Recharge Plans: గుడ్ న్యూస్.. అక్టోబర్ 21 నుంచి జియో, ఎయిర్‌టెల్, వీఐ నుంచి ఇంటర్నెట్ లేని ప్లాన్లు

Recharge Plans: స్మార్ట్‌ఫోన్లు, ఇంటర్నెట్ వాడని లక్షలాది మంది ఫీచర్ ఫోన్ వినియోగదారులు, వృద్ధులు, గ్రామీణ ప్రజల సౌలభ్యం కోసం ట్రాయ్ ఒక సంచలన నిర్ణయం తీసుకుంది. ఇప్పటివరకు ఇంటర్నెట్ వాడకపోయినా బలవంతంగా డేటా ప్లాన్లతో కూడిన రీఛార్జ్‌లు చేయించుకుంటున్న వినియోగదారుల కష్టాలను గుర్తించిన ట్రాయ్, జియో, ఎయిర్‌టెల్, వొడాఫోన్ ఐడియా వంటి ప్రముఖ టెలికాం కంపెనీలకు స్పష్టమైన ఆదేశాలు జారీ చేసింది. అక్టోబర్ 21 నుంచి టెలికాం ఆపరేటర్లు తప్పనిసరిగా కేవలం వాయిస్ కాలింగ్, ఎస్ఎంఎస్ సేవలు మాత్రమే ఉండే సరికొత్త ప్లాన్లను మార్కెట్లోకి తీసుకురావాలని ఆదేశించింది.

కొత్త ప్లాన్ల ప్రత్యేకతలు, నెలవారీ రెన్యూవల్ విధానం

ట్రాయ్ నిబంధనల ప్రకారం.. టెలికాం కంపెనీలు తాము అందించే సాధారణ డేటా ప్లాన్ల వాలిడిటీ ఆధారంగానే నాన్-డేటా ప్లాన్లను కూడా ప్రవేశపెట్టాలి. ఉదాహరణకు 30 రోజులు లేదా అంతకంటే తక్కువ వాలిడిటీ కలిగిన ప్లాన్లతో పాటు, కనీసం ఒక దీర్ఘకాలిక వాలిడిటీ కలిగిన నాన్-డేటా ప్లాన్‌ను కూడా అందుబాటులో ఉంచాలి. అత్యంత ముఖ్యమైన విషయం ఏమిటంటే ఈ ప్లాన్లు ప్రతి నెలా ఒకే నిర్దిష్ట తేదీన రెన్యూవల్ అయ్యేలా రూపకల్పన చేయాలని ట్రాయ్ సూచించింది. ఒకవేళ ఏ నెలలోనైనా ఆ తేదీ లేకపోతే (ఉదాహరణకు 31వ తేదీ), ఆ నెల చివరి రోజున ప్లాన్ రెన్యూవల్ అవుతుంది. దీనివల్ల వినియోగదారులకు రీఛార్జ్ తేదీలపై స్పష్టత వస్తుంది.

రీఛార్జ్ ధరల తగ్గింపుపై ట్రాయ్ క్లారిటీ

డేటా సేవలను తొలగించిన తర్వాత ఈ కొత్త ప్లాన్ల ధరలు ఏ విధంగా ఉండాలనేదానిపై వినియోగదారుల్లో తీవ్ర చర్చ జరుగుతోంది. టెలికాం కంపెనీలకు ట్రాయ్ ఎలాంటి కఠినమైన ధరల పరిమితిని విధించనప్పటికీ, డేటా తొలగించినందుకు తగినంతగా ధరల్లో కోత విధించాలని స్పష్టం చేసింది. ప్రస్తుత మార్కెట్ గణాంకాల ప్రకారం డేటా వినియోగం విపరీతంగా పెరిగినప్పటికీ, కేవలం కాలింగ్ కోరుకునే సామాన్య ప్రజలకు తక్కువ ధరకే సేవలు అందేలా కంపెనీలు ధరలను నిర్ణయించాలని సూచించింది. వినియోగదారుల నుంచి అనవసరంగా వసూలు చేస్తున్న అదనపు రుసుములకు ఈ నిబంధన ద్వారా అడ్డుకట్ట పడనుంది.

టెలికాం కంపెనీల ఆందోళనలు

గతంలో డిసెంబర్ 2024లో కూడా ట్రాయ్ ఇలాంటి నిబంధనలనే సూచించినప్పటికీ, టెలికాం కంపెనీలు చిన్న ప్లాన్లను విస్మరించి కేవలం పెద్ద ప్లాన్లను మాత్రమే ప్రవేశపెట్టాయి. దీనిపై వినియోగదారుల నుంచి పెద్ద ఎత్తున ఫిర్యాదులు రావడంతో ట్రాయ్ ఈసారి మరింత కఠినంగా వ్యవహరించింది. మరోవైపు ఈ చౌకైన ప్లాన్ల వల్ల టెలిమార్కెటింగ్ స్పామ్ కాల్స్ పెరిగే అవకాశం ఉందని కొన్ని కంపెనీలు ఆందోళన వ్యక్తం చేశాయి. అయితే అన్ని అంశాలను పరిశీలించిన ట్రాయ్, వినియోగదారుల ప్రయోజనాలే ముఖ్యమని భావించి అక్టోబర్ 21 నుంచి ఈ నిబంధనలను కచ్చితంగా అమలు చేయాలని తేల్చిచెప్పింది.