New SIM Rules: కొత్త సిమ్ రూల్స్ అమల్లోకి.. ఇక 9 సిమ్‌లే పరిమితి!

దేశంలో కొత్త సిమ్ కార్డు నిబంధనలు సోమవారం నుంచి అమల్లోకి వచ్చాయి. ఇకపై ఒక వ్యక్తి తన పేరుతో దేశవ్యాప్తంగా అన్ని టెలికాం ఆపరేటర్లు, లైసెన్స్‌డ్ సర్వీస్ ఏరియాలను కలిపి గరిష్ఠంగా 9 మొబైల్ కనెక్షన్లు మాత్రమే కలిగి ఉండవచ్చు. ఈ పరిమితిని ఇప్పటికే చేరుకున్న వారికి కొత్త సిమ్ కనెక్షన్ ఇవ్వకూడదని టెలికాం సంస్థలను డిపార్ట్‌మెంట్ ఆఫ్ టెలికమ్యూనికేషన్స్ (DoT) ఆదేశించింది.

కొత్త నిబంధనల ప్రకారం.. ఒక వ్యక్తి పేరుపై 9 మొబైల్ కనెక్షన్లు ఉంటే ఇక అదనంగా మరో సిమ్ తీసుకునే అవకాశం ఉండదు. అయితే జమ్మూకశ్మీర్, అసోం, ఈశాన్య రాష్ట్రాల్లోని వినియోగదారులకు ఈ పరిమితి 6 మొబైల్ కనెక్షన్లుగా ఉంటుంది.

ఇప్పటికే 9 సిమ్‌లు ఉన్నవారికి ఏం జరుగుతుంది?

గరిష్ఠ పరిమితికి చేరుకున్న వినియోగదారులను టెలికాం కంపెనీలు గుర్తించాల్సి ఉంటుంది. వారికి తమ పేరుతో కొత్త మొబైల్ కనెక్షన్ తీసుకునే అవకాశం లేదని తెలియజేయాలి.

ప్రస్తుతం ఈ ప్రక్రియను పోస్ట్-ఫ్యాక్టో విధానంలో అమలు చేయనున్నారు. అంటే కొత్త కనెక్షన్ యాక్టివేట్ అయిన తర్వాత కూడా వినియోగదారుడి పేరుపై ఉన్న మొత్తం మొబైల్ కనెక్షన్లను తనిఖీ చేయవచ్చు. పరిమితిని మించిన కనెక్షన్ గుర్తిస్తే.. ఆ కనెక్షన్‌ను వెంటనే సస్పెండ్ చేయాల్సి ఉంటుంది.

నవంబర్ 30 నుంచి రియల్‌టైమ్ చెక్

టెలికాం సంస్థలు ప్రస్తుతం పోస్ట్-ఫ్యాక్టో తనిఖీలను నిర్వహిస్తున్నప్పటికీ, నవంబర్ 30, 2026 నాటికి రియల్‌టైమ్ వెరిఫికేషన్ వ్యవస్థకు మారాలని DoT ఆదేశించింది. దీంతో కొత్త సిమ్ తీసుకునే సమయంలోనే వినియోగదారుడి పేరుపై ఇప్పటికే ఎన్ని కనెక్షన్లు ఉన్నాయో తనిఖీ చేసే అవకాశం ఉంటుంది.

రోజూ DIP నుంచి డేటా డౌన్‌లోడ్

ఆగస్టు 23, 2026 నుంచి గరిష్ఠ పరిమితికి చేరుకున్న వినియోగదారుల ప్రతినిధి చిత్రాలను డిజిటల్ ఇంటెలిజెన్స్ ప్లాట్‌ఫామ్ (DIP)లో DoT అందుబాటులో ఉంచనుంది. టెలికాం కంపెనీలు ఈ చిత్రాలను ప్రతిరోజూ డౌన్‌లోడ్ చేసుకుని కొత్త సిమ్ కోసం దరఖాస్తు చేసుకునే వ్యక్తులను గుర్తించాల్సి ఉంటుంది.

CAFలో డిక్లరేషన్ తప్పనిసరి

కొత్త నిబంధనల్లో భాగంగా కస్టమర్లు Customer Application Form (CAF)లో తమ పేరుపై ఇప్పటికే ఉన్న మొబైల్ కనెక్షన్ల వివరాలపై డిక్లరేషన్ ఇవ్వాల్సి ఉంటుంది. అన్ని టెలికాం ఆపరేటర్లు, లైసెన్స్‌డ్ సర్వీస్ ఏరియాల్లో తమ పేరుతో ఉన్న కనెక్షన్లను ఇందులో వెల్లడించాల్సి ఉంటుంది.

ఈ నిబంధనల అమలుకు సంబంధించి తలెత్తే సమస్యలపై సంబంధిత Licensed Service Areas (LSAs) నిర్ణయం తీసుకుంటాయని DoT స్పష్టం చేసింది.