Loan: మీ జీతం, సిబిల్ స్కోర్ ఆధారంగా.. మీకు ఎంత ప‌ర్స‌న‌ల్ లోన్ వ‌స్తుందో తెలుసా.?

Loan: ముఖ్యంగా మంచి క్రెడిట్ స్కోర్ ఉంటే లోన్ ఆమోదం పొందే అవకాశం పెరుగుతుంది. అయితే ప్రతి బ్యాంకు తన సొంత నిబంధనల ప్రకారం రుణ మొత్తాన్ని నిర్ణయిస్తుంది.

జీతాన్ని బట్టి ఎంత పర్సనల్ లోన్ వస్తుంది?

సాధారణంగా కొన్ని బ్యాంకులు నెలవారీ జీతాన్ని ఆధారంగా చేసుకుని దాని 20 రెట్ల వరకు పర్సనల్ లోన్‌ను పరిగణనలోకి తీసుకుంటాయి. ఉదాహరణకు నెలకు రూ.25 వేల జీతం వస్తే సుమారు రూ.5 లక్షల వరకు, రూ.50 వేల జీతం ఉంటే రూ.10 లక్షల వరకు, రూ.75 వేల జీతం ఉంటే రూ.15 లక్షల వరకు రుణం లభించే అవకాశం ఉంటుంది. అయితే ఇది కచ్చితమైన నిబంధన కాదు. బ్యాంకును బట్టి మారవచ్చు. కొన్ని బ్యాంకులు పర్సనల్ లోన్‌ను రూ.25 లక్షల వరకు పరిమితం చేస్తే, మరికొన్ని రూ.40 లక్షలు లేదా రూ.50 లక్షల వరకు కూడా రుణం అందించవచ్చు. కాబట్టి జీతం ఎక్కువగా ఉంటే రుణ అర్హత పెరిగే అవకాశం ఉన్నా.. చివరగా బ్యాంకు నిబంధనలే కీలకం.

EMI ఎంత ఉండాలి? ఇతర రుణాలు కూడా చూస్తారు

లోన్ ఎంత వస్తుందనే దానికంటే.. దాన్ని తిరిగి చెల్లించడం ఎంత సులభంగా ఉంటుందనేది ముఖ్యమైన విషయం. ఆర్థిక నిపుణుల సూచన ప్రకారం మొత్తం EMIలు జీతంలో సగానికి మించకుండా చూసుకోవడం మంచిది. ఉదాహరణకు నెలకు రూ.25 వేల జీతం వస్తే EMI రూ.12,500కు మించకుండా ఉండేలా చూసుకోవాలి. అప్పుడే ఇంటి ఖర్చులు, పొదుపు ఇతర అవసరాలకు డబ్బు మిగులుతుంది. అలాగే ఇప్పటికే మీ పేరుపై హోమ్ లోన్, బైక్ లోన్ లేదా మరో పర్సనల్ లోన్ ఉంటే.. కొత్త రుణం ఇచ్చే సమయంలో బ్యాంకు వాటిని కూడా పరిగణనలోకి తీసుకుంటుంది. ప్రస్తుతం చెల్లిస్తున్న EMIలు ఎక్కువగా ఉంటే కొత్తగా తీసుకునే లోన్ మొత్తం తగ్గే అవకాశం ఉంటుంది.

CIBIL స్కోర్ కూడా చాలా ముఖ్యం

మీ జీతంతో పాటు CIBIL స్కోర్ కూడా పర్సనల్ లోన్ విషయంలో కీలకంగా ఉంటుంది. CIBIL స్కోర్ అనేది మీరు గతంలో తీసుకున్న రుణాలు, క్రెడిట్ కార్డు బిల్లులను ఎలా చెల్లించారో తెలిపే మూడు అంకెల స్కోర్. సాధారణంగా 750 లేదా అంతకంటే ఎక్కువ CIBIL స్కోర్‌ను మంచి స్కోర్‌గా పరిగణిస్తారు. మంచి స్కోర్ ఉంటే రుణం ఆమోదం పొందే అవకాశం పెరగవచ్చు. కొన్ని సందర్భాల్లో మెరుగైన వడ్డీ రేటు లభించే అవకాశం కూడా ఉంటుంది. గతంలో EMIలు, క్రెడిట్ కార్డు బిల్లులు సకాలంలో చెల్లించకపోవడం, ఎక్కువ రుణాలు తీసుకోవడం వంటి అంశాలు క్రెడిట్ స్కోర్‌పై ప్రభావం చూపవచ్చు. అందుకే కొత్త లోన్ కోసం దరఖాస్తు చేసే ముందు మీ క్రెడిట్ స్కోర్‌ను తెలుసుకోవడం మంచిది.

CIBIL స్కోర్‌ను ఇలా చెక్ చేసుకోవచ్చు

మీ CIBIL స్కోర్ తెలుసుకోవడానికి CIBIL అధికారిక వెబ్‌సైట్‌ను ఉపయోగించవచ్చు. అక్కడ ఉచిత CIBIL స్కోర్ చెక్ చేసే ఆప్షన్‌ను ఎంచుకుని అవసరమైన వివరాలను నమోదు చేయాలి. పేరు, PAN వివరాలు, పుట్టిన తేదీ, ఈమెయిల్ వంటి సమాచారం అడగవచ్చు. అనంతరం OTP ద్వారా వెరిఫికేషన్ పూర్తి చేయాలి. ప్రక్రియ పూర్తయిన తర్వాత మీ CIBIL స్కోర్‌తో పాటు క్రెడిట్ రిపోర్ట్‌ను చూడవచ్చు. అయితే CIBIL స్కోర్ బాగుంది కాబట్టి ఖచ్చితంగా అంత మొత్తం లోన్ వస్తుందని భావించకూడదు. మీ ఆదాయం, ఉద్యోగ స్థిరత్వం, ఇప్పటికే ఉన్న రుణాలు, EMI భారం, బ్యాంకు నిబంధనలు వంటి అన్ని అంశాలను పరిశీలించిన తర్వాతే తుది రుణ మొత్తాన్ని బ్యాంకు నిర్ణయిస్తుంది.