New Flight Ticket Rules 2027: విమాన టికెట్‌ బుక్‌ చేసుకునే ముందే అన్ని చార్జీలు చెప్పాల్సిందే.. కేంద్రం కొత్త నిబంధనలు!

New Flight Ticket Rules 2027: విమాన ప్రయాణికులకు కేంద్ర ప్రభుత్వం కీలక మార్పులు తీసుకొచ్చింది. టికెట్‌ బుకింగ్‌ సమయంలోనే విమానయాన సంస్థలు టికెట్‌ ధరతో పాటు పన్నులు, ఇతర ఫీజులు, క్యాన్సిలేషన్‌ చార్జీలు, రీఫండ్‌ నిబంధనలను స్పష్టంగా వెల్లడించాలని కొత్త నిబంధనల్లో పేర్కొంది. ప్రయాణికులకు చివరి నిమిషంలో అదనపు చార్జీల భారం పడకుండా పారదర్శకత పెంచడమే ఈ చర్య ప్రధాన ఉద్దేశం.

90 ఏళ్ల నాటి ఎయిర్‌క్రాఫ్ట్‌ యాక్ట్‌ 1934 స్థానంలో తీసుకొచ్చిన భారతీయ వాయుయాన్‌ నియమ్‌ 2026 ప్రకారం ఈ నిబంధనలు 2027 జనవరి నుంచి అమల్లోకి రానున్నాయి.

టికెట్‌ బుకింగ్‌ సమయంలోనే పూర్తి చార్జీల వివరాలు

కొత్త నిబంధనల ప్రకారం విమానయాన సంస్థలు టికెట్‌ బుక్‌ చేసుకునే సమయంలోనే ప్రయాణికులకు అన్ని రకాల చార్జీల వివరాలను తెలియజేయాలి. ఇందులో ప్రధానంగా:

- అసలు విమాన టికెట్‌ ధర

- ప్రభుత్వ పన్నులు

- ఇతర ఫీజులు

- టికెట్‌ క్యాన్సిలేషన్‌ చార్జీలు

- రీఫండ్‌కు సంబంధించిన షరతులు

- ప్రయాణికులపై పడే ఇతర అదనపు చార్జీలు

ఈ వివరాలను విమానయాన సంస్థల బుకింగ్‌ వెబ్‌సైట్‌లో స్పష్టంగా చూపించాలి. అలాగే ప్రయాణికులకు జారీ చేసే టికెట్‌లోనూ సంబంధిత చార్జీల వివరాలు ఉండాలి.

విమాన టికెట్‌ ధరలపై డీజీసీఏ పర్యవేక్షణ

విమానయాన సంస్థలు నిర్ణయించే టారిఫ్‌లను పౌర విమానయాన డైరెక్టరేట్‌ జనరల్‌ (DGCA) పర్యవేక్షిస్తుంది. విమాన టికెట్‌ ధరల విషయంలో పారదర్శకత, నిబంధనల అమలును ఈ వ్యవస్థ ద్వారా పర్యవేక్షించనున్నారు.

అసాధారణ పరిస్థితుల్లో చార్జీల నియంత్రణ

ఏదైనా అసాధారణ పరిస్థితి ఏర్పడినప్పుడు ప్రజా ప్రయోజనాలను దృష్టిలో ఉంచుకుని విమాన చార్జీలను నియంత్రించేందుకు పౌర విమానయాన మంత్రిత్వ శాఖ జోక్యం చేసుకునే అవకాశం ఉంటుంది. అయితే, 'అసాధారణ పరిస్థితులు' అంటే ఏమిటనే అంశాన్ని నియమాల్లో నిర్దిష్టంగా నిర్వచించలేదు.

మొత్తంగా కొత్త నిబంధనలతో విమాన టికెట్‌ బుకింగ్‌లో చార్జీల వివరాలు ముందుగానే తెలుసుకునే అవకాశం ప్రయాణికులకు లభించనుంది. టికెట్‌ ధరతో పాటు క్యాన్సిలేషన్‌, రీఫండ్‌ వంటి అంశాలపై స్పష్టత పెరగనుంది.