Trump Towers Hyderabad: కోకాపేటలో 242 మీటర్ల ట్రంప్ టవర్స్.. ధరలు ఇవే
హైదరాబాద్ కోకాపేటలో 242 మీటర్ల ఎత్తైన ట్రంప్ టవర్స్ రానున్నాయి. రూ.2,000 కోట్ల పెట్టుబడితో 450 లగ్జరీ ఇళ్లను నిర్మించనున్నారు.
Trump Towers Hyderabad
హైదరాబాద్లో ట్రంప్ టవర్స్: నగర లగ్జరీ రియల్ ఎస్టేట్ రంగంలో మరో భారీ ప్రాజెక్ట్ రాబోతోంది. కోకాపేట గోల్డెన్ మైల్ రోడ్డులో 4.5 ఎకరాల విస్తీర్ణంలో ట్రంప్ టవర్స్ హైదరాబాద్ నిర్మించనున్నారు. 242 మీటర్ల ఎత్తుతో రెండు 65 అంతస్తుల టవర్లను నిర్మించనున్నారు. ఈ రెండు టవర్లను ఆకాశంలో ప్రత్యేకమైన స్కై బ్రిడ్జ్తో అనుసంధానం చేయనున్నారు. పూర్తయిన తర్వాత ఇది భారత్లోనే అత్యంత ఎత్తైన ట్రంప్ టవర్గా నిలిచే అవకాశం ఉంది.
ఇది భారత్లో వస్తున్న ఎనిమిదో ట్రంప్ బ్రాండెడ్ ప్రాజెక్ట్ కాగా, దక్షిణ భారతదేశంలో ఇదే తొలి ప్రాజెక్ట్ కానుంది. ప్రాజెక్ట్ ప్రారంభోత్సవం కోసం 2026–27 ఆర్థిక సంవత్సరంలో ట్రంప్ కుటుంబానికి చెందిన ఓ సభ్యుడు హైదరాబాద్కు వచ్చే అవకాశం ఉందని సమాచారం.
ట్రిబెకా డెవలపర్స్, ఇరా రియల్టీ భాగస్వామ్యంతో ఈ ప్రాజెక్ట్ను అభివృద్ధి చేస్తున్నారు. భూమి విలువను మినహాయించి ప్రాజెక్ట్పై సుమారు రూ.2,000 కోట్ల పెట్టుబడి పెట్టనున్నట్లు తెలుస్తోంది. డెవలపర్లు రూ.3,500 కోట్ల నుంచి రూ.4,500 కోట్ల వరకు ఆదాయం వస్తుందని అంచనా వేస్తున్నారు.
ప్రాజెక్ట్లో సుమారు 450 అపార్ట్మెంట్లు ఉండనున్నాయి. వీటి ధరలు రూ.5 కోట్ల నుంచి రూ.10 కోట్ల మధ్య ఉండనున్నాయి. 3.5, 4 బీహెచ్కే ఇళ్లతో పాటు డబుల్ హైట్ సింప్లెక్స్ రెసిడెన్సెస్, పెంట్హౌస్లు కూడా అందుబాటులో ఉండనున్నాయి. మొత్తం అభివృద్ధి చేయదగిన విస్తీర్ణం సుమారు 22 లక్షల చదరపు అడుగులు.
ఈ ప్రాజెక్ట్లో ప్రధాన ఆకర్షణగా స్కై బ్రిడ్జ్ నిలవనుంది. రెండు టవర్లను కలిపే ఈ వంతెనపై ట్రంప్ క్లబ్ ఏర్పాటు చేయనున్నారు. ఇక్కడ ల్యాండ్స్కేప్డ్ ప్రదేశాలతో పాటు హైదరాబాద్ నగరాన్ని వీక్షించేలా ప్రత్యేక ఏర్పాట్లు చేయనున్నారు.
లగ్జరీ జీవనశైలికి అనుగుణంగా ఒక లక్ష చదరపు అడుగులకు పైగా సౌకర్యాలను అందుబాటులోకి తీసుకురానున్నారు. కరాకే, బాక్సింగ్ రింగ్, స్క్వాష్ కోర్టులు, ఐస్ బాత్లు, ప్రత్యేకంగా రూపొందించిన బ్యాంకెట్ హాళ్లు, వెల్నెస్, ఫిట్నెస్, వినోదం, రిక్రియేషన్ సౌకర్యాలు ఇందులో ఉండనున్నాయి.
టవర్ల నిర్మాణంలోనూ ప్రత్యేకత చూపించనున్నారు. సాధారణ ప్లాస్టర్, పెయింట్ ఫినిషింగ్కు బదులుగా గ్లాస్, మెటల్ ఫసాడ్ను ఉపయోగించనున్నారు. దీంతో భవనాలకు ఆధునిక రూపంతో పాటు ఎక్కువ కాలం మన్నిక ఉండేలా డిజైన్ చేస్తున్నట్లు డెవలపర్లు చెబుతున్నారు.
కోకాపేట ప్రాంతం గత కొంతకాలంగా హైదరాబాద్లోని ప్రముఖ లగ్జరీ రియల్ ఎస్టేట్ గమ్యస్థానంగా ఎదుగుతోంది. ఫైనాన్షియల్ డిస్ట్రిక్ట్, పశ్చిమ ఐటీ కారిడార్కు సమీపంలో ఉండటం ఈ ప్రాంతానికి మరింత ప్రాధాన్యతను తీసుకొచ్చింది. ఈ నేపథ్యంలో ట్రంప్ టవర్స్ హైదరాబాద్ ప్రాజెక్ట్ నగర లగ్జరీ రియల్ ఎస్టేట్ మార్కెట్లో ప్రత్యేక ఆకర్షణగా నిలిచే అవకాశం ఉంది.