FASTag Annual Pass: స్థానికులకు రూ.1,500కే టోల్ పాస్.. కొత్త రూల్స్ ఇవే

FASTag Annual Pass: టోల్ ప్లాజాల సమీపంలో నివసిస్తూ తరచూ రాకపోకలు సాగించే వాహనదారులకు కేంద్ర రోడ్డు రవాణా, జాతీయ రహదారుల మంత్రిత్వ శాఖ తీపి కబురు అందించింది. స్థానిక ప్రయాణికులపై పడే ఆర్థిక భారాన్ని తగ్గించే లక్ష్యంతో ప్రత్యేక రాయితీతో కూడిన ‘కన్సెషనల్ లోకల్ ఫాస్టాగ్ యాన్యువల్ పాస్’ను (Concessional Local FASTag Annual Pass) అందుబాటులోకి తెచ్చింది. ఈ నూతన సవరించిన నిబంధనలు నవంబర్ 1 నుంచి అమలులోకి రానున్నాయి.

ఎవరికి వర్తిస్తుంది? నిబంధనలు ఇవే:

20 కిలోమీటర్ల పరిధి: టోల్ ప్లాజాకు 20 కిలోమీటర్ల పరిధిలో నివసించే స్థానిక ప్రజలకు మాత్రమే ఈ లోకల్ పాస్ వర్తిస్తుంది.

పాస్ ధర: మున్సిపాలిటీ లేదా స్థానిక పట్టణ పరిధికి వెలుపల ఉన్న టోల్ ప్లాజాలకు వార్షిక పాస్ ధర రూ. 1,500 కాగా, మున్సిపాలిటీ పరిధిలో ఉన్న టోల్ గేట్లకు రూ. 3,000గా నిర్ణయించారు.

వ్యక్తిగత వాహనాలకే: ఈ సదుపాయం కేవలం ప్రైవేట్, నాన్-కమర్షియల్ (కార్లు, జీపులు మొదలైనవి) వాహనాలకు మాత్రమే వర్తిస్తుంది. కమర్షియల్ వాహనాలకు ఇది వర్తించదు.

పరిమితులు & మినహాయింపులు:

ఈ వార్షిక పాస్ కేవలం అప్లై చేసుకున్న ఆ ఒక్క నిర్దిష్ట టోల్ ప్లాజా వద్ద మాత్రమే పనిచేస్తుంది. ఇతర జాతీయ రహదారులు లేదా ఎక్స్‌ప్రెస్‌వేలపై ప్రయాణించేటప్పుడు సాధారణ టోల్ రుసుములను చెల్లించాల్సి ఉంటుంది. అంతేకాకుండా, సదరు టోల్ దాటకుండా ప్రత్యామ్నాయ మార్గం లేదా సర్వీస్ రోడ్డు సౌకర్యం అందుబాటులో ఉంటే ఈ లోకల్ పాస్ జారీ చేయరని అధికారులు స్పష్టం చేశారు.

ప్రస్తుతం వ్యక్తిగత వాహనదారులకు రూ. 3,000 ధర కలిగిన సాధారణ వార్షిక పాస్ (ఏడాది లేదా 200 ట్రిప్పుల వరకు చెల్లుబాటు) లభిస్తుండగా, నవంబర్ 1 నుంచి ఈ కొత్త లోకల్ పాస్ విధానం ద్వారా స్థానికులకు మరింత ఊరట లభించనుంది.