TRAI: ట్రాయ్ కొత్త నిబంధనలు.. ఇకపై స్పామ్ కాల్స్‌ బెడద లేనట్టే.! ఇలా ఈజీగా..

TRAI: భారతదేశంలో టెలికం వినియోగదారులను వేధిస్తున్న అవాంఛిత స్పామ్ కాల్స్ అలాగే సందేశాల బెడదను నివారించడానికి టెలికాం నియంత్రణ సంస్థ ట్రాయ్ అత్యంత కీలకమైన నిర్ణయాలు తీసుకుంది. రోజురోజుకూ పెరుగుతున్న సైబర్ మోసాలు, అనధికారిక కమర్షియల్ కాల్స్‌ను అరికట్టేందుకు కొత్త నిబంధనలను అమలులోకి తెచ్చింది. టెలికాం ఆపరేటర్లు మరింత పకడ్బందీగా వ్యవహరించేలా కొత్త మార్గదర్శకాలను జారీ చేసింది. ఈ ఆధునిక నిబంధనల ద్వారా డిజిటల్ వినియోగదారులకు భద్రతను అందించాలని లక్ష్యంగా పెట్టుకుంది.

స్పామ్ నంబర్లను మరింత సమర్థవంతంగా గుర్తించడానికి టెలికం ఆపరేటర్లు ఆర్టిఫిషియల్ ఇంటెలిజెన్స్ టెక్నాలజీని ఉపయోగించాలని ట్రాయ్ స్పష్టం చేసింది. ఒకే సెండర్ నుంచి పది రోజుల్లో ఐదు లేదా అంతకంటే ఎక్కువ నంబర్లు స్పామ్‌గా తేలితే ఆటోమేటిక్‌గా కొత్త కేవైసీ తనిఖీలు ప్రారంభమవుతాయి. అవసరమైతే భౌతిక తనిఖీలు నిర్వహించి ఆ నంబర్ల నుంచి వచ్చే అవుట్‌గోయింగ్ కాల్స్‌ను పూర్తిగా నిలిపివేస్తారు. నిబంధనలను నిరంతరం ఉల్లంఘించే వారి కనెక్షన్లను శాశ్వతంగా తొలగిస్తామని హెచ్చరించారు.

ఆటోమేటెడ్ కమర్షియల్ కాల్స్, రోబోకాల్స్, ప్రీ-రికార్డ్ చేసిన సందేశాలపై నిబంధనలను మరింత కఠినతరం చేశారు. వ్యాపార సంస్థలు ఈ ఆటోమేటెడ్ సిస్టమ్స్ వాడే ముందు టెలికాం ప్రొవైడర్‌కు ముందే సమాచారం అందించి ఉపయోగించే నంబర్ల జాబితాను సమర్పించాలి. లేనిపక్షంలో ఆ కాల్స్‌ను నేరుగా అవాంఛిత కమర్షియల్ కమ్యూనికేషన్‌గా పరిగణిస్తామని స్పష్టం చేశారు. కొన్ని రకాల ఆటోమేటెడ్ కాల్స్‌కు ప్రతి నిమిషానికి సుమారు రూ. 1 కన్నా తక్కువ చొప్పున టెర్మినేషన్ ఛార్జీలు వర్తించేలా నిబంధనలు రూపొందించారు.

టెలికాం ప్రొవైడర్లు ఏవైనా నిబంధనలు ఉల్లంఘిస్తే వినియోగదారులు అధికారికంగా అప్పీల్ చేసుకునే వెసులుబాటును కల్పించారు. ట్రూకాలర్ లాంటి కాల్ మేనేజ్‌మెంట్ యాప్‌లపై కూడా కొన్ని కొత్త నియంత్రణలను విధించారు. ప్రభుత్వానికి చెందిన ప్రత్యేక నంబరింగ్ సిరీస్ నుంచి వచ్చే కాల్స్‌ను ఈ యాప్‌లు నేరుగా స్పామ్‌గా బ్లాక్ చేయడానికి వీలుండదని తెలిపారు. వినియోగదారుల వ్యక్తిగత గోప్యతను కాపాడటంతో పాటు పారదర్శకతను పెంచేందుకు ఈ చర్యలు ఎంతగానో దోహదపడతాయని టెలికం నిపుణులు అభిప్రాయపడుతున్నారు.