గ్యాస్ సిలిండర్ పోతే ఏమ‌వుతుంది.? క‌నెక్ష‌న్ క‌ట్ చేస్తారా.? రూల్స్ ఏం చెబుతున్నాయి

LPG Gas: ఇంట్లో వంట గ్యాస్ సిలిండర్ పోయినా లేదా దొంగతనానికి గురైనా చాలా మంది ఆందోళన చెందుతారు. గ్యాస్ కనెక్షన్ రద్దవుతుందా? కొత్త సిలిండర్ వస్తుందా? జరిమానా ఎంత చెల్లించాలి? వంటి సందేహాలు వస్తుంటాయి. వీటికి స‌మాధానాలు ఇప్పుడుతెలుసుకుందాం.

గ్యాస్ సిలిండర్ పోతే ముందుగా ఏం చేయాలి?

మీ LPG గ్యాస్ సిలిండర్ పోయినా లేదా ఎవరైనా దొంగిలించినా వెంటనే సమీప పోలీస్ స్టేషన్‌లో ఫిర్యాదు చేయాలి. ఫిర్యాదు చేసే సమయంలో సిలిండర్‌పై ఉన్న ప్రత్యేక నంబర్ లేదా ఇతర వివరాలు అందిస్తే గుర్తించడం సులభమవుతుంది. ఆ తర్వాత వెంటనే మీ గ్యాస్ ఏజెన్సీకి సమాచారం ఇవ్వాలి. సిలిండర్ ఎలా పోయిందో, పోలీసులకు ఫిర్యాదు చేసిన విషయాన్ని ఏజెన్సీకి తెలియజేయాలి. దీంతో వారు తదుపరి ప్రక్రియను ప్రారంభిస్తారు.

కొత్త సిలిండర్ పొందాలంటే ఏ పత్రాలు అవసరం?

కొత్త LPG సిలిండర్ పొందేందుకు గ్యాస్ కనెక్షన్‌కు సంబంధించిన అసలు సబ్‌స్క్రిప్షన్ ఓచర్, గ్యాస్ కనెక్షన్ ఉన్న వ్యక్తి గుర్తింపు కార్డు (ఆధార్, ఓటర్ ఐడీ తదితరాలు), పోలీస్ స్టేషన్‌లో నమోదు చేసిన FIR కాపీ వంటి ప‌త్రాలు ఉండాలి. ఈ పత్రాలను పరిశీలించిన తర్వాతే గ్యాస్ కంపెనీ తదుపరి చర్యలు తీసుకుంటుంది.

గ్యాస్ కనెక్షన్ రద్దు అవుతుందా?

చాలా మందికి ఉన్న ప్రధాన సందేహం ఇదే. అయితే, సిలిండర్ పోయిందని లేదా దొంగతనానికి గురైందని మాత్రమే గ్యాస్ కనెక్షన్‌ను రద్దు చేయరు. అయితే, గ్యాస్ కంపెనీ సూచించిన విధంగా అన్ని నిబంధనలు పాటించి అవసరమైన పత్రాలు సమర్పించాలి. ప్రక్రియ పూర్తయిన తర్వాత కొత్త సిలిండర్ మంజూరు చేస్తారు. అందువల్ల ఈ విషయంలో అనవసరంగా భయపడాల్సిన అవసరం లేదు.

జరిమానా ఎంత చెల్లించాల్సి ఉంటుంది?

సిలిండర్ పోయిన సందర్భంలో గ్యాస్ కంపెనీ నిబంధనల ప్రకారం సెక్యూరిటీ డిపాజిట్ లేదా జరిమానా వసూలు చేసే అవకాశం ఉంటుంది. సాధారణంగా రూ.1,000 నుంచి రూ.3,000 వరకు చెల్లించాల్సి రావచ్చు. ఒకవేళ సిలిండర్‌తో పాటు గ్యాస్ రెగ్యులేటర్ కూడా పోయి ఉంటే ఈ మొత్తం మరింత పెరిగే అవకాశం ఉంది. అయితే, వసూలు చేసే ఖచ్చితమైన మొత్తం ఆయా గ్యాస్ కంపెనీల నిబంధనలపై ఆధారపడి ఉంటుంది.

కొత్త సిలిండర్ ఎప్పుడు ఇస్తారు?

అవసరమైన పత్రాలన్నీ సమర్పించిన తర్వాత గ్యాస్ ఏజెన్సీ వాటిని పరిశీలిస్తుంది. ధృవీకరణ పూర్తయిన తర్వాత, చెల్లించాల్సిన డిపాజిట్ లేదా జరిమానా చెల్లిస్తే కొత్త LPG సిలిండర్ అందజేస్తారు. ఈ ప్రక్రియకు కొంత సమయం పట్టే అవకాశం ఉంటుంది. అందుకే గ్యాస్ సిలిండర్‌ను ఎప్పుడూ జాగ్రత్తగా ఉపయోగించడం, భద్రంగా ఉంచడం మంచిది. ముఖ్యంగా, సిలిండర్ పోయినా గ్యాస్ కనెక్షన్ రద్దు కాదు. వెంటనే పోలీసులకు ఫిర్యాదు చేసి, గ్యాస్ ఏజెన్సీకి సమాచారం ఇచ్చి, అవసరమైన పత్రాలు సమర్పిస్తే కొత్త సిలిండర్ పొందవచ్చు. అయితే, కంపెనీ నిబంధనల ప్రకారం డిపాజిట్ లేదా జరిమానా చెల్లించాల్సి ఉండొచ్చు.