Petrol: పెట్రోల్, డీజీల్ కొనుగోళ్లపై ఆంక్ష‌లు.. 90 రోజుల పాటు ప్ర‌త్యేక నిబంధ‌న‌లు

Petrol: పశ్చిమాసియాలో నెలకొన్న ఉద్రిక్త పరిస్థితుల ప్రభావం ప్రపంచ ఇంధన సరఫరాపై పడుతోంది. ముడి చమురు రవాణాలో ఏర్పడే అంతరాయాలను దృష్టిలో ఉంచుకుని కేంద్ర ప్రభుత్వం ముందస్తు జాగ్రత్త చర్యలు చేపట్టింది. దేశవ్యాప్తంగా పెట్రోల్, డీజిల్ సరఫరా సాధారణ ప్రజలకు ఇబ్బంది లేకుండా కొనసాగేందుకు కొన్ని కొత్త మార్గదర్శకాలను అమలు చేయాలని నిర్ణయించింది.

ఇంధన నిల్వలపై కేంద్రం ప్రత్యేక దృష్టి

అంతర్జాతీయ పరిస్థితుల కారణంగా భవిష్యత్తులో ఇంధన సరఫరాపై ఒత్తిడి పెరిగే అవకాశం ఉందని కేంద్రం అంచనా వేస్తోంది. ఈ నేపథ్యంలో రిటైల్ పెట్రోల్ బంకుల వద్ద భారీ స్థాయిలో ఇంధనం కొనుగోలు చేసే విధానాన్ని నియంత్రించాలని నిర్ణయించింది. ప్రత్యేకంగా పరిశ్రమలు, వాణిజ్య అవసరాల కోసం పెద్ద మొత్తాల్లో డీజిల్, పెట్రోల్ కొనుగోలు చేస్తున్న వినియోగదారులపై ఈ చర్యలు ప్రభావం చూపనున్నాయి. సాధారణ వాహనదారులకు ఇంధన కొరత రాకుండా చూడడమే ఈ నిర్ణయం వెనుక ప్రధాన ఉద్దేశంగా అధికారులు చెబుతున్నారు.

బల్క్ ధరలు పెరగడంతో మారిన కొనుగోలు విధానం

ఇటీవలి కాలంలో బల్క్ ఇంధన ధరలు గణనీయంగా పెరగడంతో అనేక సంస్థలు ప్రత్యామ్నాయ మార్గాలను వెతుకుతున్నాయి. బల్క్ సరఫరాదారుల నుంచి కొనుగోలు చేయడం కంటే రిటైల్ పెట్రోల్ బంకుల నుంచి ఇంధనం తీసుకోవడం కొంత చౌకగా ఉండటంతో పరిశ్రమల వినియోగదారులు ఆ దిశగా మొగ్గు చూపుతున్నారు.

దీంతో కొన్ని ప్రాంతాల్లో పెట్రోల్ బంకుల వద్ద అసాధారణ స్థాయిలో డీజిల్ విక్రయాలు నమోదయ్యాయి. ఈ పరిస్థితి కొనసాగితే సాధారణ వినియోగదారులకు ఇంధన లభ్యతపై ప్రభావం పడే అవకాశం ఉందని కేంద్రం భావిస్తోంది.

రోజుకు 200 లీటర్లకు మించి డీజిల్ విక్రయించొద్దు

కొత్త మార్గదర్శకాల ప్రకారం ఒక వాహనం లేదా ఒకే కస్టమర్‌కు రోజుకు 200 లీటర్లకు మించి డీజిల్ విక్రయించకూడదని పెట్రోల్ బంకుల యాజమాన్యాలకు సూచనలు జారీ అయ్యాయి. అలాగే రిటైల్ అవుట్‌లెట్ల నుంచి కొనుగోలు చేసిన డీజిల్‌ను తిరిగి విక్రయించడం లేదా వాణిజ్య పంపిణీకి ఉపయోగించడం నిషేధించారు. భారీ స్థాయిలో ఇంధనం అవసరమయ్యే సంస్థలు తప్పనిసరిగా బల్క్ సరఫరా వ్యవస్థల ద్వారా మాత్రమే కొనుగోలు చేయాలని స్పష్టం చేశారు.

90 రోజుల పాటు అమలు.. పరిస్థితిని బట్టి పొడిగింపు

ఈ పరిమితులు ప్రాథమికంగా 90 రోజుల పాటు అమల్లో ఉండనున్నాయి. అంతర్జాతీయ మార్కెట్ పరిస్థితులు, ముడి చమురు సరఫరా స్థితిగతులను సమీక్షించిన తర్వాత అవసరమైతే ఈ గడువును మరింత పొడిగించే అవకాశం ఉందని కేంద్ర పెట్రోలియం శాఖ తెలిపింది. ప్రస్తుతం దేశంలో పెట్రోల్, డీజిల్ నిల్వలు తగిన స్థాయిలో ఉన్నప్పటికీ, భవిష్యత్తు అవసరాలను దృష్టిలో ఉంచుకుని ముందస్తు చర్యలు తీసుకుంటున్నామని అధికారులు పేర్కొంటున్నారు. ఈ నిర్ణయం వల్ల సాధారణ వాహనదారులకు ఎలాంటి ఇబ్బందులు ఉండవని, ఇంధన సరఫరా యథావిధిగా కొనసాగుతుందని ప్రభుత్వం స్పష్టం చేసింది.