Steel Prices: నాలుగేళ్ల గరిష్ఠానికి ఉక్కు ధరలు.. ఇంకా పెరగొచ్చా?

Steel Prices: దేశీయ మార్కెట్లో ఉక్కు ధరలు ఒక్కసారిగా జోరందుకున్నాయి. ముడి సరుకుల ధరలు పెరగడం, రుతుపవనాల తర్వాత నిర్మాణ రంగంలో డిమాండ్ పుంజుకోవడం వంటి కారణాలతో స్టీల్ ధరలు నాలుగేళ్ల గరిష్ఠ స్థాయికి చేరుకున్నాయి. ఈ ధరల పెరుగుదల ప్రస్తుత ఆర్థిక సంవత్సరం మిగిలిన కాలంలోనూ కొనసాగే అవకాశం ఉందని మార్కెట్ పరిశోధనా సంస్థ బిగ్‌మింట్ (BigMint) తన నివేదికలో పేర్కొంది.

HRC, CRC ధరలు ఎక్కడికి చేరాయంటే?

ప్రపంచవ్యాప్తంగా విస్తృతంగా వినియోగించే ఫ్లాట్ స్టీల్ ఉత్పత్తులైన హాట్ రోల్డ్ కాయిల్ (HRC), కోల్డ్ రోల్డ్ కాయిల్ (CRC) ధరలు ప్రస్తుతం వరుసగా టన్నుకు రూ.64,000, రూ.75,000 వద్ద ఉన్నాయి.

ఈ స్థాయిలో ధరలు చివరిసారిగా 2022 జూన్‌లో నమోదయ్యాయని బిగ్‌మింట్ గణాంకాలు వెల్లడించాయి. అంటే దాదాపు నాలుగేళ్ల తర్వాత స్టీల్ మార్కెట్లో ఇలాంటి ధరలు కనిపిస్తున్నాయి.

నెల రోజుల్లోనే భారీగా పెరిగిన ధరలు

ఆగస్టు 1 నుంచి చూస్తే HRC, CRC ధరలు గణనీయంగా పెరిగాయి. HRC ధర టన్నుకు రూ.58,000 నుంచి రూ.64,000కు చేరగా.. CRC ధర రూ.66,500 నుంచి రూ.75,000కు పెరిగింది.

అంటే కేవలం ఆగస్టు ప్రారంభం నుంచి HRCపై టన్నుకు రూ.6,000, CRCపై ఏకంగా రూ.8,500 పెరుగుదల నమోదైంది.

కోకింగ్ కోల్ ధరల ప్రభావం

స్టీల్ ధరలు పెరగడానికి ప్రధాన కారణాల్లో ముడి సరుకుల వ్యయం పెరగడం ఒకటని బిగ్‌మింట్ విశ్లేషకులు చెబుతున్నారు. ముఖ్యంగా దేశీయంగా ఎక్కువగా దిగుమతి చేసుకునే కోకింగ్ కోల్ ధరలు భారీగా పెరిగాయి.

కేవలం నెల రోజుల్లోనే కోకింగ్ కోల్ ధర టన్నుకు సుమారు $65 పెరిగి $305కు చేరింది. మరోవైపు ఐరన్ ఓర్ ఫైన్స్ ధర కూడా టన్నుకు రూ.200-250 వరకు పెరిగి రూ.4,500కు చేరుకుంది.

ముందుముందు ధరలు ఎలా ఉండొచ్చు?

ముడి సరుకుల ధరల పెరుగుదలతో పాటు రుతుపవనాల తర్వాత స్టీల్‌కు డిమాండ్ పెరగడం కూడా మార్కెట్‌లో ధరలకు మద్దతుగా నిలుస్తోంది. ఈ నేపథ్యంలో ప్రస్తుత ఆర్థిక సంవత్సరం మిగిలిన త్రైమాసికాల్లోనూ ఉక్కు ధరల పెరుగుదల ధోరణి కొనసాగవచ్చని బిగ్‌మింట్ అంచనా వేసింది.

దీంతో నిర్మాణ రంగం, మౌలిక సదుపాయాల ప్రాజెక్టులు, స్టీల్‌పై ఆధారపడే ఇతర పరిశ్రమల వ్యయాలపై కూడా ప్రభావం పడే అవకాశం ఉంది.