Saving Scheme: రోజుకు రూ. 333 పొదుపు చేస్తే రూ. 17 ల‌క్ష‌లు.. బెస్ట్ సేవింగ్ స్కీమ్

Saving Scheme: పోస్టాఫీస్ అందిస్తోన్న బెస్ట్ సేవింగ్ స్కీమ్స్‌లో రికరింగ్ డిపాజిట్ (RD) స్కీమ్ ఒక‌టి. సురక్షిత పెట్టుబడి, ప్రభుత్వ హామీ, స్థిరమైన వడ్డీ కారణంగా చాలా మంది ఈ స్కీమ్ వైపు మొగ్గు చూపుతున్నారు. రోజుకు కేవలం రూ.333 సేవ్ చేస్తే రూ.17 లక్షలు అవుతుంది.

పోస్టాఫీస్ RD స్కీమ్ అంటే ఏమిటి?

పోస్టాఫీస్ రికరింగ్ డిపాజిట్ (RD) అనేది ప్రతి నెలా ఒక నిర్దిష్ట మొత్తాన్ని జమ చేస్తూ పొదుపు చేసే పథకం. చిన్న మొత్తాలతో ప్రారంభించి దీర్ఘకాలంలో మంచి ఫండ్ సృష్టించుకోవచ్చు. ఈ స్కీమ్‌కు భారత ప్రభుత్వ హామీ ఉండటం వల్ల పెట్టుబడి పూర్తిగా సురక్షితంగా భావిస్తారు. షేర్ మార్కెట్, మ్యూచువల్ ఫండ్ల మాదిరిగా మార్కెట్ హెచ్చుతగ్గుల ప్రభావం ఇందులో ఉండదు.

ప్రస్తుతం ఎంత వడ్డీ లభిస్తోంది?

ప్రస్తుతం పోస్టాఫీస్ RDపై సంవత్సరానికి 6.7 శాతం వడ్డీ లభిస్తోంది. ఇందులో చక్రవడ్డీ (కంపౌండింగ్) ప్రయోజనం కూడా ఉంటుంది. అంటే వడ్డీపైన కూడా మళ్లీ వడ్డీ వస్తుంది. ఈ స్కీమ్‌లో నెలకు కనీసం రూ.100తోనే ఖాతా ప్రారంభించవచ్చు. చిన్న మొత్తాలతో కూడా దీర్ఘకాలంలో మంచి రాబడి పొందే అవకాశం ఉంటుంది.

ఎవరు ఖాతా తెరవొచ్చు?

ఏ భారతీయ వయోజనుడైనా పోస్టాఫీస్ RD ఖాతా ప్రారంభించవచ్చు. అలాగే 10 ఏళ్లు దాటిన పిల్లల పేరుతో కూడా తల్లిదండ్రులు లేదా గార్డియన్ ఖాతా తెరవొచ్చు. పిల్లవాడు లేదా పిల్ల 18 ఏళ్లు పూర్తి చేసిన తర్వాత ఆ ఖాతాను స్వయంగా నిర్వహించుకునే అవకాశం ఉంటుంది.

అవసరమైతే లోన్ సదుపాయం కూడా

ఈ స్కీమ్‌లో మరో ముఖ్యమైన ప్రయోజనం లోన్ సదుపాయం. ఖాతా ప్రారంభించి కనీసం ఒక సంవత్సరం పూర్తయితే, జమ చేసిన మొత్తంలో 50 శాతం వరకు రుణం తీసుకోవచ్చు. ఈ లోన్‌పై వడ్డీ రేటు RD వడ్డీ కంటే కేవలం 2 శాతం మాత్రమే ఎక్కువగా ఉంటుంది. అలాగే అవసరమైతే 3 సంవత్సరాల తర్వాత ఖాతాను ముందుగానే మూసివేసే అవకాశం కూడా ఉంటుంది.

10 ఏళ్లలో రూ.17 లక్షలు ఎలా వస్తాయి?

రోజుకు సుమారు రూ.333 సేవ్ చేస్తే నెలకు రూ.10,000 పెట్టుబడి పెట్టినట్లవుతుంది. ఇలా ప్రతి నెలా రూ.10,000 చొప్పున 5 ఏళ్ల పాటు జమ చేస్తే మొత్తం పెట్టుబడి రూ.6 లక్షలు అవుతుంది. 6.7 శాతం వడ్డీ ప్రకారం దానిపై సుమారు రూ.1.13 లక్షల వడ్డీ లభిస్తుంది. దీంతో 5 ఏళ్ల తర్వాత మొత్తం రూ.7.13 లక్షల వరకు వస్తుంది.

అదే పెట్టుబడిని మరో 5 ఏళ్ల పాటు కొనసాగిస్తే మొత్తం పెట్టుబడి రూ.12 లక్షలు అవుతుంది. కంపౌండింగ్ ప్రయోజనంతో వడ్డీ భారీగా పెరిగి సుమారు రూ.5.08 లక్షలకు చేరుతుంది. దీంతో 10 ఏళ్లు పూర్తయ్యే సరికి మొత్తం ఫండ్ దాదాపు రూ.17.08 లక్షలు అవుతుంది. చిన్న చిన్న పొదుపులతో భవిష్యత్తులో పెద్ద మొత్తాన్ని కూడబెట్టాలనుకునే ఉద్యోగులు, గృహిణులు, సురక్షిత పెట్టుబడులు కోరుకునే వారికి పోస్టాఫీస్ RD మంచి ఎంపికగా భావిస్తున్నారు.