Income Tax: దేశంలో కేవలం 8% మందే ఆదాయపు పన్ను చెల్లిస్తున్నారు!
భారత్లో కేవలం 8 శాతం మంది మాత్రమే ఆదాయపు పన్ను చెల్లిస్తున్నారని నివేదిక వెల్లడించింది. పన్ను చెల్లింపుదారుల సంఖ్య పెంచాలని నిపుణులు సూచిస్తున్నారు.
Income Tax Payers
భారతదేశంలో ఆదాయపు పన్ను చెల్లించే వారి సంఖ్య ఇంకా చాలా తక్కువగానే ఉందని జేఎం ఫైనాన్షియల్ నివేదిక వెల్లడించింది. దేశ జనాభాలో కేవలం 8 శాతం మంది మాత్రమే ఆదాయపు పన్ను చెల్లిస్తున్నారని, ఫిలిప్పీన్స్లో ఇది 23.2 శాతం, ఇండోనేషియాలో 26.1 శాతంగా ఉందని పేర్కొంది. గత దశాబ్దంలో ప్రత్యక్ష పన్ను వ్యవస్థ బలోపేతమైనప్పటికీ పన్ను చెల్లింపుదారుల సంఖ్యను మరింత విస్తరించే అవకాశాలు ఉన్నాయని నివేదిక తెలిపింది.
పన్ను చెల్లింపుదారుల సంఖ్యలో పెద్దగా పెరుగుదల లేదు
హైదరాబాద్కు చెందిన పన్ను నిపుణుడు ఎం. శ్రీనివాస్ రావు మాట్లాడుతూ, దేశంలో ఆదాయపు పన్ను చెల్లించే వారి సంఖ్య చాలా కాలంగా 6 నుంచి 7 కోట్ల మధ్యే కొనసాగుతోందన్నారు. ఈ సంఖ్యలో గణనీయమైన పెరుగుదల కనిపించలేదని, ఆదాయపు పన్ను శాఖ సాఫ్ట్వేర్లో ఉన్న కొన్ని సాంకేతిక సమస్యలను కూడా త్వరగా పరిష్కరించాల్సిన అవసరం ఉందని సూచించారు.
ప్రత్యక్ష పన్ను వసూళ్లలో గణనీయ వృద్ధి
2024-25 ఆర్థిక సంవత్సరంలో నికర ప్రత్యక్ష పన్ను వసూళ్లు రూ.22.3 లక్షల కోట్లకు చేరుకున్నాయి. ఇది 2023-24తో పోలిస్తే 13.7 శాతం వృద్ధిని నమోదు చేసింది. 2015-25 కాలంలో ప్రత్యక్ష పన్ను వసూళ్లు వార్షిక సగటున 12 శాతం చొప్పున పెరిగినట్లు నివేదిక వెల్లడించింది.
కార్పొరేట్ పన్నులను మించిన వ్యక్తిగత ఆదాయపు పన్ను
2024-25లో వ్యక్తిగత ఆదాయపు పన్ను వసూళ్లు రూ.12.4 లక్షల కోట్లకు చేరుకోగా, కార్పొరేట్ పన్ను వసూళ్లు రూ.9.9 లక్షల కోట్లుగా నమోదయ్యాయి. గత పదేళ్లలో వ్యక్తిగత ఆదాయపు పన్ను వసూళ్లు వార్షికంగా 17 శాతం వృద్ధి నమోదు చేయగా, కార్పొరేట్ పన్నులు 9 శాతం వృద్ధి మాత్రమే సాధించాయి.
జీడీపీలో ప్రత్యక్ష పన్నుల వాటా పెరుగుదల
దేశ జీడీపీలో ప్రత్యక్ష పన్నుల వాటా రికార్డు స్థాయిలో 6.7 శాతానికి చేరుకుంది. ఇది ఫిలిప్పీన్స్ (5.3 శాతం), ఇండోనేషియా (4 శాతం) వంటి దేశాలతో పోలిస్తే మెరుగైన స్థాయిలో ఉందని నివేదిక పేర్కొంది.
పన్ను చెల్లింపుదారుల సంఖ్య పెరగాలని నిపుణుల సూచన
ఢిల్లీకి చెందిన పన్ను నిపుణుడు అభిషేక్ అనేజా మాట్లాడుతూ, సాంకేతిక ఆధారిత పన్ను పరిపాలన, ఆర్థిక వ్యవస్థ క్రమబద్ధీకరణ వల్ల ప్రత్యక్ష పన్ను వసూళ్లు పెరుగుతున్నాయని చెప్పారు. ఇకపై పన్ను రేట్లు పెంచడం కంటే, మరిన్ని ఉద్యోగాలు, వ్యాపార అవకాశాలు సృష్టించడం ద్వారా పన్ను చెల్లింపుదారుల సంఖ్యను విస్తరించడంపై దృష్టి పెట్టాలని సూచించారు.