సెకండ్ హ్యాండ్ వాహనం కొన్నారా? ఈ తప్పు చేస్తే ఇన్సూరెన్స్ డబ్బులు రావు..!

RC Insurance Name Mismatch: వాహనం రిజిస్ట్రేషన్ సర్టిఫికెట్ (ఆర్‌సీ), ఇన్సూరెన్స్ పాలసీలలో పేర్లు సరిపోలకపోవడం చిన్న సమస్యగా కనిపించవచ్చు. ప్రమాదం జరిగి క్లెయిమ్ చేసుకునే సమయంలో ఇది తీవ్రమైన సమస్యలకు దారితీస్తుంది. అక్షర దోషాలు లేదా సెకండ్ హ్యాండ్ వాహనాల కొనుగోలు వల్ల వచ్చే ఈ వ్యత్యాసాన్ని సరిదిద్దుకునే విధానం గురించి వాహనదారులు తప్పక తెలుసుకోవాలి.

పేర్లలో వ్యత్యాసాలు ఎందుకు వస్తాయి?

వాహన యాజమాన్యాన్ని ధ్రువీకరించే అత్యంత కీలకమైన పత్రం ఆర్‌సీ, కాగా ఆ వాహనానికి రక్షణ కల్పించే ఒప్పందం ఇన్సూరెన్స్ పాలసీ. సాధారణంగా స్పెల్లింగ్ లోపాలు, ఇంటి పేరు లేదా మధ్య పేరు నమోదులో వచ్చే తేడాల వల్ల పేర్లలో స్వల్ప వ్యత్యాసం ఏర్పడవచ్చు. మరికొన్ని సందర్భాల్లో సెకండ్ హ్యాండ్ వాహనాలు కొనుగోలు చేసినప్పుడు ఆర్‌సీని తమ పేరు మీద మార్చుకుని, ఇన్సూరెన్స్ పాలసీని పాత యజమాని పేరుపైనే వదిలేస్తుంటారు. ఇలాంటి పరిస్థితుల్లో ప్రమాదం జరిగినప్పుడు లేదా క్లెయిమ్ దాఖలు చేసినప్పుడు బీమా కంపెనీలు పరిశీలనలో ఈ వ్యత్యాసాన్ని గుర్తించి అదనపు ఆధారాలు, స్పష్టత కోరడం వల్ల ప్రక్రియ తీవ్రంగా ఆలస్యమవుతుంది.

స్వల్ప అక్షర దోషాలు ఉంటే ఏం చేయాలి?

పేర్లలో ఒక అక్షరం మారినా, ఇంటి పేరు పొడి అక్షరాలతో ఉన్నా క్లెయిమ్ వెంటనే రద్దవుతుందని ఆందోళన చెందాల్సిన పనిలేదు. రెండు పత్రాలు ఒకే వ్యక్తికి చెందినవని నిర్ధారించేందుకు అవసరమైన గుర్తింపు పత్రాలు సమర్పించాల్సి ఉంటుంది. వాహనదారులు తమ ఆర్‌సీతో పాటు పాన్ కార్డు, ఆధార్ లేదా ఇతర ప్రభుత్వ గుర్తింపు కార్డులను బీమా సంస్థకు సమర్పించి తప్పులను వెంటనే సరిచేయించుకోవచ్చు. ప్రమాదాలు జరిగి క్లెయిమ్ అవసరమయ్యే వరకు వేచి చూడకుండా ముందుగానే ఈ వివరాలు సరిచేసుకోవడం శ్రేయస్కరం.

పాత వాహనం కొన్నప్పుడు పాలసీ బదిలీ తప్పనిసరి..

సెకండ్ హ్యాండ్ వాహనం కొనుగోలు చేసినప్పుడు ఆర్‌సీ బదిలీ పూర్తి కాగానే సరిపోదు. వాహన బదిలీ పత్రాలు, నవీకరించిన ఆర్‌సీ, గుర్తింపు కార్డులు, అవసరమైన బదిలీ ఫారమ్‌లను సమర్పించి ఇన్సూరెన్స్ పాలసీని కూడా కొనుగోలుదారుడి పేరు మీదకు బదిలీ చేయించుకోవాలి. కొత్తగా మారిన పాలసీ కాపీని డౌన్‌లోడ్ చేసుకుని వివరాలన్నీ సరిగ్గా ఉన్నాయో లేదో పరిశీలించాలి.

పాలసీ పునరుద్ధరణ లేదా ప్రమాదం జరిగే వరకు వేచి చూడకుండా ఆర్‌సీ, ఇన్సూరెన్స్ పత్రాలలో పేరు సరిగ్గా ఉండేలా చూసుకోవాలి. రెండు చోట్లా ఒకే వివరాలు ఉండటం వల్ల భవిష్యత్తులో క్లెయిమ్ చేసుకునే సమయంలో ఎటువంటి ఇబ్బందులు లేకుండా బీమా పరిహారం వేగంగా అందుతుంది.