PPFలో పెట్టుబడి పెడుతున్నారా? ఈ 5 తప్పులు చేస్తే లాభం తగ్గిపోతుంది..

PPF: సురక్షితమైన పెట్టుబడుల్లో పబ్లిక్ ప్రావిడెంట్ ఫండ్ (PPF) ఒక‌టి. ప్రస్తుతం ఈ పథకంపై ఏడాదికి 7.1 శాతం వడ్డీ లభిస్తోంది. అయితే కొన్ని చిన్న పొరపాట్లు చేస్తే వడ్డీ తగ్గిపోవచ్చు. కొన్ని సందర్భాల్లో ఖాతా కూడా యాక్టివ్‌గా ఉండదు. అందుకే ప్రతి PPF పెట్టుబడిదారుడు తప్పక తెలుసుకోవాల్సిన ముఖ్యమైన విషయాలు ఇవే.

ప్రతి ఆర్థిక సంవత్సరంలో కనీసం రూ.500 తప్పనిసరిగా జమ చేయాలి

PPF ఖాతా యాక్టివ్‌గా ఉండాలంటే ప్రతి ఆర్థిక సంవత్సరంలో కనీసం రూ.500 జమ చేయాలి. ఈ కనీస మొత్తాన్ని జమ చేయకపోతే అకౌంట్ యాక్టివ్‌గా ఉండదు. అలాంటి పరిస్థితిలో సాధారణంగా పెట్టుబడులు కొనసాగించడం కష్టమవుతుంది. తిరిగి ఖాతాను యాక్టివ్ చేయాలంటే జరిమానా చెల్లించి, సంబంధిత దరఖాస్తు ఇవ్వాల్సి ఉంటుంది.

ప్రతి నెల 5వ తేదీ తర్వాత డబ్బులు జమ చేయొద్దు

PPF ఖాతాకు వడ్డీ లెక్కింపు ప్రతి నెల 5వ తేదీ ఆధారంగా జరుగుతుంది. మీరు నెలలో 1 నుంచి 5వ తేదీ మధ్య డబ్బు జమ చేస్తే అదే నెల నుంచి వడ్డీ లెక్కలోకి వస్తుంది. కానీ 5వ తేదీ తర్వాత జమ చేస్తే ఆ నెలకు వడ్డీ లభించదు. తదుపరి నెల నుంచి మాత్రమే వడ్డీ లెక్కిస్తారు. అందుకే ప్రతి నెల 5వ తేదీకి ముందే డబ్బు జమ చేయడం వల్ల ఎక్కువ రాబడి పొందే అవకాశం ఉంటుంది.

ఏడాదికి రూ.1.5 లక్షలకు మించి పెట్టుబడి పెట్టకండి

ఒక ఆర్థిక సంవత్సరంలో PPF ఖాతాలో గరిష్టంగా రూ.1.5 లక్షలు మాత్రమే జమ చేయడానికి అనుమతి ఉంది. ఈ పరిమితిని మించి డబ్బు జమ చేస్తే అదనంగా చెల్లించిన మొత్తంపై వడ్డీ రాదు. అలాగే పన్ను మినహాయింపు ప్రయోజనం కూడా ఉండదు. అందువల్ల పెట్టుబడి చేసే ముందు మొత్తం ఎంత జమ చేశామో ఒకసారి పరిశీలించడం మంచిది.

ఒకరి పేరుతో ఒకటి కంటే ఎక్కువ PPF ఖాతాలు తెరవకండి

కొంతమంది వేర్వేరు బ్యాంకులు లేదా పోస్టాఫీసుల్లో ఒకటి కంటే ఎక్కువ PPF ఖాతాలు తెరిస్తే ఎక్కువ ప్రయోజనం ఉంటుందని భావిస్తారు. కానీ నిబంధనల ప్రకారం ఒక వ్యక్తి పేరుతో ఒకే ఒక్క PPF ఖాతా మాత్రమే ఉండాలి. ఒకటి కంటే ఎక్కువ ఖాతాలు ఉన్నట్లు గుర్తిస్తే అదనపు ఖాతాపై నిబంధనల ప్రకారం చర్యలు తీసుకునే అవకాశం ఉంది. దీంతో వడ్డీ, ఇతర ప్రయోజనాలు కూడా ప్రభావితమయ్యే అవకాశం ఉంటుంది.

డబ్బు తీసుకోవడం లేదా ఖాతా క్లోజ్ చేయ‌డం మంచిది కాదు

PPF పథకం 15 సంవత్సరాల లాక్-ఇన్ కాలంతో ఉంటుంది. అయితే కొన్ని ప్రత్యేక పరిస్థితుల్లో మాత్రమే ముందుగానే ఖాతా మూసివేసే అవకాశం ఉంటుంది. ఉదాహరణకు తీవ్రమైన అనారోగ్యం, పిల్లల ఉన్నత విద్య లేదా విదేశాల్లో స్థిరపడాల్సిన పరిస్థితుల్లో ఐదు ఆర్థిక సంవత్సరాలు పూర్తయిన తర్వాత ఖాతా మూసివేయవచ్చు.

అయితే గడువు ముగియకముందే ఖాతా మూసివేస్తే ప్రభుత్వం వడ్డీపై 1 శాతం కోత విధిస్తుంది. అందుకే పూర్తి నిబంధనలు తెలుసుకున్న తర్వాతే డబ్బు ఉపసంహరించుకోవడం లేదా ఖాతా మూసివేయడం మంచిది.

PPFలో ఎక్కువ లాభం పొందాలంటే..

PPFలో పెట్టుబడి పెట్టడం మాత్రమే కాదు, నిబంధనలను సరిగ్గా పాటించడం కూడా అంతే ముఖ్యం. ప్రతి సంవత్సరం కనీస మొత్తం జమ చేయడం, ప్రతి నెల 5వ తేదీకి ముందే పెట్టుబడి పెట్టడం, రూ.1.5 లక్షల పరిమితిని దాటకపోవడం, ఒకే ఖాతాను కొనసాగించడం, ముందస్తు ఉపసంహరణ నిబంధనలు తెలుసుకోవడం వంటి జాగ్రత్తలు తీసుకుంటే ఈ ప్రభుత్వ పథకం ద్వారా దీర్ఘకాలంలో మంచి రాబడితో పాటు పన్ను మినహాయింపు ప్రయోజనాలను కూడా పూర్తిగా పొందవచ్చు.