Sabarimala Special Trains: శబరిమల భక్తులకు గుడ్ న్యూస్.. హైదరాబాద్, చర్లపల్లి నుంచి 54 ప్రత్యేక రైళ్లు
Sabarimala Special Trains: శబరిమల అయ్యప్ప భక్తుల కోసం హైదరాబాద్, చర్లపల్లి, నాందేడ్ నుంచి కొల్లాంకు 54 ప్రత్యేక రైళ్లను దక్షిణ మధ్య రైల్వే ప్రకటించింది. తేదీలు, టైమింగ్స్, స్టాపేజీలు తెలుసుకోండి.
Sabarimala Special Trains: శబరిమల భక్తులకు గుడ్ న్యూస్.. హైదరాబాద్, చర్లపల్లి నుంచి 54 ప్రత్యేక రైళ్లు
Sabarimala Special Trains: శబరిమల అయ్యప్ప స్వామి దర్శనానికి వెళ్లే భక్తులకు దక్షిణ మధ్య రైల్వే శుభవార్త అందించింది. 2026 మండల-మకరవిళక్కు తీర్థయాత్ర సీజన్‌లో భక్తుల రద్దీని దృష్టిలో పెట్టుకుని ప్రత్యేక రైళ్లను నడపాలని నిర్ణయించింది. హైదరాబాద్, చర్లపల్లి, నాందేడ్ నుంచి కేరళలోని కొల్లాంకు మొత్తం 54 ప్రత్యేక రైళ్లను అందుబాటులోకి తీసుకురానుంది. నవంబర్ 2026 నుంచి జనవరి 2027 వరకు ఈ సర్వీసులు నడవనున్నాయి. దీంతో తెలంగాణ, ఆంధ్రప్రదేశ్, మహారాష్ట్రకు చెందిన అయ్యప్ప భక్తులకు ప్రయాణ సౌకర్యం మెరుగుపడనుంది.
హైదరాబాద్ – కొల్లాం ప్రత్యేక రైళ్లు
రైలు నంబర్ 07193 (హైదరాబాద్ – కొల్లాం) డిసెంబర్ 5, 12, 19, 26 తేదీల్లో శనివారాల్లో రాత్రి 11.10 గంటలకు హైదరాబాద్ నుంచి బయలుదేరి సోమవారం ఉదయం 7.15 గంటలకు కొల్లాం చేరుకుంటుంది.
తిరుగు ప్రయాణంలో రైలు నంబర్ 07194 (కొల్లాం – హైదరాబాద్) డిసెంబర్ 7, 14, 21, 28 తేదీల్లో సోమవారాల్లో ఉదయం 10.55 గంటలకు కొల్లాం నుంచి బయలుదేరి మంగళవారం సాయంత్రం 6.30 గంటలకు హైదరాబాద్ చేరుకుంటుంది.
ఈ రైళ్లు సికింద్రాబాద్, చర్లపల్లి, నల్గొండ, మిర్యాలగూడ, నడికుడి, పిడుగురాళ్ల, గుంటూరు, తెనాలి, బాపట్ల, చీరాల, ఒంగోలు, నెల్లూరు, పెరంబూర్, అరక్కోణం, కాట్పాడి, జోలార్‌పెట్టై, సేలం, ఈరోడ్, తిరుప్పూర్, పొదనూరు, పాలక్కాడ్, త్రిస్సూర్, అలువా, ఎర్నాకులం టౌన్, కొట్టాయం, చంగనాశేరి, తిరువల్లా, చెంగన్నూర్, మావేలికర, కాయంకుళం స్టేషన్లలో ఆగుతాయి.
చర్లపల్లి – కొల్లాం ప్రత్యేక రైళ్ల వివరాలు
చర్లపల్లి నుంచి కొల్లాంకు పలు ప్రత్యేక సర్వీసులను రైల్వే ప్రకటించింది.
07180: నవంబర్ 20, 27, డిసెంబర్ 4, 11, 18, 25 తేదీల్లో రాత్రి 11.45 గంటలకు చర్లపల్లి నుంచి బయలుదేరి ఆదివారం ఉదయం 7.55 గంటలకు కొల్లాం చేరుకుంటుంది.
07181: నవంబర్ 22, 29, డిసెంబర్ 6, 13, 20, 27 తేదీల్లో ఉదయం 10.55 గంటలకు కొల్లాం నుంచి బయలుదేరి మరుసటి రోజు సాయంత్రం 7 గంటలకు చర్లపల్లి చేరుకుంటుంది.
07195: నవంబర్ 22, 29, డిసెంబర్ 6, 13, 20, 27 తేదీలతో పాటు 2027 జనవరి 3, 10, 17 తేదీల్లో రాత్రి 11.45 గంటలకు చర్లపల్లి నుంచి బయలుదేరి మంగళవారం ఉదయం 7.55 గంటలకు కొల్లాం చేరుకుంటుంది.
07196: నవంబర్ 24, డిసెంబర్ 1, 8, 15, 22, 29 తేదీలతో పాటు 2027 జనవరి 5, 12, 19 తేదీల్లో ఉదయం 10.55 గంటలకు కొల్లాం నుంచి బయలుదేరి బుధవారం సాయంత్రం 7 గంటలకు చర్లపల్లి చేరుకుంటుంది.
07197: డిసెంబర్ 2, 9, 16, 23 తేదీల్లో రాత్రి 11.45 గంటలకు చర్లపల్లి నుంచి బయలుదేరి శుక్రవారం ఉదయం 7.55 గంటలకు కొల్లాం చేరుకుంటుంది.
07198: డిసెంబర్ 4, 11, 18, 25 తేదీల్లో ఉదయం 10.55 గంటలకు కొల్లాం నుంచి బయలుదేరి శనివారం సాయంత్రం 7 గంటలకు చర్లపల్లి చేరుకుంటుంది.
ఈ సర్వీసులు నల్గొండ, మిర్యాలగూడ, నడికుడి, పిడుగురాళ్ల, గుంటూరు, తెనాలి, బాపట్ల, చీరాల, ఒంగోలు, నెల్లూరు తదితర స్టేషన్ల మీదుగా ప్రయాణిస్తాయి. అలాగే తమిళనాడు, కేరళలోని పలు ప్రధాన స్టేషన్లలోనూ ఆగుతాయి. కొన్ని రైళ్లకు కరునాగపల్లి, శాస్తాంకొట్ట స్టేషన్లలో కూడా స్టాపేజీలు ఉంటాయి.
చర్లపల్లి – కొల్లాం మరో ప్రత్యేక సర్వీస్
రైలు నంబర్ 07199 (చర్లపల్లి – కొల్లాం) నవంబర్ 30వ తేదీతో పాటు డిసెంబర్ 6, 13 తేదీల్లో నడవనున్నట్లు రైల్వే వివరాల్లో పేర్కొంది. నవంబర్ 30న రాత్రి 10.40 గంటలకు చర్లపల్లి నుంచి బయలుదేరి శుక్రవారం ఉదయం 7.55 గంటలకు కొల్లాం చేరుకుంటుందని సమాచారం.
తిరుగు ప్రయాణంలో రైలు నంబర్ 07200 (కొల్లాం – చర్లపల్లి) 2027 జనవరి 1, 8, 15 తేదీల్లో ఉదయం 10.55 గంటలకు కొల్లాం నుంచి బయలుదేరి శనివారం సాయంత్రం 7 గంటలకు చర్లపల్లి చేరుకుంటుంది.
ఈ రైళ్లు భువనగిరి, జనగాం, కాజీపేట, వరంగల్, కేసముద్రం, మహబూబాబాద్, డోర్నకల్, ఖమ్మం, విజయవాడ, తెనాలి, బాపట్ల, చీరాల, ఒంగోలు, నెల్లూరు తదితర స్టేషన్ల మీదుగా ప్రయాణిస్తాయి. కేరళలోని ప్రధాన స్టేషన్లతో పాటు కరునాగపల్లి, శాస్తాంకొట్టలోనూ ఆగుతాయి.
నాందేడ్ – కొల్లాం ప్రత్యేక రైలు
మహారాష్ట్ర నుంచి శబరిమల వెళ్లే భక్తుల కోసం నాందేడ్ నుంచి కూడా ప్రత్యేక రైలును ఏర్పాటు చేశారు. రైలు నంబర్ 07189 (నాందేడ్ – కొల్లాం) నవంబర్ 15, 2026 ఆదివారం సాయంత్రం 5.15 గంటలకు నాందేడ్ నుంచి బయలుదేరి మంగళవారం ఉదయం 7.55 గంటలకు కొల్లాం చేరుకుంటుంది.
తిరుగు ప్రయాణంలో రైలు నంబర్ 07190 (కొల్లాం – చర్లపల్లి) నవంబర్ 17, మంగళవారం ఉదయం 10.55 గంటలకు కొల్లాం నుంచి బయలుదేరి బుధవారం సాయంత్రం 7 గంటలకు చర్లపల్లి చేరుకుంటుంది.
ఈ రైళ్లు ముద్ఖేడ్, బాసర, నిజామాబాద్, కామారెడ్డి, చర్లపల్లి (07189 రైలులో మాత్రమే), నల్గొండ, మిర్యాలగూడ, నడికుడి, పిడుగురాళ్ల, గుంటూరు, తెనాలి, బాపట్ల, చీరాల, ఒంగోలు, నెల్లూరు తదితర స్టేషన్లలో ఆగుతాయి. అనంతరం తమిళనాడు మీదుగా కేరళలోని కొల్లాంకు చేరుకుంటాయి.
ప్రత్యేక రైళ్లలో కోచ్‌ల వివరాలు
భక్తుల సౌకర్యార్థం ప్రత్యేక రైళ్లలో వివిధ తరగతుల కోచ్‌లను ఏర్పాటు చేశారు.
07193/07194, 07180/07181, 07197/07198: సెకండ్ ఏసీ, థర్డ్ ఏసీ, స్లీపర్ క్లాస్, జనరల్ సెకండ్ క్లాస్.
07195/07196: ఫస్ట్ ఏసీ, సెకండ్ ఏసీ, థర్డ్ ఏసీ.
07199/07200: సెకండ్ ఏసీ, థర్డ్ ఏసీ, స్లీపర్ క్లాస్, జనరల్ సెకండ్ క్లాస్.
07189/07190: ఫస్ట్ ఏసీ, సెకండ్ ఏసీ, థర్డ్ ఏసీ, స్లీపర్ క్లాస్, జనరల్ సెకండ్ క్లాస్.
శబరిమల మండల-మకరవిళక్కు సీజన్‌లో అయ్యప్ప భక్తుల రద్దీ అధికంగా ఉండే అవకాశం ఉన్నందున ఈ ప్రత్యేక రైళ్లు ఎంతో ఉపయోగపడనున్నాయి. తెలంగాణ, ఆంధ్రప్రదేశ్, మహారాష్ట్ర నుంచి కేరళకు వెళ్లే భక్తులకు అదనపు రైలు సదుపాయం కల్పించడం ద్వారా సాధారణ రైళ్లపై ఒత్తిడి తగ్గే అవకాశం ఉంది.
ఈ ప్రత్యేక రైళ్ల వివరాలను దక్షిణ మధ్య రైల్వే చీఫ్ పబ్లిక్ రిలేషన్స్ ఆఫీసర్ (CPRO) ఏ. శ్రీధర్ వెల్లడించారు.