Unhappy Leave: మూడ్ బాగోలేదా? అయితే ఆఫీస్‌కు రాకండి.. ఉద్యోగులకు కంపెనీ బంప‌రాఫ‌ర్‌.

Unhappy Leave

ఏంటీ 'అన్‌హ్యాపీ లీవ్' పాలసీ?

ఈ కొత్త విధానం ప్రకారం ఉద్యోగులు మానసిక ఒత్తిడి, భావోద్వేగ సమస్యలు, అలసట లేదా మూడ్ బాగోలేని సమయంలో ఏడాదికి 10 రోజుల వరకు సెలవు తీసుకోవచ్చు. ఈ సెలవు కోసం ఎలాంటి మెడికల్ సర్టిఫికెట్ అవసరం లేదు. అంతేకాదు, ఈ సెలవు తీసుకున్నా జీతంలో ఎలాంటి కోత ఉండదు. ఇది పూర్తిగా పెయిడ్ లీవ్. మరో ముఖ్యమైన విషయం ఏమిటంటే, ఉద్యోగి సెలవు కోరితే మేనేజర్ దానిని తిరస్కరించే అవకాశం ఉండదు.

ఈ నిర్ణయం ఎందుకు తీసుకుంది?

కంపెనీ వ్యవస్థాపకుడు, చైర్మన్ యూ డాంగ్‌లై అభిప్రాయం ప్రకారం, ఉద్యోగులు మానసికంగా సంతోషంగా లేకపోయినా బలవంతంగా పనిచేయించడం సరైన పద్ధతి కాదు. శారీరక ఆరోగ్యం ఎంత ముఖ్యమో, మానసిక ఆరోగ్యం కూడా అంతే ముఖ్యమని ఆయన చెప్పారు. ఉద్యోగులు నిరంతర పని ఒత్తిడి, ఒత్తిడితో వచ్చే అలసట నుంచి బయటపడేందుకు కొంత సమయం విశ్రాంతి తీసుకుంటే, తిరిగి మరింత ఉత్సాహంతో పని చేయగలరని కంపెనీ భావిస్తోంది.

ఈ పాలసీపై హర్ష్ గోయెంకా ఏమన్నారు?

ఈ వినూత్న పాలసీపై స్పందించిన ఆర్‌పీజీ గ్రూప్ చైర్మన్ హర్ష్ గోయెంకా సోషల్ మీడియాలో ఆసక్తికర వ్యాఖ్యలు చేశారు. ఉద్యోగులు సంతోషంగా లేకపోతే వారికి బలవంతంగా పని చేయించకూడదనే ఆలోచన ఎంతో అభినందనీయమని పేర్కొన్నారు. భారతీయ కంపెనీలు కూడా ఉద్యోగుల మానసిక ఆరోగ్యం, పని ఒత్తిడిని తగ్గించే ఇలాంటి విధానాలపై ఆలోచించాలని సూచించారు. అలాగే, ఉద్యోగులు ఇష్టంగా, ఆనందంగా కార్యాలయానికి వచ్చేలా మంచి పని వాతావరణాన్ని ఎలా కల్పించాలనే అంశంపై భారత్‌లో కూడా చర్చ జరగాల్సిన అవసరం ఉందని అభిప్రాయపడ్డారు.