UPI: యూపీఐ సేవ‌ల‌కు నేటితో ప‌దేళ్లు.. ప్ర‌ధాని మోదీ ఆస‌క్తిక‌ర ట్వీట్!

UPIకి పదేళ్లు.. ప్రధాని మోదీ కీలక వ్యాఖ్యలు

భారత్‌లో డిజిటల్ చెల్లింపుల వ్యవస్థలో యూనిఫైడ్ పేమెంట్స్ ఇంటర్‌ఫేస్ (UPI) కీలక మార్పు తీసుకొచ్చింది. UPI ప్రారంభమై మంగళవారంతో 10 ఏళ్లు పూర్తయ్యాయి. ఈ సందర్భంగా ప్రధాని నరేంద్ర మోదీ స్పందిస్తూ.. UPI ప్రారంభం భారత్ డిజిటల్ చెల్లింపుల ప్రయాణంలో ఒక ముఖ్యమైన మలుపుగా నిలిచిందని అన్నారు.

“UPI విస్తృతి, చేరువ ప్రతి భారతీయుడు గర్వించాల్సిన విషయం. UPIని మీరు ఎలా ఉపయోగిస్తున్నారు? అది మీ జీవితంలో ఎలాంటి మార్పు తీసుకొచ్చింది?” అంటూ ప్రధాని మోదీ ఎక్స్‌లో పోస్ట్ చేశారు. ఇదిలా ఉంటే.. ప్రస్తుతం మొబైల్ ఫోన్ ద్వారా ఒక బ్యాంకు ఖాతా నుంచి మరో బ్యాంకు ఖాతాకు వెంటనే డబ్బు పంపేందుకు UPI ప్రధాన మార్గంగా మారింది.

చిన్న దుకాణాల నుంచి పెద్ద వ్యాపార సంస్థల వరకు QR కోడ్ ద్వారా చెల్లింపులు చేయడం సాధారణంగా మారిపోయింది. యూపీఐ సేవ‌ల‌కు ప‌దేళ్లు గ‌డుస్తోన్న త‌రుణంలో భార‌త డిజిట‌ల్ పేమెంట్స్‌కి సంబంధించిన ప‌లు ఆస‌క్తిక‌ర విష‌యాలు ఇప్పుడు తెలుసుకుందాం.

రోజువారీ జీవితంలో భాగమైన యూపీఐ

వాణిజ్య, పరిశ్రమల శాఖ మంత్రి పీయూష్ గోయల్ కూడా UPIపై స్పందించారు. “QR కోడ్ ప్లీజ్?” అనే మాటను కోట్లాది మంది భారతీయులు ప్రతిరోజూ ఉపయోగిస్తున్నారని ఆయన పేర్కొన్నారు. ప్రధాని మోదీ ఆలోచనతో రూపుదిద్దుకున్న UPI డిజిటల్ ఇండియాలో ఒక కీలక వాస్తవంగా మారిందని గోయల్ అన్నారు.

మొబైల్ ఫోన్ ద్వారా క్షణాల్లో చెల్లింపులు చేయడం వల్ల నగదు తీసుకెళ్లాల్సిన అవసరం చాలా వరకు తగ్గింది. కేంద్ర మంత్రి హర్దీప్ సింగ్ పూరి కూడా UPIని భారత్ డిజిటల్ ప్రయాణంలో మార్పు తీసుకొచ్చిన శక్తిగా అభివర్ణించారు. UPI వల్ల చెల్లింపులు వేగంగా, సులభంగా, సురక్షితంగా మారడంతో పాటు మరింత మందికి డిజిటల్ ఆర్థిక సేవలు అందుబాటులోకి వచ్చాయని చెప్పారు.

1.78 కోట్ల నుంచి 24,162 కోట్లకు.. భారీగా పెరిగిన లావాదేవీలు

2016 ఆగస్టు 25న నేషనల్ పేమెంట్స్ కార్పొరేషన్ ఆఫ్ ఇండియా (NPCI), రిజర్వ్ బ్యాంక్ ఆఫ్ ఇండియా (RBI) పర్యవేక్షణలో UPIని ప్రారంభించింది. అప్పటి నుంచి UPI వినియోగం భారీగా పెరిగింది. 2016-17 ఆర్థిక సంవత్సరంలో యూపీఐ ద్వారా కేవలం 1.78 కోట్ల లావాదేవీలు జరిగాయి. అయితే 2025-26 ఆర్థిక సంవత్సరానికి ఈ సంఖ్య ఏకంగా 24,162 కోట్లకు పైగా చేరింది.

అంటే దాదాపు 13,000 రెట్లు పెరుగుదల నమోదైంది. లావాదేవీల విలువలోనూ భారీ వృద్ధి కనిపించింది. 2016-17లో UPI ద్వారా జరిగిన లావాదేవీల విలువ సుమారు రూ.0.07 లక్షల కోట్లు కాగా, 2025-26 నాటికి అది సుమారు రూ.314 లక్షల కోట్లకు చేరింది. అంటే లావాదేవీల విలువ 4,000 రెట్లకు పైగా పెరిగింది.

డిజిటల్ ఇండియాకు వెన్నెముకగా UPI

UPI ప్రస్తుతం భారత్‌లోని డిజిటల్ చెల్లింపుల వ్యవస్థకు వెన్నెముకగా మారింది. ఒకే యాప్ ద్వారా వ్యక్తి నుంచి వ్యక్తికి, వ్యక్తి నుంచి వ్యాపారికి తక్షణ చెల్లింపులు చేసే అవకాశం కల్పిస్తోంది. ఇంటర్‌ఆపరబుల్ వ్యవస్థ కావడంతో వివిధ బ్యాంకులు, చెల్లింపు యాప్‌ల మధ్య సులభంగా లావాదేవీలు చేయవచ్చు.

దీంతో డిజిటల్ చెల్లింపులు పట్టణ ప్రాంతాలకే పరిమితం కాకుండా చిన్న పట్టణాలు, గ్రామీణ ప్రాంతాలకు కూడా విస్తరించాయి. భారత్ రూపొందించిన డిజిటల్ పబ్లిక్ ఇన్‌ఫ్రాస్ట్రక్చర్‌లో UPI అత్యంత విజయవంతమైన వ్యవస్థల్లో ఒకటిగా నిలిచింది.

వేగవంతమైన లావాదేవీలు, సులభమైన వినియోగం, విస్తృతమైన చేరువ కారణంగా ప్రపంచ స్థాయిలోనూ UPIపై ఆసక్తి పెరిగింది. పదేళ్లలో కోట్లాది మంది రోజువారీ చెల్లింపుల్లో భాగంగా మారిన UPI.. భారత్ డిజిటల్ ఆర్థిక వ్యవస్థలో తనదైన ముద్ర వేసుకుంది.