PM Kisan : నేడే పీఎం కిసాన్ డబ్బుల విడుదల.. రూ.2000 రావాలంటే ఈ 5 తప్పులు అస్సలు ఉండకూడదు

PM Kisan : రైతులకు పెట్టుబడి సాయం అందించే లక్ష్యంతో కేంద్ర ప్రభుత్వం ప్రతిష్టాత్మకంగా అమలు చేస్తున్న పీఎం కిసాన్ సమ్మాన్ నిధి పథకం 23వ విడతకు సమయం ఆసన్నమైంది. పశ్చిమ బెంగాల్ పర్యటనలో భాగంగా ప్రధాని నరేంద్ర మోదీ శనివారం ఈ నిధులను నేరుగా రైతుల ఖాతాల్లోకి డిబిటి పద్ధతిలో బదిలీ చేయనున్నారు. దీని ద్వారా దేశవ్యాప్తంగా ఉన్న కోట్లాది మంది రైతు కుటుంబాలకు ఆర్థిక ఊరట లభించనుంది. అయితే సాంకేతిక లోపాల వల్ల కొందరి ఖాతాల్లో డబ్బులు జమ కాకపోవచ్చు.

ఈ-కేవైసీ తప్పనిసరి

పీఎం కిసాన్ లబ్ధిదారులందరికీ ఈ-కేవైసీ ప్రక్రియను కేంద్ర ప్రభుత్వం ఇదివరకే తప్పనిసరి చేసింది. ఎవరైతే ఈ ప్రక్రియను ఇంకా పూర్తి చేయలేదో వారి ఖాతాల్లో 23వ విడత సొమ్ము జమ కాదు. రైతులు తమ ఈ-కేవైసీని మూడు సులభమైన పద్ధతుల్లో పూర్తి చేసుకోవచ్చు. పీఎం కిసాన్ పోర్టల్ లేదా మొబైల్ యాప్ ద్వారా ఓటీపీ ఆధారంగా చేసుకోవచ్చు. లేదా సమీపంలోని సీఎస్‌సీ కేంద్రాలకు వెళ్లి బయోమెట్రిక్ ద్వారా పూర్తి చేయవచ్చు. లేదంటే మొబైల్ యాప్‌లో ఫేస్ అథెంటికేషన్ ద్వారా కూడా దీనిని పూర్తి చేసే వీలుంది.

రికార్డులలో సమాచారం సరిపోలకపోవడం

రైతుల వ్యక్తిగత వివరాల నమోదులో వచ్చే చిన్న చిన్న తప్పుల వల్ల కూడా నగదు బదిలీ ఆగిపోతుంది. మీ పేరు, పుట్టిన తేదీ, లింగం లేదా అధికారిక గుర్తింపు కార్డ్ నంబర్ వంటి వివరాలు పీఎం కిసాన్ రికార్డులలో, మీ ఒరిజినల్ ఐడీ కార్డులో ఒకేలా ఉండాలి. స్పెల్లింగ్ లో స్వల్ప తేడాలు ఉన్నా కంప్యూటర్ వెరిఫికేషన్ సిస్టమ్ దానిని తిరస్కరిస్తుంది. అందువల్ల ఆన్‌లైన్ డేటా బేస్ లో వివరాలన్నీ సరిగ్గా ఉన్నాయో లేదో రైతులు ముందే చూసుకోవాలి.

బ్యాంక్ ఖాతా, సీడింగ్ సమస్యలు

డబ్బులు నేరుగా బ్యాంక్ ఖాతాలో పడాలి కాబట్టి మీ బ్యాంక్ అకౌంట్ రన్నింగ్ లో ఉండటం చాలా ముఖ్యం. బ్యాంక్ ఖాతా బ్లాక్ అయినా, ఐఎఫ్‌ఎస్‌సీ కోడ్ తప్పుగా ఉన్నా నిధులు వెనక్కి వెళ్లిపోతాయి. అన్నింటికంటే ముఖ్యంగా మీ బ్యాంక్ ఖాతాకు మీ గుర్తింపు కార్డ్ లింక్ అయి ఉండాలి. డైరెక్ట్ బెనిఫిట్ ట్రాన్స్‌ఫర్ విజయవంతం కావడానికి బ్యాంక్ అకౌంట్ యాక్టివ్ గా ఉండటం ప్రాథమిక సూత్రం.

భూమి రికార్డుల వెరిఫికేషన్ పెండింగ్

ఈ పథకానికి అర్హత సాధించాలంటే సదరు రైతు పేరిట వ్యవసాయ భూమి ఉన్నట్లు రికార్డులు స్పష్టం చేయాలి. రాష్ట్ర ప్రభుత్వాల ఆధ్వర్యంలో జరిగే ల్యాండ్ రికార్డ్స్ వెరిఫికేషన్ ప్రక్రియ ఇంకా పెండింగ్ లో ఉంటే మీ రూ.2,000 నిలిచిపోతాయి. అలాగే సదరు భూమిని వ్యవసాయేతర పనులకు ఉపయోగిస్తున్నట్లు తేలితే ఆ రైతుకు ఈ పథకం వర్తించదు. భూమి యాజమాన్య హక్కుల పత్రాలు క్లియర్ గా ఉన్నవారికి మాత్రమే ఈ సాయం అందుతుంది.

అనర్హుల జాబితాలో ఉండటం

పీఎం కిసాన్ పథకం కేవలం పేద, మధ్యతరగతి రైతు కుటుంబాల కోసమే ఉద్దేశించబడింది. కాబట్టి కొన్ని వర్గాల ప్రజలను దీని నుంచి మినహాయించారు. ఆదాయపు పన్ను చెల్లించేవారు, ప్రభుత్వ ఉద్యోగులు (క్లాస్ 4 మినహా), రిటైర్డ్ పెన్షనర్లు, అలాగే డాక్టర్లు, ఇంజనీర్లు, లాయర్లు, చార్టర్డ్ అకౌంటెంట్లు వంటి వృత్తి నిపుణులు ఈ పథకానికి అనర్హులు. తనిఖీలలో ఎవరైనా అనర్హులుగా తేలితే వారి పేర్లను లబ్ధిదారుల జాబితా నుండి తొలగిస్తారు.

పీఎం కిసాన్ పథకం నేపథ్యం

రైతులకు సాగు ఖర్చుల కోసం ఏటా రూ.6,000 అందించే ఈ పథకాన్ని కేంద్ర ప్రభుత్వం 24 ఫిబ్రవరి 2019న ప్రారంభించింది. ఈ నగదును ప్రతి నాలుగు నెలలకు ఒకసారి రూ.2,000 చొప్పున మూడు సమాన విడతల్లో అందిస్తున్నారు. ఈ నిధులు ఎలాంటి దళారుల ప్రమేయం లేకుండా నేరుగా రైతుల ఖాతాలకే చేరుతాయి.

మీ పేమెంట్ స్టేటస్ ఇలా చెక్ చేసుకోండి

రైతులు తమ లబ్ధిదారుల స్థితిని తెలుసుకోవడానికి పీఎం కిసాన్ అధికారిక వెబ్‌సైట్‌ను సందర్శించాలి. అక్కడ Know Your Status అనే ఆప్షన్ పై క్లిక్ చేయాలి. ఆ తర్వాత మీ రిజిస్ట్రేషన్ నంబర్, స్క్రీన్ పై కనిపించే క్యాప్చా కోడ్‌ను నమోదు చేసి ఓటీపీని పొందాలి. ఆ ఓటీపీని ఎంటర్ చేసి Get Data పై క్లిక్ చేస్తే మీ ఈ-కేవైసీ స్టేటస్, బ్యాంక్ అకౌంట్ వివరాలు, రాబోయే విడత పూర్తి సమాచారం స్క్రీన్ పై కనిపిస్తుంది. అలాగే Beneficiary List ఆప్షన్ ద్వారా మీ గ్రామంలోని అర్హుల జాబితాను కూడా చూడవచ్చు.