SIP Calculator: నెల‌కు వెయ్యి రూపాయ‌లు పెట్టుబ‌డి పెడితే.. 25 ఏళ్ల‌కు ఎంత అవుతుందో తెలుసా?

SIP Calculator: చాలా మంది మ్యూచువల్ ఫండ్లలో పెద్ద మొత్తంలో పెట్టుబడి పెడితేనే మంచి సంపద సృష్టించుకోవచ్చని భావిస్తారు. కానీ అది పూర్తిగా నిజం కాదు. చిన్న మొత్తంతో మొదలుపెట్టి, క్రమం తప్పకుండా పెట్టుబడి పెడితే కూడా భవిష్యత్తులో మంచి ఫండ్‌ను తయారు చేసుకోవచ్చ‌ని మీకు తెలుసా.?

నెలకు రూ.999 SIP చేస్తే ఎంత ఫండ్ వస్తుంది?

ప్రతి నెలా రూ.999 చొప్పున SIPలో పెట్టుబడి పెడితే, వచ్చే రాబడి రేటు, పెట్టుబడి కాలాన్ని బట్టి ఫండ్ విలువ పెరుగుతుంది. ఏడాదికి 12% అంచనా రాబడి వస్తే 10 ఏళ్లలో మీ మొత్తం పెట్టుబడి సుమారు రూ.1.20 లక్షలు – అంచనా ఫండ్ రూ.2.30 లక్షలు అవుతుంది. 15 ఏళ్లకు అయితే.. మొత్తం పెట్టుబడి రూ.1.80 లక్షలు – అంచనా ఫండ్ రూ.5 లక్షలు అవుతుంది. 20 ఏళ్లుకు లెక్క‌పెడితే మొత్తం పెట్టుబడి రూ.2.40 లక్షలు – అంచనా ఫండ్ రూ.10 లక్షలు అవుతుంది.

ఇక 25 ఏళ్ల విష‌యానికొస్తే.. మొత్తం పెట్టుబడి సుమారు రూ.3 లక్షలు – అంచనా ఫండ్ రూ.19 లక్షలు అవుతుంది. ఒక‌వేళ 15% అంచనా రాబడి వస్తే 10 ఏళ్లకు మొత్తం పెట్టుబడి రూ.1.20 లక్షలు – అంచనా ఫండ్ రూ.2.80 లక్షలు అవుతుంది. అదే 15 ఏళ్లకు అయితే.. మొత్తం పెట్టుబడి రూ.1.80 లక్షలు – అంచనా ఫండ్ రూ.7.50 లక్షలు, ఇక 20 ఏళ్లు అయితే.. మొత్తం పెట్టుబడి రూ.2.40 లక్షలు – అంచనా ఫండ్ రూ.15.13 లక్షలు అవుతుంది. 25 ఏళ్లకు చూస్తే.. మొత్తం పెట్టుబడి సుమారు రూ.3 లక్షలు – అంచనా ఫండ్ రూ.32.81 లక్షలు అవుతుంది.

కంపౌండింగ్ వల్ల పెట్టుబడి ఎలా పెరుగుతుంది?

SIPలో అతిపెద్ద ప్రయోజనం కంపౌండింగ్. అంటే మీరు పెట్టిన అసలు పెట్టుబడిపైనే కాకుండా, ఇప్పటికే వచ్చిన లాభాలపై కూడా మళ్లీ లాభం వస్తుంది. ఉదాహరణకు, మీరు 20 లేదా 25 సంవత్సరాల పాటు పెట్టుబడిని కొనసాగిస్తే, మీరు పెట్టిన మొత్తం కంటే చాలా రెట్లు ఎక్కువగా ఫండ్ పెరిగే అవకాశం ఉంటుంది. అందుకే పెట్టుబడిని ఎంత త్వరగా ప్రారంభిస్తే, అంత ఎక్కువ ప్రయోజనం పొందవచ్చు.

స్టెప్-అప్ SIP చేస్తే ఇంకా ఎక్కువ సంపద

ఉద్యోగంలో జీతం పెరిగినప్పుడు SIP మొత్తాన్ని కూడా ప్రతి సంవత్సరం కొంత పెంచితే దానిని స్టెప్-అప్ SIP అంటారు. ఉదాహరణకు, మొదటి సంవత్సరం నెలకు రూ.999 పెట్టుబడి పెట్టి, ప్రతి ఏడాది దాన్ని 10 శాతం పెంచుతూ వెళితే, 20 సంవత్సరాల తర్వాత సాధారణ SIPతో పోలిస్తే మరింత పెద్ద ఫండ్ ఏర్పడే అవకాశం ఉంటుంది. కొన్ని అంచనాల ప్రకారం, ఈ విధానంలో రూ.22 లక్షలకు పైగా అదనపు ఫండ్ కూడా లభించవచ్చు. ఆదాయం పెరిగిన కొద్దీ SIP పెంచడం మంచి పెట్టుబడి వ్యూహంగా భావిస్తారు.

SIP ప్రారంభించే ముందు గుర్తుంచుకోవాల్సిన విషయాలు

SIPలో పెట్టుబడి పెట్టే ముందు కొన్ని విషయాలను గుర్తుంచుకోవాలి. చిన్న మొత్తంతో ప్రారంభించినా, పెట్టుబడిని క్రమం తప్పకుండా కొనసాగించడం ముఖ్యం. దీర్ఘకాలం పెట్టుబడి పెడితే కంపౌండింగ్ ప్రభావం ఎక్కువగా ఉంటుంది. SIP ద్వారా వచ్చే రాబడి మార్కెట్ పరిస్థితులపై ఆధారపడి ఉంటుంది. 12% లేదా 15% రాబడి కేవలం అంచనా మాత్రమే. వాస్తవ రాబడి ఎక్కువగా లేదా తక్కువగా ఉండవచ్చు. పెట్టుబడి నిర్ణయం తీసుకునే ముందు మీ ఆర్థిక లక్ష్యాలను పరిశీలించి, అవసరమైతే ఆర్థిక సలహాదారుని సంప్రదించడం మంచిది.

గమనిక: మ్యూచువల్ ఫండ్లు మార్కెట్ రిస్క్‌కు లోబడి ఉంటాయి. పైన పేర్కొన్న‌ లెక్కలు కేవలం అంచనా రాబడిని ఆధారంగా తీసుకుని రూపొందించ‌డ‌మైంది. నిజమైన రాబడి మార్కెట్ పరిస్థితులు, ఎంచుకున్న ఫండ్ పనితీరును బట్టి మారవచ్చు.