Post Office MIS: ఏ ప‌ని చేయ‌క‌పోయినా.. ప్ర‌తీ నెల అకౌంట్లోకి డ‌బ్బులు. పోస్టాఫీస్‌లో అదిరిపోయే స్కీమ్

Post Office MIS: మార్కెట్‌లో అనిశ్చిత పరిస్థితులు, పెట్టుబడులపై రిస్క్ పెరుగుతున్న సమయంలో చాలా మంది సురక్షిత పెట్టుబడి మార్గాల కోసం చూస్తున్నారు. అలాంటి వారికి పోస్టాఫీస్ మంత్లీ ఇన్‌కమ్ స్కీమ్ (POMIS) మంచి ఎంపికగా చెప్పొచ్చు.

పోస్టాఫీస్ MIS స్కీమ్ అంటే ఏంటి?

పోస్టాఫీస్ మంత్లీ ఇన్‌కమ్ స్కీమ్ కేంద్ర ప్రభుత్వం మద్దతుతో నడిచే చిన్న పొదుపు పథకం. పెట్టుబడిపై ఎలాంటి మార్కెట్ రిస్క్ లేకుండా ప్రతి నెల స్థిరమైన ఆదాయం అందించడమే దీని ప్రధాన లక్ష్యం. ఈ స్కీమ్‌లో పెట్టిన డబ్బు పూర్తిగా సురక్షితంగా ఉంటుంది. అందుకే రిస్క్ తీసుకోవాలని అనుకోని పెట్టుబడిదారులు ఎక్కువగా ఈ స్కీమ్ వైపు మొగ్గు చూపుతున్నారు. ప్రస్తుతం ఈ పథకంపై సంవత్సరానికి 7.40 శాతం వడ్డీ అందిస్తున్నారు. ముఖ్యంగా ఈ వడ్డీని ప్రతి నెల పెట్టుబడిదారుల ఖాతాలో జమ చేస్తారు. దీంతో నెల నెలా ఖర్చులకు ఒక స్థిరమైన ఆదాయం లభిస్తుంది.

రూ.9 లక్షల పెట్టుబడిపై ఎంత ఆదాయం వస్తుంది?

ఈ స్కీమ్‌లో మీరు రూ.9 లక్షలు పెట్టుబడి పెడితే సంవత్సరానికి సుమారు రూ.66,600 వడ్డీ వస్తుంది. అంటే నెలకు దాదాపు రూ.5,550 మీ బ్యాంక్ ఖాతాలోకి జమ అవుతుంది. దీంతో ఉద్యోగం లేకపోయినా లేదా రిటైర్మెంట్ తర్వాత కూడా నెలకు ఒక స్థిరమైన ఆదాయం పొందవచ్చు.

అలాగే భార్యాభర్తలు కలిసి జాయింట్ అకౌంట్ ఓపెన్ చేస్తే మరింత ఎక్కువ పెట్టుబడి పెట్టే అవకాశం ఉంటుంది. జాయింట్ అకౌంట్‌లో గరిష్ట పెట్టుబడి పరిమితి రూ.15 లక్షలు. ఈ మొత్తంపై సంవత్సరానికి సుమారు రూ.1,11,000 వరకు వడ్డీ వస్తుంది. అంటే నెలకు దాదాపు రూ.9,250 వరకు ఆదాయం పొందవచ్చు.

పెట్టుబడి కాలవ్యవధి, ముఖ్యమైన నిబంధనలు

పోస్టాఫీస్ MIS స్కీమ్ కాలపరిమితి 5 సంవత్సరాలు. అంటే పెట్టుబడి చేసిన తేదీ నుంచి ఐదేళ్ల తర్వాత మొత్తం డబ్బును తిరిగి తీసుకోవచ్చు. కావాలనుకుంటే అదే మొత్తాన్ని మళ్లీ తిరిగి పెట్టుబ‌డి పెట్టి నెలవారీ ఆదాయాన్ని కొనసాగించవచ్చు. అయితే మెచ్యూరిటీకి ముందే డబ్బు తీసుకోవాలనుకుంటే కొంత పెనాల్టీ చెల్లించాల్సి ఉంటుంది. అందుకే పెట్టుబడి పెట్టే ముందు మీ ఆర్థిక అవసరాలను అంచనా వేసుకోవడం మంచిది.

ఈ స్కీమ్ ఎందుకు మంచి ఎంపిక?

ప్రస్తుతం షేర్ మార్కెట్, మ్యూచువల్ ఫండ్స్ వంటి పెట్టుబడుల్లో ఒడిదుడుకులు ఎక్కువగా కనిపిస్తున్నాయి. అలాంటి సమయంలో రిస్క్ లేకుండా ఖచ్చితమైన ఆదాయం అందించే పోస్టాఫీస్ MIS మంచి భరోసా కలిగించే స్కీమ్‌గా మారింది. ముఖ్యంగా వృద్ధులు, గృహిణులు, స్థిరమైన ఆదాయం కోరుకునే కుటుంబాలకు ఇది ఉపయోగకరంగా ఉంటుంది. తక్కువ రిస్క్‌తో ప్రతి నెల డబ్బు కావాలనుకునే వారికి పోస్టాఫీస్ మంత్లీ ఇన్‌కమ్ స్కీమ్ ఒక మంచి పెట్టుబడి మార్గంగా చెప్పొచ్చు.