంది. అప్పట్లో దేశంలోని 245కు పైగా బీమా కంపెనీలు, ప్రావిడెంట్ సొసైటీలను విలీనం చేసి ఒకే సంస్థగా లైఫ్ ఇన్సూరెన్స్ కార్పొరేషన్ ఆఫ్ ఇండియాను ఏర్పాటు చేశారు.

దేశంలో అతిపెద్ద జీవిత బీమా సంస్థగా ఎదిగిన LIC

ప్రస్తుతం LIC భారతదేశంలోనే అతిపెద్ద జీవిత బీమా సంస్థగా కొనసాగుతోంది. కోట్లాది మంది పాలసీదారులకు బీమా సేవలు అందిస్తోంది. దేశవ్యాప్తంగా విస్తృతమైన కార్యాలయాలు, ఏజెంట్ల నెట్‌వర్క్‌తో ప్రజలకు చేరువైంది.

LIC ప్రధాన కార్యాలయం ముంబైలో ఉంది. దేశవ్యాప్తంగా ఢిల్లీ, చెన్నై, ముంబై, హైదరాబాద్, కాన్పూర్, కోల్‌కతా, భోపాల్, పాట్నా నగరాల్లో మొత్తం 8 జోనల్ కార్యాలయాలు ఉన్నాయి. 2019 నాటికి LICకు సుమారు 29 కోట్ల మంది పాలసీదారులు ఉన్నట్లు సంస్థ వెల్లడించింది.

అదే సమయంలో సంస్థ నిర్వహిస్తున్న లైఫ్ ఫండ్ విలువ రూ.28 లక్షల కోట్లకు పైగా ఉంది. 2018-19 ఆర్థిక సంవత్సరంలోనే సుమారు 2.6 కోట్ల బీమా క్లెయిమ్‌లను పరిష్కరించింది. దీంతో ప్రజల్లో LICపై ఉన్న విశ్వాసం మరింత పెరిగింది. 2022లో ప్రపంచంలోని అతిపెద్ద కంపెనీల జాబితా అయిన ఫార్చ్యూన్ గ్లోబల్ 500లో LIC 98వ స్థానంలో నిలిచింది.

ఇది LIC అంతర్జాతీయ స్థాయిలో ఉన్న ప్రాధాన్యతను తెలియజేస్తుంది. 2026 మే నాటికి LIC నిర్వహిస్తున్న మొత్తం ఆస్తుల విలువ సుమారు రూ.57.29 లక్షల కోట్లకు చేరినట్లు సమాచారం. దీంతో దేశంలోని అతిపెద్ద సంస్థాగత పెట్టుబడిదారుల్లో LIC అగ్రస్థానంలో కొనసాగుతోంది.

గ్రామీణ ప్రాంతాల నుంచి ఆధునిక టెక్నాలజీ వరకు LIC ప్రయాణం

జాతీయీకరణ తర్వాత LIC ప్రజలకు మరింత చేరువ కావడానికి అనేక కొత్త కార్యక్రమాలు చేపట్టింది. ముఖ్యంగా గ్రామీణ ప్రాంతాల్లో బీమా సేవలను విస్తరించడంపై ప్రత్యేక దృష్టి పెట్టింది.

1981లో కార్యకలాపాలను మరింత సమర్థవంతంగా నిర్వహించేందుకు పునర్వ్యవస్థీకరణ చర్యలు చేపట్టింది. గ్రామీణ ప్రజల అవసరాలను దృష్టిలో ఉంచుకుని జన రక్ష పాలసీ వంటి పథకాలను రూపొందించింది.

1987లో భూమిలేని వ్యవసాయ కూలీల కోసం ప్రత్యేకంగా ల్యాండ్‌లెస్ అగ్రికల్చరల్ లేబరర్స్ గ్రూప్ ఇన్సూరెన్స్ పథ‌కాన్ని ప్రవేశపెట్టింది. 1989లో LIC హౌసింగ్ ఫైనాన్స్ లిమిటెడ్‌ను ఏర్పాటు చేసింది. అదే ఏడాది మ్యూచువల్ ఫండ్ కార్యకలాపాల్లోకి కూడా అడుగుపెట్టింది.

1995లో గ్రామీణ ప్రాంతాల ప్రజలకు బీమా రక్షణ అందించేందుకు రూరల్ గ్రూప్ లైఫ్ ఇన్సూరెన్స్ స్కీమ్‌ను ప్రారంభించింది. సాంకేతిక రంగంలో కూడా LIC క్రమంగా మార్పులు చేసుకుంది. 1998లో ముంబైలో తొలి IVRS సేవలను ప్రారంభించింది. 2000 తర్వాత బీమా రంగంలో ప్రైవేట్ కంపెనీల ప్రవేశం పెరిగినప్పటికీ LIC తన మార్కెట్ ప్రాధాన్యతను కొనసాగించింది.

2022లో స్టాక్ మార్కెట్‌లోకి LIC.. IPOతో కొత్త అధ్యాయం

LIC చరిత్రలో మరో కీలక ఘట్టం 2022లో చోటుచేసుకుంది. కేంద్ర ప్రభుత్వం LICని స్టాక్ మార్కెట్‌లో లిస్ట్ చేయాలని నిర్ణయించింది. 2021 కేంద్ర బడ్జెట్ సందర్భంగా అప్పటి ఆర్థిక మంత్రి నిర్మలా సీతారామన్ LIC IPO ప్రతిపాదనను ప్రకటించారు. సంస్థ పబ్లిక్ లిస్టింగ్‌కు అనుగుణంగా LIC అధికారిక మూలధనాన్ని కూడా పెంచారు.

LIC IPO 2022 మే 4న ప్రారంభమై మే 9న ముగిసింది. కేంద్ర ప్రభుత్వం సంస్థలోని కొంత వాటాను ప్రజలకు విక్రయించింది. ప్రారంభంలో 5 శాతం వాటాను విక్రయించాలని భావించినప్పటికీ, చివరకు సుమారు 3.5 శాతం వాటాను IPO ద్వారా విక్రయించారు. దీని ద్వారా కేంద్ర ప్రభుత్వానికి వేల కోట్ల రూపాయల నిధులు సమకూరాయి.

IPO తర్వాత LIC షేర్లు స్టాక్ మార్కెట్‌లో ట్రేడింగ్‌కు వచ్చాయి. ప్రస్తుతం LIC దేశంలో అత్యంత కీలకమైన లిస్టెడ్ ప్రభుత్వ రంగ సంస్థల్లో ఒకటిగా ఉంది.

2026లో LIC షేర్‌హోల్డర్లు 1:1 బోనస్ షేర్ ఇష్యూకు ఆమోదం తెలిపారు. అంటే అర్హత కలిగిన పెట్టుబడిదారులు తమ వద్ద ఉన్న ప్రతి ఒక షేరుకు అదనంగా మరో షేరును పొందే అవకాశం ఉంటుంది. లిస్టింగ్ తర్వాత LIC ప్రకటించిన తొలి బోనస్ ఇష్యూ ఇదే కావడం విశేషం.

దేశ ఆర్థిక వ్యవస్థలో LIC కీలక పాత్ర

LIC కేవలం బీమా సంస్థ మాత్రమే కాదు. దేశ ఆర్థిక వ్యవస్థలో అత్యంత కీలకమైన పెట్టుబడి సంస్థ కూడా. ప్రజల నుంచి వచ్చే ప్రీమియం మొత్తాలను వివిధ రంగాల్లో పెట్టుబడులుగా పెట్టడం ద్వారా దేశ అభివృద్ధిలో భాగస్వామ్యం అవుతోంది.

LIC పెట్టుబడులు ప్రధానంగా బ్యాంకింగ్, సిమెంట్, రసాయనాలు, ఎరువులు, విద్యుత్, ఇంజినీరింగ్, మౌలిక సదుపాయాలు, FMCG, ఫైనాన్స్, ఆరోగ్య రంగం, హోటళ్లు, ఐటీ, మెటల్స్, ఆటోమొబైల్, చమురు, సహజ వనరులు, రిటైల్, టెక్స్‌టైల్స్, రవాణా, లాజిస్టిక్స్ వంటి అనేక రంగాల్లో ఉన్నాయి.

2026లో LIC కేంద్ర ప్రభుత్వానికి భారీ మొత్తంలో డివిడెండ్ కూడా చెల్లించింది. సుమారు రూ.12,207.25 కోట్ల డివిడెండ్‌ను కేంద్రానికి అందించింది. ఈ మొత్తాన్ని కేంద్ర ఆర్థిక మంత్రి నిర్మలా సీతారామన్‌కు అందజేశారు.

LIC సామాజిక సేవా కార్యక్రమాల్లో కూడా భాగస్వామ్యం అవుతోంది. 2006లో ఏర్పాటు చేసిన LIC గోల్డెన్ జూబ్లీ ఫౌండేషన్ ద్వారా విద్య, పేదరిక నిర్మూలన, వెనుకబడిన వర్గాల జీవన ప్రమాణాల మెరుగుదల కోసం కార్యక్రమాలు చేపడుతోంది.

ఈ ఫౌండేషన్ ద్వారా ప్రతిభావంతులైన విద్యార్థులకు స్కాలర్‌షిప్‌లు కూడా అందిస్తోంది. ముఖ్యంగా ఆర్థికంగా వెనుకబడిన కుటుంబాలకు చెందిన విద్యార్థులు ఉన్నత విద్యను కొనసాగించేందుకు ఈ కార్యక్రమం ఉపయోగపడుతోంది.

LIC కార్పొరేట్ కార్యాలయంగా ప్రసిద్ధి చెందిన యోగక్షేమ భవనం దేశంలోని ప్రముఖ నిర్మాణాల్లో ఒకటి. LICకు ఉన్న విశ్వసనీయతకు గుర్తుగా 1970లో భారత పోస్టల్ శాఖ ప్రత్యేక స్మారక స్టాంపు, పోస్టుకార్డును కూడా విడుదల చేసింది.

దాదాపు ఏడు దశాబ్దాలుగా భారతీయులకు ఆర్థిక భద్రతకు ప్రతీకగా నిలుస్తున్న LIC.. బీమా సేవలతో పాటు దేశ ఆర్థికాభివృద్ధిలోనూ కీలక పాత్ర పోషిస్తోంది. ప్రభుత్వ రంగ సంస్థగా ప్రారంభమైన LIC, ప్రస్తుతం ప్రపంచ స్థాయి పెట్టుబడి సంస్థగా ఎదిగి కోట్లాది భారతీయుల నమ్మకాన్ని కొనసాగిస్తోంది.