Tata Group Crisis: చంద్రశేఖరన్ నియామకం చెల్లదు.. టాటా ట్రస్ట్స్ సంచలన ప్రకటన!

Tata Group Crisis: దేశంలోనే అత్యంత విశ్వసనీయమైన వ్యాపార సామ్రాజ్యంగా పేరుగాంచిన టాటా గ్రూప్‌లో కార్పొరేట్ వార్ మొదలైంది. టాటా సన్స్ చైర్మన్‌ పదవికి ఎన్. చంద్రశేఖరన్ పునర్నియామకాన్ని వ్యతిరేకిస్తూ మెజారిటీ వాటాదారు అయిన టాటా ట్రస్ట్స్ సంచలన ప్రకటన విడుదల చేసింది. ఇటీవల సెప్టెంబర్ 17న జరిగిన కీలక బోర్డు సమావేశంలో చంద్రశేఖరన్ నియామకం కోసం ఆమోదించిన తీర్మానం చట్టబద్ధంగా చెల్లదని, దానికి ఎలాంటి లీగల్ విలువ లేదని ట్రస్ట్ తేల్చిచెప్పింది.

కంపెనీ ఆర్టికల్స్ ఆఫ్ అసోసియేషన్ నిబంధనల ప్రకారం.. బోర్డు తీసుకునే ఏ కీలక నిర్ణయానికైనా టాటా సాన్స్‌లో ఏకంగా 66 శాతం వాటా కలిగిన టాటా ట్రస్ట్స్ నామినేట్ చేసిన డైరెక్టర్లలో మెజారిటీ మద్దతు ఉండటం అత్యంత ముఖ్యం, తప్పనిసరి కూడా. అయితే, తాజా సమావేశంలో బోర్డులోని ఇద్దరు ట్రస్ట్ నామినీలలో ఒకరు ఈ తీర్మానానికి వ్యతిరేకంగా ఓటు వేశారు.

దీంతో నిర్ణయానికి కావాల్సిన మెజారిటీ మద్దతు లభించలేదని, ఫలితంగా ఆ తీర్మానం వీగిపోయిందని ట్రస్ట్ బలంగా వాదిస్తోంది. సమావేశంలో ఓట్లు సమానమైనప్పుడు మాత్రమే చైర్మన్‌కు 'కాస్టింగ్ ఓటు' ఉపయోగించే హక్కు ఉంటుందని, అంతేకాని ట్రస్ట్ నామినీ మద్దతుకు సంబంధించిన ప్రత్యేక నిబంధనను ఇది ఎట్టి పరిస్థితుల్లోనూ అధిగమించలేదని ట్రస్ట్ స్పష్టం చేసింది.

గతంలో జరిగిన సంచలనాత్మక టాటా-మిస్త్రీ కేసులోనూ సుప్రీంకోర్టు తమ రక్షణ హక్కులను సమర్థించిందని టాటా ట్రస్ట్స్ ఈ సందర్భంగా గట్టిగా గుర్తుచేసింది. ప్రస్తుత చైర్మన్ నిబంధనలను తమకు అనుకూలంగా తప్పుగా అన్వయిస్తున్నారని ఆరోపిస్తూ ట్రస్ట్ తీవ్ర ఆగ్రహం వ్యక్తం చేసింది. ఈ ప్రతిష్టాత్మక న్యాయపోరాటం కోసం దేశంలోని అత్యున్నత సీనియర్ న్యాయవాదులలో ఒకరైన అభిషేక్ మను సింఘ్వీని రంగంలోకి దించడం విశేషం.

వాటాదారుల ప్రాథమిక హక్కులను ఇలా కాలరాయడం, నీరుగార్చడం భవిష్యత్తులో వందలాది భారతీయ కంపెనీల కార్పొరేట్ పాలనకు తీవ్ర ప్రమాదకరమని సింఘ్వీ ఈ సందర్భంగా తీవ్రంగా హెచ్చరించారు. దేశ ఆర్థిక వ్యవస్థను శాసించే టాటా గ్రూప్ శిఖరాగ్రానే ఇటువంటి అంతర్గత పోరు తలెత్తడం వ్యాపార వర్గాల్లో తీవ్ర ఆందోళన కలిగిస్తోంది. మరి ఈ వివాదం రాబోయే రోజుల్లో ఎలాంటి మలుపు తిరుగుతుందనేది సర్వత్రా ఉత్కంఠ రేపుతోంది.